އެމްއޭސީއެލް އިންޓާންޝިޕްގެ ބައިވެރިންނަށް ލިޔުން ދީފި

ނުކުޅެދުންތެރިކަން ހުންނަ ކުދިންނަށް ހާއްސަކޮށް އެމްއޭސީއެލުން ކުރިއަށް ގެންދިޔަ އިންޓާންޝިޕް ޕްރޮގްރާމް ނިންމާލައިފި އެވެ.

އިންޓާޝިޕް ޕްރޮގްރާމް އެމްއޭސީއެލް އިން ހިނގީ 1 މޭއި އިން 31 ޖުލައި ގެ ނިޔަލަށެވެ. 

އެ ޕްރޮގްރާމުގައި، ކެއާ ސޮސައިޓީގެ ހަތަރު ދަރިވަރަކަށް މަސައްކަތު މާހުލުގެ ތެރެއިން ތަމްރީނާއި މަސައްކަތުގެ ތަޖްރިބާ ހޯދުމުގެ ފުރުސަތު ވެލާނާ އިންޓަނޭޝަނަލް އެއާޕޯޓުން ހޯދައި ދިނެވެ.

އިންޓާންޝިޕް ޕްރޮގްރާމްގެ ކާމިޔާބީ ފާހަގަ ކުރަން ވެލާނާ އިންޓަނޭޝަނަލް އެއާޕޯޓުގައި ބޭއްވި ރަސްމިއްޔާތެއްގައި އެމްއޭސީއެލްގެ މެނޭޖިން ޑައިރެކްޓަރު އަދި ސީއީއޯ މަހްޖޫބް ޝުޖާއު ބައިވެރިވެ ވަޑައިގެން ވަނީ އިންޓާންޝިޕް ޕްރޮގްރާމް ބައިވެރިންނަށް ލިޔުން ހަވާލުކޮށް ދެއްވާފަ އެވެ. 

އެ ރަސްމިއްޔާތުގައި އެމްއޭސީއެލްގެ އެކި ޑިޕާޓްމަންޓްތަކުގެ ވެރިންނާއި ކެއާ ސޮސައިޓީގެ ވެރިން ވެސް  ބައިވެރިވެ ވަޑައިގަތެވެ. 

އެމްއޭސީއެލް އިން ބުނީ އެ ކުންފުނީގެ އިޖްތިމާއީ ޒިންމާގެ ދަށުން، މުޖްތަމައުގައި ތިބި ނުކުޅެދޭ ފަރާތްތައް ބާރުވެރިކޮށް ދެމެހެއްޓެނިވި ގޮތެއްގައި އެހީތެރިކަން ފޯރު ކޮށްދޭނެ ކަމަށެވެ. އަދި އެމްއޭސީއެލް އިން މިއަހަރުގެ ތެރޭގައި ވެސް މުޖުތަމައުގެ ލާބައާއި ދެމެހެއްޓެނިވި ތަރައްގީއާއި ކުރިއެރުމަށް ގިނަ މަސައްކަތްތަކެއް ކުރަން ރާވާފައި ކަމަށެވެ.