ވަހީދަށް ރައްދެއް: މަގުމަތިވީ އަމިއްލަ އެދުމަށް ޕީޕީއެމް ދޫކޮށް ވަޑައިގެންނެވި ބޭފުޅުން

ޕީޕީއެމްްގެ އާންމު މެންބަރުން މި ފަަހަރުގެ ރިޔާސީ އިންތިހާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމަށް ވޯޓް ދެއްވުމަށް އެ ޕާޓީގެ ކުރީގެ ޕޮލިޓިކަލް އެޑްވައިޒަރު / ކުރީގެ ރައީސް ޑރ. މުހައްމަދު ވަހީދު ހަސަން މަނިކު ގޮވާލެއްވުމުން ޕްރޮގްރެސިވް ކޮންގްރެސް ކޯލިޝަންގެ އެކްޓިން ލީޑަރު އަބްދުއްރަހީމް އަބްދުﷲ މިރޭ ރައްދު ދެއްވައިފި އެވެ.

ރައީސް ވަހީދަށް އަބްދުއްރަހީމް ރައްދު ދެއްވާ ފާޑުވިދާޅުވީ މިރޭ ހއ. އިހަވަންދޫގައި ބޭއްވި ޕީއެންސީގެ ރިޔާސީ ކެންޑިޑޭޓް ޑރ. މުހައްމަދު މުއިއްޒުގެ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ. 

ޕީޕީއެމުން ވަކިވެވަޑައިގެން ޖުމްހޫރީ ޕާޓީއާ ގުޅިވަޑައިގެން ރައީސް ވަހީދު ރޭ ވިދާޅުވީ އެންމެ މެންބަރުން ގިނަ ޕާޓީތަކުގެ ތެރޭގައި ހިމެނޭ ޕީޕީއެމަށް މި ފަހަރު ރިޔާސީ ރޭހަށް އެއްވެސް ބޭފުޅަކު ނެރެވޭ ގޮތް ނުވި ކަމަށެވެ. އެ ފުރުސަތު ނުދިނީ ކަމަށާ އެހެން ދިމާވީ ޕީޕީއެމްގައި އެތެރޭގެ ޑިމޮކްރަސީ ނެތުމުން ކަަމަށް ވިދާޅުވި އެވެ.

އެހެން ކަމުން ރާއްޖޭގެ ތާރީހުގައި ބޭއްވޭ އެންމެ ބޮޑު އެއް އިންތިހާބު ބޭއްވެނީ ޕީޕީއެމްގެ ކުލައާ ނިޝާނެއް ވެސް ނެތި ކަމަށް ވިދާޅުވި އެވެ. ޕީޕީއެމުން ވަކިވެވަޑައިގަތުމަކީ "މަގުމަތި"ވުން ކަމަށް ދެކެވަޑައިނުގަންނަވާ ކަމަށާ ނަމަވެސް ބަޔަކަށް އެހެން ގަބޫލު ކުރެވޭނަމަ އެމަނިކުފާނާއެކު ޕީޕީއެމްގެ އެތައް ހާސް މެންބަރުންނެއްވެސް މަގުމަތި ވެއްޖެ ކަމުގައި ވިދާޅުވި އެވެ.

"ކޮބައިތޯ ޕީޕީއެމްގެ ސާޅީސް ހާހެއްހާ މެންބަރުން. އަޅުގަނޑު ދަންނަވާނީ އަޅުގަނޑު މަގުމަތިވިއްޔާ އެ ބޭފުޅުން ވެސް ތިއްބެވީ މަގުމަތީގައޭ،" މާމިގިލީގައި ރޭ ބޭއްވި ޖަލްސާގައި ރައީސް ވަހީދު ވިދާޅުވި އެވެ.

އިހަވަންދޫގައި މިރޭ ބޭއްވި ޖަލްސާގައި ވާހަކަދައްކަވަމުން އަބްދުއްރަހީމް ވަނީ ރައީސް ވަހީދުގެ ނަންފުޅު ވިދާޅުވެ އެމަނިކުފާނު ރޭ ދެއްކެވި ވާހަކަތަކަށް ރައްދު ދެއްވާފައެވެ. އަބްދުއްރަހީމް ވިދާޅުވީ ޕީޕީއެމްގެ މެންބަރުން މަގުމަތި ނުވާ ކަމަށާ މަގުމަތީވީ ޕީޕީއެމް ދޫކޮށް ވަޑައިގެންނެވި ބޭފުޅުން ކަމަށެވެ.

ލީޑަރަކަށް އިހްލާސްތެރި ވަފާތެރި އަދި ބަދަހި ދެވަނަ ޓީމެއް ޕީޕީއެމް ޕީއެންސީގައި ނޫނީ ނެތް ކަމަށް އަބްދުއްރަހީމް ވިދާޅުވި އެވެ. އަދި ކުރިއެކޭ އެއްގޮތަށް މިހާރު ވެސް ދެ ޕާޓީގެ ލީޑާޝިޕް އޮތީ ވަރުގަދަކަމާއި ބަދަހިކޮށް ކަމަށް ވިދާޅުވި އެވެ.

"ޕީޕީއެމް ޕީއެންސީގެ މެންބަރުންނެއް ނޫން މަގުމަތީވީއެއް. މަގުމަތީވީ ޕީޕީއެމް ޕީއެންސީ ދޫކޮށްދިޔަ ބޭފުޅުން،" ރައީސް ވަހީދަށް ރައްދު ދެއްވާ އަބްދުއްރަހީމް ވިދާޅުވި އެވެ.

އަބްދުއްރަހީމް ވަނީ ޕީޕީއެމުން ވަކިވެވަޑައިގަންނަވާކަން ހާމަކުރައްވާ އެ ޕާޓީގެ ސެކްރެޓަރީ ޖެނެރަލަށް ވަހީދު ފޮނުއްވެވި ސިޓީގައި ވިދާޅުވެފައިވާ ވާހަކަތަކަށް ވެސް ރައްދު ދެއްވާފައެވެ. ރައީސްގެ ވަހީދުގެ ސިޓީފުޅުގައި އިތުރު ކެންޑިޑޭޓެއް ނެރުމަށް ވަގުތު އޮވެ ޕީޕީއެމްގެ ލީޑަޝިޕްގެ ފަރާތުން އެއްވެސް މަސައްކަތެއް ނުކުރައްވަވައި އަދި ޕާޓީގެ ސެނެޓަށް ކެންޑިޑޭޭޓެއް ނެރުމުގެ ފުރުސަތެއް ނުދެއްވަވައި އެހެން ކުޑަ ޕާޓީއެއްގެ ކެންޑިޑޭޓެއް ނެރުމަކީ ޕީޕީއެމް އަށް ޕާޓީގެ ލީޑަޝިޕުން ވެވަޑައިގެންނެވި ވަރަށް ބޮޑު ހިޔާނާތެއް ކަމަށް ވިދާޅުވެފައެވެ.

ނަމަވެސް އަބްދުއްރަހީމް ވަނީ ރައީސް ވަހީދުގެ އެ ވާހަކަފުޅަށް ވަރަށް ހޫނު ރައްދު ދެއްވާފައެވެ.

"އަމިއްލަ އެދުން އިސްކޮށް ވަޑައިގެން ބޭފުޅަކު ވަޑައިގަތީ. ޕީޕީއެމް ޕީއެންސީން ހިޔާނާތްތެރިވިޔޭ ވިދާޅުވާނީ ލަދެއް ހަޔާތެއް ނެތީމަ،"

އަބްދުއްރަހީމް ވިދާޅުވީ ޕީޕީއެމް / ޕީއެންސީން އިސްކުރީ ގައުމާއި ރައްޔިތުންގެ މަސްލަހަތު ކަމަށެވެ. އަދި ދެއްކުންތެރި ކަމަށް ކުރި އެއްވެސް ކަމެއް ނޯންނާނެ ކަމަށް ވިދާޅުވި އެވެ. ދެން ވިދާޅުވީ ރައީސް ޔާމީންގެ އިރުޝާދަށް ނޫނީ އެއްވެސް ކަމެއް ނުކުރައްވާ ކަމަށާ ދެން ވެސް ނުކުރައްވާނެ ކަމަށެވެ.