ޕީޕީއެމް މަގުމަތި ވެއްޖެ، ގާސިމަށް ވޯޓްދީ: ވަހީދު

ޕީޕީއެމްްގެ އާންމު މެންބަރުން މި ފަަހަރުގެ ރިޔާސީ އިންތިހާބުގައި ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމަށް ވޯޓް ދެއްވުމަށް އެ ޕާޓީގެ ކުރީގެ ޕޮލިޓިކަލް އެޑްވައިޒަރު / ކުރީގެ ރައީސް ޑރ. މުހައްމަދު ވަހީދު ހަސަން މަނިކު ގޮވާލައްވައިފި އެވެ.

އެމަނިކުފާނު މިކަމަށް ގޮވާލެއްވީ އދ. މާމިގިލީގައި މިރޭ އޮތް ގާސިމް އިބްރާހިމްގެ ކެމްޕެއިން ޖަލްސާއެއްގައި ވާހަކަ ދައްކަވަމުންނެވެ. އެ ޖަލްސާގައި ވާހަކަ ދެއްކެވުމުގެ ކުރީން ރައީސް ވަހީދު ވަނީ ޖޭޕީއާ ގުޅިވަޑައިގެންފައެވެ.

ޕީޕީއެމުން ވަކިވެވަޑައިގެން ސަބަބާއި ގުޅޭގޮތުން ފުރަތަމަ ފަހަރަށް އާންމު ޖަލްސާއެއްގައި ވާހަކަ ދައްކަވަމުން ރައީސް ވަހީދު ވިދާޅުވީ އެންމެ މެންބަރުން ގިނަ ޕާޓީތަކުގެ ތެރޭގައި ހިމެނޭ ޕީޕީއެމަށް މި ފަހަރު ރިޔާސީ ރޭހަށް އެއްވެސް ބޭފުޅަކު ނެރެވޭ ގޮތް ނުވި ކަމަށެވެ. އެ ފުރުސަތު ނުދިނީ ކަމަށާ އެހެން ދިމާވީ ޕީޕީއެމްގައި އެތެރޭގެ ޑިމޮކްރަސީ ނެތުމުން ކަަމަށް ވިދާޅުވި އެވެ.

އެހެން ކަމުން ރާއްޖޭގެ ތާރީހުގައި ބޭއްވޭ އެންމެ ބޮޑު އެއް އިންތިހާބު ބޭއްވެނީ ޕީޕީއެމްގެ ކުލައާ ނިޝާނެއް ވެސް ނެތި ކަމަށް ވިދާޅުވި އެވެ. ޕީޕީއެމުން ވަކިވެވަޑައިގަތުމަކީ "މަގުމަތި"ވުން ކަމަށް ދެކެވަޑައިނުގަންނަވާ ކަމަށާ ނަމަވެސް ބަޔަކަށް އެހެން ގަބޫލު ކުރެވޭނަމަ އެމަނިކުފާނާއެކު ޕީޕީއެމްގެ އެތައް ހާސް މެންބަރުންނެއްވެސް މަގުމަތި ވެއްޖެ ކަމުގައި ވިދާޅުވި އެވެ.

"ކޮބައިތޯ ޕީޕީއެމްގެ ސާޅީސް ހާހެއްހާ މެންބަރުން. އަޅުގަނޑު ދަންނަވާނީ އަޅުގަނޑު މަގުމަތިވިއްޔާ އެ ބޭފުޅުން ވެސް ތިއްބެވީ މަގުމަތީގައޭ،"

ރައީސް ވަހީދު ވަނީ މިއީ ގައުމު އިސްކޮށް ގައުމުގެ މަސްލަހަތު ހިމާޔަތް ކުރުމަށް ހުރިހާ ރައްޔިތުން އެކުގައި މަސައްކަތް ކުރަންވީ ވަގުތު ކަމަށް ވިދާޅުވެފައެވެ. އަދި ޕީޕީއެމްގެ މެންބަރުންގެ ކިބަިއން އެދިވަޑައިގަތީ ގާސިމަށް ވޯޓް ދެއްވުމަށެވެ.

"މިއަދު އަޅުގަނޑުމެން ބަލަންވީ މީހަކަށް ނޫން. މިއަދު އަޅުގަނޑުމެން ބަލަންވީ މި ގައުމަށް ކުރިމަތިވެފައިވާ ކަންކަމުން އަޅުގަނޑުމެން ސަލާމަތްވުމަށްޓަކައި ކޮން ފިޔަވަޅެއް އެޅިއްޔާތޯ އެންމެ ރަނގަޅު ވާނީ. އެހެންވީމަ އެ ގޮތުން އަޅުގަނޑު ޕީޕީއެމްގެ މެންބަރުންނަށް ގޮވާލަން ވަރަށް ރަނގަޅަށް ވިސްނާ ވަޑައިގެންފައި ގާސިމް އިބްރާހިމަށް ތިބޭފުޅުންގެ ސަޕޯޓް ދެއްވުމަށް،" ދިހަ އަހަރު ޕީޕީއެމްގައި ހުންނެވުމަށް ފަހު ބުރާސްފަތި ދުވަހުގެ އެ ޕާޓީން ވަކިވެވަޑައިގެންނެވި ރައީސް ވަހީދު ވިދާޅުވި އެވެ.

ވަހީދު މިހާރު މި ހުންނެވީ ކޮންތާކުތޯ ބައެއް މީހުން ސުވާލު ކުރައްވާ ކަމަށް ވިދާޅުވެ އެކަމަށް ވެސް ރައީސް ވަހީދު ޖަވާބު ދެއްވި އެވެ. އެމަނިކުފާނު ވިދާޅުވީ މިއަދު ހުންނެވީ ގާތް އެކުވެރިއެއްގެ އަރިހުގައި ކަމަށެވެ. އަދި ގާސިމަށް ތާއީދު ދެއްވާ އެހީތެރިވެ ދެއްވުމުގައި ދެމި ހުންނެވުމަކީ ވަރަށް ބޮޑަށް ހިތްހަމަޖެހޭ ލިބިވަޑައިގަންނަވާ ކަމެއް ކަމަށެވެ.

މިރޭގެ ޖަލްސާގައި ރައީސް ވަހީދު ވަނީ ގާސިމަށް ވަރަށް ބޮޑަށް ތައުރީފު ކުރައްވާފައެވެ. ވިދާޅުވީ މިހާރު އޮތް ހާލަތުން ގައުމު ސަލާމަތް ކުރުމަށްޓަކައި މިވަގުތު ފެންނަން ހުރި އެންމެ ވަރުގަދަ ބޭފުޅަކީ ގާސިމް ކަމަށެވެ. ރާއްޖޭގެ ދަރަނީގެ ހާލަތު އޮތީ ކަންބޮޑުވާން ޖެހޭ ހިސާބެއްގައި ކަމަށާ އެ މައްސަލަ ހައްލުކޮށް ދެވެން އޮތީ ގާސިމް އިބްރާހިމަށް އެކަނި ކަމަށް ވެސް ވިދާޅުވި އެވެ.

އަދި ޑިމޮކްރެސީ ގެނައުމަށް އެންމެ ބުރަކޮށް މަަސައްކަތް ކުރެއްވި ބޭފުޅަކީ ގާސިމް ކަމަށް ވިދާޅުވެ ގާސިމަށް ފުރުސަތު ލިބިވަޑައިގަންނަވަން މާ ބޮޑަށް ލަސްވެއްޖެ ކަމަށް ވެސް ވިދާޅުވި އެވެ.

"އަޅުގަނޑު ގަބޫލުކުރާ ގޮތުގައި މިހާރު މާ ލަސްވެސް ވެއްޖެ ގާސިމަށް ރައީސްކަން ލިބިވަޑައިގަންނަވަން،" ރައީސް ވަހީދު ވިދާޅުވި އެވެ.