ރައީސް ވަހީދު ޖުމްހޫރީ ޕާޓީއާ ގުޅިވަޑައިގަންނަވަނީ!

ކުރީގެ ރައީސް ޑރ. މުހައްމަދު ވަހީދު ހަސަން މަނިކު، ޖުމްހޫރީ ޕާޓީއާ ގުޅިވަޑައިގެން ކުރިއަށް އޮތް ރިޔާސީ އިންތިހާބުގައި އެ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމަށް ތާއީދު ކުރައްވަން ނިންމަވައިފި ކަމަށް "މި" ނޫހަށް އެނގިއްޖެ އެވެ.

ވަހީދު ރޭ ވަނީ އެމަނިކުފާނު ކުރީން ނިސްބަތްވެވަޑައިގެން ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން އިސްތިއުފާ ދެއްވައިފައެވެ.

ކުރީން ގައުމީ އިއްތިހާދުގެ ޕާޓީގެ ނަމުގައި ޕާޓީއެއް ހައްދަވާ ހިންގެވި ރައީސް ވަހީދު މިހާރު ހުންނެވީ ގާސިމްގެ ރިސޯޓް ރަށް -- ސަންއައިލެންޑް ގައި ކަަމަށް އެނގިފައިވެއެވެ. އަދި މާދަމާ ރޭ ޖޭޕީގެ ރިޔާސީ ކެމްޕެއިން ރަސްމީކޮށް ފެށުމަށް ގާސިމް ނިސްބަތްވެވަޑައިގަންނަވާ އދ. މާމިގިލީގައި ބާއްވާ ޖަލްސާގައި ރައީސް ވަހީދު ބައިވެރިވެވަޑައިގަންނަވާނެ ކަމަށް އެނގިފައިވެއެވެ. އެ ޖަލްސާގައި އެމަނިކުފާނުގެ ތާއީދު ގާސިމަށް އޮތްކަން ހާމަ ކުރެއްވުމަށް ހަމަޖެހިފައިވާ ކަމަށާ ޖުމްހޫރީ ޕާޓީއާ ގުޅިވަޑައިގަންނަވާނެ ކަަމަށް އެ ޕާޓީގެ އިސް ބޭފުޅަކު ވިދާޅުވި އެވެ.

ގާސިމް ވަނީ ރައީސް ވަހީދުގެ ތާއީދަށް ދެ ފަހަރެއްގެ މަތީން އެދިވަޑައިގެންފައެވެ. އަދި އެކަމުގެ މަޝްވަރާތައް ވެސް ހިނގި އެވެ. ރައީސް ވަހީދު ވަނީ ވިލާ ގުރޫޕްގެ ޗެއާމަން / ބާނީ ގާސިމް އިބްރާހިމްގެ ހަރަދުގައި މަތީ ތައުލީމަށް ކިޔަވަން ދަރިވަރުންނަށް ދޫކުރި ލޯނު މާފުކޮށް ދެއްވާކަން އެމަނިކުފާނު އިއުލާނު ކުރެއްވުމާއި ގުޅިގެން "މި" ނޫހުން ލިޔުނު ހަބަރެއް ވެސް ރިޓްވީޓް ކުރައްވާފައެވެ.

ނަމަވެސް އެކަމާއި ގުޅޭގޮތުން ރައީސް ވަހީދު ވަކި އެއްޗެއް ވިދާޅެއް ނުވެއެވެ. ނަމަވެސް އެހެން ޕާޓީއާ ގުޅިވަޑައިގެން ހިދުމަތް ކުރެއްވުމުގެ ޝައުގުވެރިކަން ވަހީދު ވަނީ ފާޅު ކުރައްވާފައެވެ.  އިނގިރޭސި ބަހުން ސްޓޭޓްމަންޓެއް ނެރުއްވާ ޕީޕީއެމުން ވަކިވެވަޑައިގަންނަވާކަން ހާމަ ކުރައްވަމުން ވަހީދު ވިދާޅުވި ގޮތުގައި 10 އަހަރަށް ފަހު އެ ޕާޓީއާ ދުރަށް ވަޑައިގަތުމަކީ ހިތާމަ ކުރައްވާ ކަމެކެވެ. ނަމަވެސް އެ ނިންމުން ނިންމެވީ ވަރަށް ބޮޑަށް ވިސްނެވުމަށް ފަހު ކަމަށް ވިދާޅުވި އެވެ.

ރައީސް ވަހީދުގެ އިސްތިއުފާގެ ސްޓޭޓްމަންޓްގައި ވަނީ އެމަނިކުފާނުގެ ހިދުމަތް ޕީޕީއެމް ނޫން އެހެން ޕާޓީއަކަށް ދިނުން މުހިންމު ކަމަށް ވިދާޅުވެފައެވެ. އެ ގޮތުން އެމަނިކުފާނުގެ ހުނަރާއި ތަޖުރިބާ އަދި ލިބިވަޑައިގެންފައިވާ އިލްމު ހަމަޖެހުމާއި ނަޒާހަތްތެރިކަމާއި ތެދުވެރިކަން އޮތް އެހެން މާހައުލެއްގައި ބޭނުން ކުރުން މުހިއްމު ކަމުގައި ވިދާޅުވި އެވެ. އަދި އެއީ ހުރިހާ ދިވެހިންގެ ކާމިޔާބީއަށް ޓަކައި ކުރުން މުހިންމު ކަމެއް ކަމަށް ވިދާޅުވި އެވެ.

ރައީސް ވަހީދު މިފަދަ ސްޓޭޓްމަންޓެއް ނެރުއްވާފައިވާއިރު ޕީޕީއެމުން ކެންޑިޑޭޓަކު ނުނެރުމާއި ޕީއެންސީ ފަދަ 3،000 މެންބަރުން ހިމެނޭ ޕާޓީއަކުން ކެންޑިޑޭޓަކު ނެރެފައިވުމުން އެކަމަށް ފާޑުވިދާޅުވެ ޕީޕީއެމްގެ އިދާރާއަށް ވަނީ ސިޓީއެއް ފޮނުއްވާފައެވެ.

ރައީސް ވަހީދު ޕީޕީއެމުން މި ވަކިވެވަޑައިގެންނެވީ ރައީސް ޔާމީނަށް ރިޔާސީ ރޭހުން ފުރުސަތު ލިބިވަޑައިނުގަންނަވާ ހާލަތެއްގައި ރިޔާސީ ކެންޑިޑޭޓަކަށް ވެވަޑައިގަތުމަށް ޝައުގުވެރިކަން ފާޅު ކުރައްވާފައި ވަނިކޮށެވެ. ރައީސް ޔާމީނަށް ފުރުސަތު ނެތްކަން ކަށަވަރު ވި ސުޕްރީމް ކޯޓްގެ ހުކުމް އިއްވި ދުވަހު ވެސް ވަހީދު ވަނީ އެ މޭރުމުން ވާހަކަފުޅު ދައްކަވާފައެވެ. ނަމަވެސް ޔާމީން ނިންމެވީ ޕީޕީއެމުން ކެންޑިޑޭޓަކު ނުނެރެއްވުމަށެވެ. ފަހުން މަސައްކަތް ކުރެއްވީ އިންތިހާބު ބޮއިކޮޓް ކުރެއްވުމަށެވެ.

އެކަމަކު ސެނެޓްގެ ތާއީދު އެކަމަށް ލިބިވަޑައިނުގަތުމުން ޕީއެންސީގެ ރިޔާސީ ޓިކެޓް ލިބިވަޑައިގެން ޑރ. މުހައްމަދު މުއިއްޒަށް ފުރުސަތު ދެއްވާފައެވެ.