ފެށި ހޯމް ސްޓޭ ޓޫރިޒަމް ނުފެނި ބޮޑު ފެއިލިއާއަކަށް

ހޯމް ސްޓޭ ފަށަން ސަރުކާރުން ދެއްކި ވާހަކައަކީ މި ޓޫރިޒަމް ވާނީ ރާއްޖޭގެ ޓޫރިޒަމްގެ އާ ޕްރޮޑަކްޓަކަށެވެ. އެ މަންޒަރު ދައްކަން މ. ދިއްގަރަށް ބޭރުގެ ދެ މީހަކު ގެންގޮސްގެން "ދިވެހި ޓޫރިޒަމްގެ އާ ޕްރޮޑަކްޓް" ލޯންޗް ކުރި އެވެ. ޕްރޮޑަކްޓް ތައާރަފު ކުރުމަށް ފަހު ސަރުކާރުން އޭރު ބުނި ގޮތުގައި އެ ޕްރޮޑަކްޓުގެ ސަބަބުން ރާއްޖޭގެ ގެސްޓްހައުސްތައް ބޮޑު ތަނުން ގިނަ ވެގެންދާނެ އެވެ. އެކަމަކު އޭރުވެސް އެކަމާ ޓޫރިޒަމް އިންޑަސްޓްރީގެ ތަޖުރިބާކާރުންގެ ހިޔާލު ފެނުނީ ތަފާތު ކޮށެވެ. އެ ބޭފުޅުން ވިދާޅުވަމުން ދިޔައީ ގެސްޓްހައުސް ތަކަށް އިންތިހާއަށް ގޮންޖެހުން ހުރިއިރު ހޯމް ސްޓޭ ވެގެން ދާނީ ބޮޑު މާސިންގާ ފެއިލާ އަކަށެވެ. އެކަަން ވެގެން ދިޔައީ ހަމަ އެގޮތަށެވެ. މިދިޔަ އަހަރުގެ ޖެނުއަރީގައި ފެށި ހޯމް ސްޓޭ އެއްގޮތަކަށް ވެސް ކުރިއަށްދާ ގޮތެއް ނުވެ މިހާރު އޮތީ ހުއްޓިފަ އެވެ. 

ޓޫރިޒަމް މިނިސްޓްރީން މިހާރު އާއްމުކުރާ ޓޫރިޒަމް ތަފާސް ހިސާބުތަކުގައި އެއްގޮތަކަށް ވެސް ހޯމް ސްޓޭގެ އެނދެއް ރާއްޖޭގައި ހުރި ކަމަށް ނުބުނެ އެވެ. އަދި މި ޓޫރިޒަމަށް މީހަކު އަންނަ ކަމަކަށް ވެސް އެންމެ ފަހުން އާއްމުކުރި ތަފާސް ހިސާބުތަކުން ވެސް ނުދައްކަ އެވެ. އެހެންވެ މި ޓޫރިޒަމް ހިނގައިގަންނަ ގޮތް ނުވެ ބޮޑުތަނުން ފެއިލް ވެގެން އެވަނީ ހުއްޓިފައެވެ. 

ހޯމް ސްޓޭ ހުއްޓިގެން ދިއުމުގައި ވެސް ސަބަބެއް އޮންނާނެ އެވެ. ދުނިޔޭގައި ހޯމް ސްޓޭ ކުރިއެރި ނަމަވެސް ރާއްޖޭގައި އެކަން ނުކުރެވޭނެ ސަބަބުތަކެއް ވެސް އޮންނާނެ އެވެ. 

މިކަން ފަށަން ޓޫރިޒަމް މިނިސްޓްރީ އާއި ސަރުކާރުން ދެއްކި މަންޒަކީ މިއީ ވަރަށް ފަސޭހަ ސިމްޕަލް ކަމެއް ކެމެވެ. ހަމަ ގެއެއްގެ ކޮޓަރިއެއް ހުސް ކޮށްލައިގެން މިކަން ފަށައި ގަންނަންވީ އެވެ. އެނދު ދެއްކުމާއެކު ޓޫރިސްޓުން އެތަނަކަށް އަންނާނެ އެވެ. އެކަމަކު އެކަން އެގޮތަކަށް ނުވި އެވެ، ހޯމް ސްޓޭގެ އަވާގައި ޖެހިގެން އެ ދުވަސްވަރު ގިނަ ބަޔަކު ލޯނު ނަގައިގެން ގޭގެ ކޮޓަރިތައް ވެސް ހެދި އެވެ. ބައެއް ރަށްރަށުގެ ކައުންސިލްތަކުން ވެސް އެކަން ކުރަން ހިފި އެވެ. އެކަނަކު މީހުން ގެނެވޭ ގޮތެއް ނުވި އެވެ. އެކަމުގައި މިހިސާބަށް މަސައްކަތް ކުރުމުގެ މައިގަނޑު ސަބަބަކީ ހޯމް ސްޓޭ ފެށުމަކީ އެމްޑީޕީގެ މެނިފެސްޓޯގައި ލިޔެގެން ވެރިކަމަށް އައިކަމަށް ވުމެވެ.  

ގެސްޓްހައުސްގެ ބާނީގެ ގޮތުގައި ބެލެވިފައި އޮންނަ ރައީސް މުހައްމަދު ނަޝީދު ދައްކައިގެން އެމްޑީޕީން އޭރު ހިންގި ކެމްޕޭންތަކުގެ ތެރޭގައި ހޯމް ސްޓޭ ދެއްކީ ދެން އަންނާނެ ކުރިއެރުމަށެވެ. އެމްޑީޕީގެ މެނިފެސްޓޯގައި ލިޔެފައިވާ ގޮތުން ގެސްޓްހައުސް ވިޔަފާރި އިތުރަށް ފުޅާކޮށް ރައްޔިތުންނަށް ފޯރުކޮށް ދިނުމުގެ ގޮތުން ގެސްޓްހައުސްގެ އިތުރުން އައިލެންޑް ހޮޓާތަކާއި ބުޓީކް ހޮޓާތަކާއި ހޯމް ސްޓޭ ތައާރަފު ކުރެވިގެންދާނެ އެވެ. 

މެނިފެސްޓޯގައި މިގޮތަށް އޮތަސް އަދި ހޯމް ސްޓޭ ފަށައިގަތް ނަމަވެސް ގޮންޖެހުންތަކާއެކު އެކަމެއް ނުހިނގި އެވެ. މައިގަނޑު ސަބަބަކީ މިއާއެކު ގުޅިގެން އަންނަން ޖެހޭ ކަންކަން ހިނގުން ލަސްވުމާއި ސަރުކާރުގެ ޝައުގުވެރިކަން މިކަމަށް ނެތުމެވެ. މިއާއެކު ލާމަރުކަޒީ ގާނޫނުން ކައުންސިލްތައް މެދުވެރިކޮށް ގެންނަން ޖެހޭ ބަދަލުތަކެއް ވެސް ވެއެވެ. އަދި ދަތުރުދަތުރުގެ ނިޒާމެއް ވެސް އޮންނަން ޖެހެ އެވެ. ނަމަވެސް މިކަންކަން ލަސްވުމުގެ ނަތީޖާއަކީ ހޯމް ސްޓޭ ބޮޑު ވެގެންވާ ފެއިލާއަކަށްވެ ގެއްލިގެން ދިއުމެވެ.