ސިމް ލިމިޓް: ދިވެއްސަކަށް 10 ސިމް، ބިދޭސީއަކަށް ތިން ސިމް

އެކަކަށް ސިމް ކާޑު ނެގޭނެ ލިމިޓް ކަނޑައެޅުމަށް ފަހު މޯބައިލް ފޯނުގެ ހިދުމަތް ހޯދުމަށް ބޭނުންކުރާ ފޯނު ނަންބަރު ދޫކުރުމާއި ނަންބަރު ބޭނުންކުރުމާބެހޭ ގަވާއިދު ޓެލެކޮމިއުނިކޭޝަން އޮތޯރޮޓީ އޮފް މޯލްޑިވްސް (ކޭމް) އިން އާންމު ކޮށްފި އެވެ.

ސްކޭމް ކޯލްތައް އިތުރުުވުމާއި ގުޅިގެން ސިމް ކާޑު ނެގޭނެ ލިމިޓް ކަނޑައަޅަން މަސައްކަތް ކުރާތާ ދުވަސްތަކެއް ވެއްޖެ އެވެ. މިއަދު އާންމުކުރި ގަވާއިދުގައި މޯބައިލްފޯނު ނަންބަރު ބޭނުން ކުރުމަށް ސިމްކާޑު ދޫކުރުމާއި ނަންބަރު ދޫކުރެވޭނެ އަދަދާއި ހިދުމަތަށް އެދޭ މީހާގެ މައުލޫމާތު ނެގުމާއި ނަންބަރު ރަޖިސްޓްރީ ކޮށްފައިވާ މީހާގެ މައުލޫމާތު ރައްކާކުރުމާއި ނަންބަރު ބޭނުން ކުުރުމުގައި ޒިންމާދާރުވުމާއި ސާވިސް ޕޮރޮވައިޑަރާއި ހިދުމަތް ހޯދާ މީހާއާ ދެމެދު ހެދޭ އެއްބަސްވުމާއި އިދާރީ ފިޔަވަޅު އެޅޭނެ ގޮތްވެސް ބަޔާންކޮށްފައިވެއެވެ.

ގަވާއިދު ބުނާ ގޮތުން ކޮންމެ ސާވިސް ޕްރޮވައިޑަރަކުވެސް އަމިއްލަ ފަރުދުންނަށް މޯބައިލް ފޯނުގެ ހިދުމަތް ހޯދުމަށް ބޭނުން ކުރާ ނަންބަރު ދޫކުރެވޭނީ ދެން ވަކި ލިމިޓަކާ ހަމައަށެވެ. އެ ގޮތުން ދިވެއްސަކަށް ނަމަ 10 ނަންބަރެވެ. ރާއްޖޭގައި ދިރިއުޅޭ ބިދޭސީއެއް ނުވަތަ ޓޫރިސްޓެއް ނަމަ ތިން ނަންބަރެވެ.

ބިދޭސީއެއް ނަމަ ޕާސްޕޯޓް ނަންބަރު ނުވަތަ ވާކްޕާމިޓް ނަންބަރާއި ޕާސްޕޯޓް ނުވަތަ ވާކްޕާމިޓްގެ މުއްދަތު ހަމަވާ ތާރީހު އަދި ސޮޕޮންސަރުގެ ނަމާއި ގުޅޭނެ ނަންބަރާއި ޒިންމާވާ ފަރާތުގެ ނަމާއި މަގާމު އަދި ގުޅޭނެ ނަންބަރު ހިމަނަން ޖެހެއެވެ.

ގަވާއިދު މިހާރު އޮތްގޮތުން މިގޮތަށް ނެގޭ މައުލޫމާތު ސާވިސް ޕޮރޮވައިޑަރު 10 އަހަރުގެ މުއްދަތަށް ރައްކާ ކުރަން ޖެހެއެވެ.

ގަވާއިދާ ހިލާފުވެއްޖެނަމަ ފުރަތަމަ ފަހަރު އެކަމެއް ރަނގަޅު ކުރުމަށް އެކަށީގެންވާ މުއްދަތެއް ދިނުމަށް ވަނީ ކަނޑައަޅާފައެވެ. ނަމަވެސް ދެވަނަ ފަހަރު 10،000 ރުފިޔާ އިން އަދި ދެން ގަވާއިދާ ހިލާފުވެއްޖެ ނަމަ 20،00 ރުފިޔާ އިން ޖޫރިމަނާ ކުރާނެ އެވެ.

ހަތަރުވަނަ ފަހަރަށް ވުރެ އިތުރުވާ ކޮންމެ ފަހަރަކު ބައިލައްކަ ރުފިޔާގެ ޖޫރިމަނާއެއް އަންނާނެ އެވެ.