މުއްދަތު ހަމަވެ ތިން ދުވަސް، އަދީބަށް ދިން މުއްދަތު އިތުރު ކުރަން ނުނިންމާ

ކުރީގެ ނާއިބު ރައީސް އަހްމަދު އަދީބް ސިންގަޕޫރުން ހޯއްދަވާ ފަރުވާ ނުނިމޭތީ މިހާރު ހަމަޖައްސައިދީފައިވާ މުއްދަތު އިތުރުކޮށްދޭން އެދިފައިވާތީ އެކަމާއި ގުޅިގެން އަދި ވަކި ގޮތެއް ނުނިންމާ ކަަމަށް މޯލްޑިވްސް ކަރެކްޝަނަލް ސާވިސް އިން ބުނެފި އެވެ.

އަދީބު ބޭރަށް ވަޑައިގަތުމުގެ ހުއްދަ ކަރެކަޝަނުން ދީފައި ވަނީ ރާއްޖޭގެ ފަރުވާ ދެވެން ނެތް ބަޔަކަށް ފަރުވާ ހޯއްދަވާށެވެ. އެ ހުއްދަ ލިބުމުން މި މަހުގެ 11 ވަނަ ދުވަހުގެ ރޭ އަދީބު ވަނީ ފުރާވަޑައިގެންފައެވެ. ކަރެކްޝަނުން ހުއްދަ ދިނީ 10 ދުވަހަށް ސިންގަޕޫރުގައި ހުންނެވުމަށެވެ. އެ މުއްދަތު ހަމަވިއިރު އަދީބު ރާއްޖެ ވަޑައިގެންފައެއް ނުވެއެވެ.

ކަރެކްޝަނުން މިއަދު ބުނި ގޮތުގައި ފަރުވާގެ ކަންކަން ނުނިމޭތީ މުއްދަތު އިތުރުކޮށްދޭން އަދީބު ވަނީ އެދިވަޑައިގެންފަތީ އެކަމާއި ގުޅިގެން ގޮތް ނިންމަން ބޯޑްގައި ދަނީ މަަޝްވަރާ ކުރަމުންނެވެ. ނަމަވެސް އެ ހުށައެޅުމާމެދު އަދި ގޮތް ނުނިންމާ ކަމަށް ބުންޏެވެ.

ނިންމުން ފަސް ވަނީ ކީއްވެގެންތޯ ސުވާލު ކުރުމުން އެ ސުވާލަށް ޖަވާބެއް ނުދިނެވެ. އަދީބަށް މިހާރު ދީފައިވާ 10 ދުވަހުގެ މުއްދަތު ހަމަވެ ތިން ދުވަސްވެގެން ދާއިރު މި މުއްދަތު ގުނާނީ ކިހިނެތްތޯ ސުވާލު ކުރުމުން ކަރެކްޝަންގެ އޮފިޝަލު ވިދާޅުވީ މުއްދަތު އިތުރުކޮށްދީފިނަމަ މުއްދަތު ގުނާނީ މިހާރު ހޭދަވާ މުއްދަތާ އެކު ކަމަށެވެ. އަދި މުއްދަތު އިތުރުނުކޮށްދޭން ނިންމައިފިނަމަ ވަގުތުން އަންނަން ޖެހޭނެ ކަމަށެވެ.

މީގެ ކުރިން 2019 ވަނަ އަހަރުގެ ތެރޭގައި ވެސް އަދީބަށް ވަނީ ބޭސްފަރުވާއަށް އިންޑިއާއަށް ދިއުމަށް ފުރުސަތު ދީފައެވެ. އެފަހަރު ފަރުވާ ފުރިހަމަ ކުރެއްވުމަށް ފަހު، ކަރެކްޝަންސްއިން ދިން މުއްދަތުގެ ތެރޭގައި އޭނާ އަލުން ރާއްޖެ ވަޑައިގަތެވެ.

އެމްއެމްޕީއާރުސީގެ ހިޔާނަތާ ގުޅިގެން އަދީބުގެ މައްޗަށް ދައުލަތުން ދައުވާކުރީ ހިޔާނާތްތެރިވުމުގައި ބައިވެރިވެފައިވާ ކަމަށް ބުނާ ދެ ދައުވާ އަކާއި މަގާމުގެ ނުފޫޒު ބޭނުންކޮށްގެން ނާޖާއިޒު ފައިދާ ހޯދައިދިނުމުގެ ދެ ދައުވާ އެކެވެ. މަނީ ލޯންޑަރިންގެ ދެ ދައުވާ އާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރިކަމުގެ ދައުވާއެއް ވެސް އުފުލި އެވެ. އެ މައްސަލަތައް ސާބިތުކުރުމަށް ދައުލަތުން ވަނީ އަދީބާއެކު އިއުތިރާފުގެ އެއްބަސްވުމެއް ހަދާފައެވެ.

އަދީބު އައިޖީއެމްއެޗުގައި އެޑްމިޓް ކުރުމުގެ ދެތިން ދުވަހެއް ކުރިން އިދިކޮޅު ފަރާތްތަކުން ވަނީ ސަރުކާރުން އޭނާ ބޭރަށް ފުރުވާލަން އުޅޭ ކަމަށް ބުނެ ކަންބޮޑުވުން ފާޅުކުރައްވާފައެވެ. އެންމެ ފުރަތަމަ އެވާހަކަ ދެއްކެވި އުނގޫފާރު ދާއިރާގެ މެންބަރު މުހައްމަދު ވަހީދު އޭރު ވިދާޅުވީ އަދީބު ފުރުވާލަން އުޅެނީ ސަރުކާރު ފަލީހަތް ކޮށްލަފާނެތީ ބިރުން ކަމަށެވެ.

ވިހި އަހަރުގެ ޖަލު ހުކުމެއް އޮތަސް ސިއްހީ ހާލުކޮޅު ހުރި ގޮތުން އަދީބު، ޖަލު ހުކުމް ތަންފީޒު ކުރައްވަނީ ގޭގައެވެ.