ވ. ތިނަދޫގެ އާ އިންޖީނުގެ ހުޅުވައިފި

ވ. ތިނަދޫ އާ އިންޖީނުގެ އިއްޔެ ހުޅުވައި ދެއްވައިފި އެވެ. އެ ރަށު އިންޖީނުގެ ހުޅުވައި ދެއްވީ ރައީސް އިބްރާހިމް މުހައްމަދު ސޯލިހެވެ. 

ތިނަދޫގައި ހުޅުވި އިންޖީނުގެއަކީ، އެ ރަށަށް ކުރިން ކަރަންޓުގެ ހިދުމަތް ދެމުންގެންދިޔަ އިންޖީނުގެ އާންމުން ދިރިއުޅޭ ސަރަހައްދުގައި ހުރުމުން ދުމާއި، އަޑުގެ ސަބަބުން، އެ ރަށުގެ ރައްޔިތުންނަށާއި ފަތުރުވެރިކަމުގައި ހަރަކާތްތެރިވާ ފަރާތްތަކަށާއި ފަތުރުވެރިންނަށް ވެސް ދަތިވާތީ އެޅި އިންޖީނުގެ އެކެވެ.

ސްޓެލްކޯއިން ބުނި ގޮތުގައި ތިނަދޫ އާ އިންޖީނުގެއަކީ 1.3 މެގަވޮޓްގެ ކަރަންޓު އުފެއްދުމުގެ ގާބިލްކަން ލިބިފައިވާ އަދި އަދި ކަރަންޓުގެ ޑިމާންޑާއި އެއްވަރަށް ޖަނަރޭޓަރު ސެޓް ބެހެއްޓޭގޮތަށް ފަރުމާކޮށްފައިވާ އިންޖީނުގެއެކެވެ. މީގެ އިތުރުން ތެލަށް ބަރޯސާވާ މިންވަރު ކުޑަ ކުރުމަށާއި، އިޔާދަ ކުރަނިވި ހަކަތައަށް އިސްކަންދިނުމަށް ކުރާ މަސައްކަތްތަކުގެ ތެރެއިން ތިނަދޫ އާ އިންޖީނުގޭގެ ފުރާޅުގައި ވެސް 30 ކިލޯވޮޓްގެ ސޯލާ ޕެނަލް ވަނީ ހަރުކޮށްފަ އެވެ.

ތިނަދޫއަކީ 2010 ވަނަ އަހަރު ރައްޔިތުންގެ އިންޖީނުގެތައް ސަރުކާރުން ހިންގަން ހަވާލުވާން ފެށުމާއެކު، ސްޓްލްކޯއިން ހަވާލުވި ފުރަތަމަ އިންޖީނުގެ އެވެ. ސްޓެލްކޯއިން ތިނަދޫގެ ކަރަންޓާ ހަވާލުވި އިރު ހުރީ ވަރަށް ކުޑަ، އެންމެ ޖަނަރޭޓަރެކެވެ. ނަމަވެސް އިއްޔެ އާ އިންޖީނުގެ ހުޅުވުމާ ހަމައަށް ވެސް، ބާ އިންޖީނުގޭގައި އާ ޖަނަރޭޓަރުތައް ބަހައްޓައިގެން މެދުނުކެނޑި ކަރަންޓުގެ ހިދުމަތް އެ ރަށަށް ދިނެވެ.

ތިނަދޫގައި އާ އިންޖީނުގެއެއްގެ ބިންގާ އެޅީ ސެޕްޓެމްބަރު 24، 2020 ގައެވެ.