ހިސާބުން | ހުރިހާ ގެއަކަށް ސާފު ބޯފެން ލިބޭ އެއްވެސް އަތޮޅެއް ނެތް

އެކި ސަރުކާރު ތަކުން ދިވެހި ރައްޔިތުންނަށް ސާފު ބޯފެން ދޭން ތަފާތު މަޝްރޫއުތައް ހިންގައިފި އެވެ. އެކަމަށް ބިލިއަނުން ރުފިޔާ ހަރަދު ވެސް ކޮށްފި އެވެ. އެކަމަކު ހޫނު ގަދަ މޫސުންތަކުގައި ރާއްޖޭގެ އެކި ރަށްރަށުން ފެނަށް ޖެހިގެން ސަރުކާރުގައި އާދޭސް ކުރަން ޖެހެ އެވެ. މިދިޔަ އަހަރުގެ ނިޔަލަށް ބަލާނަމަ ވެސް ރާއްޖޭގެ އަތޮޅުތަކުގެ ހުރިހާ ގެއަކަށް ސަރުކާރު ބޯފެން / ސާފު ބޯފެން ފޯރުކޮށްދެވިފައެއް ނެތެވެ. 

ދައުލަތުގެ ރަސްމީ ހިސާބުތައް ދައްކާ ގޮތުން ރާއްޖޭގައި ޖުމްލަ 94,424 ގޭބިސީ ހުންނައިރު މީގެ ތެރޭން ސާފު ބޯފެން ލިބެނީ 70,033 ގޭބިސީ އަކަށެވެ. އަދި ސާފު ބޯފެން ނުލިބޭ 24,391 ގޭބިސީއެއް އެބަހުއްޓެވެ. އެހެންވެ ބާކީ ހުރި ގޭބިސީތަކުން ބޯން / ގައިން ތާހިރުވާން ބޭނުން ކުރަނީ އެހެނިހެން ގޮތްގޮތުން ހޯދާ ފެނެވެ. މިގޮތުން ވާރޭ ފެން ނަގައިގެން ބޯން ބޭނުން ކުރާ ގޭބިސީގެ އަދަދަކީ 1,681 އެވެ. މުޅި ރާއްޖެ، މާލެ ހިމަނައިގެން ބަލާނަމަ 50,442 ގޭބިސީއެއްގެ މީހުން މިހާރު ބޯން ބޭނުން ކުރަނީ ފުޅީގައި ބަންދު ކުރި ފެނެވެ. އަދި ރާއްޖޭގެ އެކި ރަށްރަށުގައި 17,910 ގޭބިސީއަކުން ޑީސެލިނޭޓެޑް ފެން ބޭނުން ކުރެ އެވެ. 

ތަފާސް ހިސާބުތައް ދައްކާ ގޮތުގައި ހުރިހާ އަތޮޅެއްގެ ހުރިހާ ގޭބިސީތަކަށް ސާފު ބޯފެން މިވަގުތު ލިބެން ނެތް ނަމަވެސް މާލެ ހިމަނައިގެން ބަލާނަމަ މުޅި ޖުމްލަ އާބާދީ / ގޭބިސީގެ 72 ޕަސެންޓް ސާފު ބޯފެން ފޯރުކޮށް ދެވެއެވެ. ނަމަވެސް މާލެ ވަކިކޮށްލައި އަތޮޅުތައް ވަކިން ބަލާނަމަ މި ޕަސެންޓޭޖް ބޮޑުތަނުން ދައްވެ އެވެ. 

ސާފު ބޯފެނުގެ ހާލަތު މާލެ ނުލައި ރަށްތައް ވަކިން ބަލާނަމަ މިދިޔަ އަހަރުގެ ނިޔަލަށް ސާފު ބޯފެން ފޯރުކޮށް ދެވެނީ ރާއްޖޭގެ ގޭބިސީގެ 53 ޕަސެންޓަށެވެ. 

ރާއްޖޭގެ އަތޮޅުތަކުގެ ވެރިކަން ކުރާ ރަށްތަކުގައި ޖުމްލަ 47,888 ގޭބިސީ ހުންނައިރު މީގެ ތެރޭން ސަރުކާރުން އަޅާފައިވާ ފެނުގެ ނިޒާމުން ސާފު ބޯފެން ލިބެނީ 23,822 ގެއަށެވެ. އަދި  24,066 ގޭބިސީ އަށް ސާފު ބޯފެނެއް ނުލިބެ އެވެ. ވާރޭ ފެން ބޭނުން ކުރާ ގޭބިސީތަކުގެ އަދަދަކީ 1,642 އެވެ. އަދި ޑީސެލިނޭޓެޑް ފެން ބޭނުންކުރާ އާބާދީއަކީ 6376 އެވެ. އަތޮޅުތަކުގެ ވެރިރަށްތަކުގައި 6376 ގޭބިސީއަކުން ބޮނީ ފުޅީގެ ފެނެ އެވެ. އަދި ރައްކާތެރި / ސާފު ބޯފެން ލިބެނީ ވެރިރަށްތަކުގެ އާބާދީގެ 49.7 ޕަސެންޓަށެވެ. 

ހިސާބުތައް ދައްކާ ގޮތުގައި ރާއްޖޭގެ 20 އަތޮޅުގެ ތެރޭން ސާފު ބޯފެން ހުރިހާ ރަށްރަަށް ލިބޭ އެންމެ އަތޮޅެއް ވެސް ނެތެވެ. މިގޮތުން ބޯފެނުގެ ހާލަތު އެންމެ ގޯސް ކަމަށް ދައްކަނީ ނިލަންދެއަތޮޅު ނުވަތަ ފ. އަތޮޅެވެ. އެ އަތޮޅުގައި 860 ގޭބިސީ ހުރިއިރު ސާފު ބޯފެން ލިބެން ހުރީ އެންމެ 227 ގޭބިސީއެއްގަ އެވެ. އަދި 633 ގޭބިސީއަށް ސާފު ބޯފެނެއް ނުލިބެ އެވެ. މި އަތޮޅުގެ 41 ގޭބިސީއަކުން ބޯން ބޭނުން ކުރަނީ ވާރޭ ފެނެ އެވެ. އަދި ހަތަރު ގޭބިސީއަކުން ޑީސެލިނޭޑެޓް ފެން ބޭނުން ކުރާއިރު  182 ގެއަކުން ފެން ބޮނީ ޕްލާސްޓިކް ފެން ގަނެގެން ޕްލާސްޓިކް ފުޅީގަ އެވެ. މި އަތޮޅުގެ ރަށްރަށުގެ ގޭގޭގެ ތެރޭން ސާފު ބޯފެން ލިބެނީ  26.4 ޕަސެންޓަށެވެ. 

ފާފު ނަގާފަ ފެން ފެނުގެ ހާލަތު މިދިޔަ އަހަރާ ހަމައަށް ބަލާނަމަ އެންމެ ގޯސްކޮށް އޮތް ކަމަށް ދައްކަނީ ށ. އަތޮޅުގަ އެވެ. އެ އަތޮޅުގެ 2,816 ގޭބިސީގެ ތެރޭން ސާފު ބޯފެން ލިބެނީ އެންމެ 973 ގޭބިސީއެއްގަ އެވެ. އަދި 1,843 ގޭބިސީއެއްގައި ބޭނުން ކުރަނީ ރައްކާތެރި ނޫން ފެނެ އެވެ. އަދި 114 ގޭބިސީއެއްގައި ވާރޭ ފެން ބޭނުން ކުރެެ އެވެ. މީގެ އިތުރުން  702 ގޭއެއްގައި ބޭނުން ކުރަނީ ފެން ފުޅި އެވެ. 

ރާއްޖޭގެ އާބާދީގެ ބޮޑު ޕަސެންޓެއް ދިރިއުޅޭ މާލޭގެ 42,571 ގޭބިސީގެ ތެރޭން 15 ގޭބިސީއެއްގައި ބޯން ބޭނުން ކުރަނީ ވާރޭ ފެނެވެ. އަދި މާލޭގައި 9,950 ގޭބިސީއެއްގައި ޑިސެލިނޭޓެންޑް ފެން ބޮ އެވެ. މާލޭގެ 32,577 ގޭބިސީގައި ބޯން ބޭނުން ކުރަނީ ފުޅީގެ ފެނެ އެވެ. މާލެ އާބާދީގެ 99.9 ޕަސެންޓް މީހުންނަށް ސާފު ބޯފެން ލިބެން ހުރެ އެވެ.