ދޫނި ބޭރު ކުރަން އުޅުނު ދިވެހި މީހާ މިލިއަނުން ރިޝްވަތު ދީގެން ތައިލެންޑުން ފިލައިފި

ހިމާޔަތް ކޮށްފައިވާ ދޫނިތަކެއް ތައިލެންޑުން ވަގަށް ބޭރު ކުރަން އުޅެނިކޮށް އެ ގައުމުގައި ހައްޔަރު ކުރި ދިވެހި މީހާ ފިލައިގެން ރާއްޖެ އަތުވެއްޖެކަން "މި" ނޫހަށް ކަށަވަރު ވެއްޖެ އެވެ. 

އޭނާ ތައިލެންޑުން ފިލާފައިވާއިރު އެ މައްސަލާގައި އެ މީީހާއާ މެދު ފިޔަވަޅު އެޅުމަށް ތައިލެންޑްގެ ޑިޕާޓްމަންޓް އޮފް ނޭޝަނަލް ޕާކް، ވައިލްޑްލައިފް އަދި ޕްލާންޓް ކޮންސަވޭޝަން (ޑީއެންޕީ) ވަނީ ފުލުހަށް ގިނަ ހެކިތަކެއް ހުށަހަޅާފަ އެވެ. އަދި އޭނާގެ މައްޗަށް މައްސަލަ ހިނގޭނެ ގޮތްތައް ހޯދައި އޭނާ ހައްޔަރު ކުރަން ކުރަންޖެހޭ ކަންކަން ތައިލެންޑްގެ އިދާރާތަކުން ވަނީ ފަށާފަ އެވެ. އެ މަސައްކަތް ކުރާއިރު އޭނާ ފިލައި މިހާރު ހުރި ރާއްޖޭގައި ތައިލެންޑްގެ އިދާރާތަކަށް އެނގެ އެވެ. 

"މި" ނޫހަށް ކަށަވަރުވެފައިވާ ގޮތުގައި އަދި އޭނާ ފިލައިގެން ރާއްޖެ އައީ ފުލުސް އޮފިސަރަކާއި އިމިގްރޭޝަނުގެ މުވައްޒަފުންތަކަކަށް ދެ މިލިއަން ތައި ބާތު (ގާތްގަނޑަކަށް 900،000ރ.) ރިޝްވަތުގެ ގޮތުގައި ދީގެނެވެ. އެ މީހާގެ ޕާސްޕޯޓްގައި ތައްގަނޑު ޖެއްސުމަށް 11،000 އެމެރިކާ ޑަލަރު ރިޝްވަތަށް ދީފައި ވެއެވެ. ތައިލެންޑުން "މި" ނޫހަށް މައުލޫމާތު ދެއްވި ކަންކަން އެނގޭ ބޭފުޅަކު ވިދާޅުވި ގޮތުގައި "ދިވެހިރާއްޖޭގެ އެ މީހާ ތައިލެންޑްގައި ލޭބަލްކޮށްފައި ވަނީ ގޭންގް ސްޓާރެއް"ގެ ގޮތުގަ އެވެ. އަދި އޭނާ ހޯދަން އިންޓަޕޯލުން ވަރަށް އަވަހަށް އިއުލާން ކުރާނެ އެވެ. 

ދިވެހި މީހާއާ ގުޅުންހުރި އެހެން ދިވެއްސަކާއި އޭނާ ރިޝްވަތު ދިން މީހުންގެ މައްސަލަތައް ވެސް ތައިލެންޑްގެ ފުލުހުން ގެންދަނީ ބަލަމުންނެވެ.

އޭރު ތައިލެންޑްގެ ޑީއެންޕީއާ ހަވާލާދީ "ބެންކޮކް ޕޯސްޓް" ގައި ބުނެފައި އޮތީ ދިވެހި މީހާގެ ލަގެޖުން ފެނުނީ، "ބްލެކް ހޯކް" އާއި "ބަފީ ފިޝް އައުލް" އާއި "ބެއާޑް އީގަލް އައުލް" ފަދަ ދޫނިތައް ކަމަށެވެ. އެ އެއްޗެހީގެ އަގު ގާތްގަނޑަކަށް 45،099ރ. އަަށް އަރަ އެވެ.

މި އަހަރުގެ މާރިޗް މަހުގެ ތެރޭގައި ވެސް، މަނާ ދިރޭ ތަކެތި ތައިލެންޑުން ބޭރުކުރަން އުޅެނިކޮށް ދިވެހިންގެ ބަޔަކު ހުއްޓުވި އެވެ. ނަމަވެސް ފަހުން އެ މީހުން ދޫކޮށްލި އެވެ.