އިންޑިއާއިން ހިންގައިދޭ އަށް ޕްރޮޖެކްޓަކަށް ފައިސާ ދޫކޮށްފި

އަވަށްޓެރި އިންޑިއާ ސަރުކާރުން ރާއްޖޭގައި ހިންގައިދޭ ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓްސް (އެޗްއައިސީޑީޕީ) ގައި އިތުރު އަށް ޕްރޮޖެކްޓަކަށް މޯބިލައިޒޭޝަން އެޑްވާންސްގެ ގޮތުގައި އިންޑިއާ ސަރުކާރުން އިއްޔެ 3.5 މިލިއަން ރުފިޔާ ދޫކޮށްފި އެވެ. 

މިއީ މި ޕްރޮޖެކްޓގެ ދެވަނަ ފިޔަވައްސެވެ. 

މި ޕްރޮޖެކްޓަކީ ރާއްޖޭގެ އެކި ރަށްރަށުގައި މައިގަނޑު ގޮތެއްގައި އުމްރާނީ ތަރައްގީއަށް ހިންގާ ކޮމިއުނިޓީ އޮރިއެންޓެޑް ޕްރޮޖެކްޓްތައް ހިންގަން 100 މިލިއަން ރުފިޔާގެ ހިލޭ އެހީ ދޭން ޖެނުއަރީ 18، 2023 އިންޑިއާއާ ރާއްޖެއާ ދެމެދު ސޮއިކޮށް ފެށި ޕްރޮޖެކްޓެކެވެ. 

އިންޑިއާ ހައިކޮމިޝަނުން "މި" ނޫހަށް ފޮނުވި ލިޔުމެއްގައި ބުނާ ގޮތުން މި މަޝްރޫއުތަކުގެ ފައިދާ ސީދާ ދިވެހި މުޖުތަމައަށް ކުރާނެ އެވެ. 

އިންޑިއާ ހައިކޮމިޝަނުން ބުނީ ރާއްޖޭގައި ކޮމިއުނިޓީ ޑިވެލޮޕްމަންޓް ޕްރޮޖެކްޓްތައް ހިންގަން އިންޑިއާއިން ޖުމްލަ 361 މިލިއަން ރުފިޔާގެ ހިލޭ ކަނޑައަޅާފައިވާ ކަމަށާއި މިވަގުތު ވެސް ރާއްޖޭގެ ފޮރިން މިނިސްޓަރީ އާއި އެހެން މިނިސްޓަރީތަކާއި އަތޮޅު ކައުންސިލްތަކާ ގުޅިގެން ރާއްޖޭގެ 20 އަތޮޅެއްގައި 56 މަޝްރޫއެއް ހިންގާ ކަމަށެވެ. 

އަދި ބުނީ އެ 56 މަޝްރޫއުގެ ތެރޭގައި ހިމެނެނީ ކުޅިވަރާއި، ތައުލީމާއި ސިއްހީ ދާއިރާއާ މަދަނީ ވަސީލަތްތަކާއި މަސްވެރިކަމާއި ފަތުރުވެރިކަމާއި ސަގާފީ ދާއިރާ ފަދަ ދިވެހިންނާ ވަރަށް ގާތް ދާއިރާތައް ކަމަށެވެ.

އިންޑިއާއިން ހިންގައި އެ މަޝްރޫއުތަކުގެ ތެރެއިން ތެރެއިން 26 މަޝްރޫއެއްގެ މަސައްކަތް މިހާރު ނިމިފައި ވެއެވެ. އަދި ހަ މަޝްރޫއެއް ވަނީ ނިމުމާ ކައިރީގަ އެވެ.