މަޖިލީސް ހުއްޓުވީ ނަޝީދު: ސަރުކާރު
މިއުވާން މުހައްމަދު މިއަދު ވިދާޅުވީ މަޖިލީސް ބަންދު ކުރީ ވެސް އަދި މިއަދު ޖަލްސާ ބޭއްވީ ވެސް ނަޝީދު ބޭނުންފުޅު ވެގެން ކަމަށެވެ. އެކަމުގައި ސަރުކާރުގެ އެއްވެސް ބައިވެރިވުމެއް ނެތް ކަމަށް އޭނާ ވިދާޅުވި އެވެ.
ރައްޔިތުންގެ މަޖިލީސް ހުއްޓުވީ ސަރުކާރުން ކަމަށް ދައްކާ ވާހަކަތައް ދޮގުކޮށް، އެކަން ކުރީ މަޖިލީހުގެ ރައީސް މުހައްމަދު ނަޝީދު ކަމަށް ސަރުކާރުން ބުނެފި އެވެ.
އިދިކޮޅު ޕާޓީތަކުން ބުނަމުން ދަނީ މަޖިލީހުގައި ތަޅު އެޅުވީ މަޖިލީހަށް ހުށަހަޅާފައިވާ މުހިންމު މައްސަލަތައް ހުއްޓުވާފައި ބޭއްވުމަށް ސަރުކާރުން އެދިގެން ކަމަށެވެ. އެއީ ބަންޑާރަނައިބް އިވްރާހިމް ރިފްއަތާއި ފޮރިން މިނިސްޓަރު އަބްދުﷲ ޝާހިދުގެ އިތުބާރު ނެތް ކަމުގެ މައްސަލަ ކުރިއަށް ގެންދިޔަ ނުދިނުމަށް ކަމަށެވެ. އަދި ރިޔާސީ ކެމްޕެއިންގައި ސަރުކާރުން ހިންގާ ޖަރީމާތަކުގެ ވާހަކަ ދެއްކުން ހުއްޓުވުމަށް ކަމަށެވެ.
އެ ވާހަކަތަކަށް ރައްދު ދެއްވާ ސަރުކާރުގެ ތަރުޖަމާނު މިއުވާން މުހައްމަދު މިއަދު ވިދާޅުވީ މަޖިލީސް ބަންދު ކުރީ ވެސް އަދި މިއަދު ޖަލްސާ ބޭއްވީ ވެސް ނަޝީދު ބޭނުންފުޅު ވެގެން ކަމަށެވެ. އެކަމުގައި ސަރުކާރުގެ އެއްވެސް ބައިވެރިވުމެއް ނެތް ކަމަށް އޭނާ ވިދާޅުވި އެވެ.
"ރައްޔިތުންގެ މަޖިލީހުގެ ޖަލްސާ ރައީސް ނަޝީދު ބޭނުންފުޅުވީމަ އެ ބޭއްވުނީ ނޫންތޯ؟ އެއްވެސް އިދާރާއަކުން އެއްވެސް މީހަކު އެއްވެސް ކަމެއް ނުކުރޭނޫންތޯ އިތުރަކަށް. ހަމަ ރައީސް ނަޝީދު ބޭނުންފުޅުވީމަ އެއޮތީ ބޭއްވިފަ. މީގެ ކުރީގެ ދެ ޖަލްސާ ވެސް އެމަނިކުފާނު ބޭނުންފުޅުނަމަ ބޭއްވުމުގެ ފުރުސަތު އޮންނާނެކަން ނޫންތޯ އެނގިގެން އެދިޔައީ،" މިއުވާން ވިދާޅުވި އެވެ.
މިއުވާން ވިދާޅުވި ގޮތުގައި މަޖިލީހުގެ އެޖެންޑާ ކޮންމެ ގޮތަކަށް ކުރިއަށް ގެންދިއުމުގެ ބާރު ވެސް އޮތީ ނަޝީދުގެ އަތްޕުޅުގައި އެވެ. ޑިމޮކްރެޓިކް އުސޫލުން ހިންގާ ގައުމުތަކުގައި ގާނޫނު ހަދާ މަޖިލީސް ބަންދުކޮށްފައި މިގޮތަށް ނުބޭއްވޭނެ ކަމަށް ވިދާޅުވި އެވެ. އަދި ގާނޫނުއަސާސީ އާއި މަޖިލީސް ގަވާއިދުގެ އިތުރުން އެމްޑީޕީގެ ޕީޖީ ގްރޫޕާއި ދިވެހި ރައްޔިތުން ވެސް ދައްކަމުން އައީ އެ ވާހަކަ ކަމަށް އޭނާ ވިދާޅުވި އެވެ.
މަޖިލީހަކީ ދައުލަތުގެ އެއް ބާރުކަން ފާހަގަ ކުރައްވާ އެބާރު ހިނގާ ނުހިނގާ ގޮތް ރައީސް ބައްލަވަމުން ގެންދަވާނެ ކަމަށް ވެސް މިއުވާން ވިދާޅުވި އެވެ. މިދިޔަ ހަފްތާ އެމްޑީޕީގެ ޕީޖީ ގްރޫޕާ ރައީސް ބައްދަލުކުރައްވާ މަޝްވަރާ ކުރެއްވިކަން ވެސް މިއުވާން ފާހަގަކުރެއްވި އެވެ.
"މަޖިލީސް ހުއްޓިފަ އޮތީ އެމަނިކުފާނުގެ އިތުބާރު ނެތް ކަމަށް ރައްޔިތުންގެ މަޖިލީހުގެ އަގުލަބިއްޔަތުން ސޮއިކުރެއްވުމުން ކަމަށް ގަބޫލުކުރައްވާނަމަ މަޖިލީހުގެ ރައީސް ކަމުން ރައީސް ނަޝީދު ހަމަ އިސްތިއުފާ ދެއްވާފަ ނަމަވެސް ގާނޫނު ހަދާ މަޖިލީސް ހިނގަން ޖެހޭނެ،" މިއުވާން ވިދާޅުވި އެވެ.
މަޖިލީސް ބަންދުކުރުމުން، ސަރުކާރަށް ވުރެ ބޮޑަށް އެކަމުގެ ގެއްލުން ލިބޭނީ ދިވެހި ރައްޔިތުންނަށް ކަމަށް ވެސް މިއުވާން ވިދާޅުވި އެވެ.
ވޭތުވެދިޔަ ދެ ދުވަހު މަޖިލީސް ބަންދުކޮށްފައި ބޭއްވުމަށްފަހު މިއަދު ނަޝީދު ވަނީ ރިޔާސަތާ ހަވާލުވެވަޑައިގެން މަޖިލީސް ހުޅުވާފަ އެވެ. މިއަދުގެ ޖަލްސާއަށްފަހު މަޖިލީސް ޗުއްޓީއަށް ދާނެކަން ވެސް ނަޝީދު ވަނީ އިއުލާނުކުރައްވާފަ އެވެ.
ކޮމެންޓް
Republic of Maldives