ޓޫރިސްޓަކު ރޭޕްކުރުން: މީހަކު ހައްޔަރެއް ނުކުރޭ، މަޑުކުރަނީ ނަތީޖާއަށް

ރާއްޖޭގެ ރިސޯޓެއްގައި ޗައިނާ ޓޫރިސްޓަކު ރޭޕްކުރި މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައި ނުވާ ކަމަށް ދިވެހި ފުލުހުންގެ ހިދުމަތުން ބުނެފި އެވެ.

ޓޫރިސްޓް ރޭޕްކުރި ކަމަށް ބުނެ ހުށައަޅާފައިވާ މައްސަލައާ ގުޅިގެން ފުލުހުން ހިންގާ ތަހުގީގުގެ މައުލޫމާތު ސާފުކޮށްދީ ފުލުހުން ދެންމެ ވަނީ އިނގިރޭސި ބަހުން ބަޔާނެއް ނެރެފައެވެ. އެ ބަޔާނުގައި ރޭޕްގެ ތުހުމަތު ކުރެވޭ އެ މައްސަލަ ވަރަށް ސީރިއަސް މައްސަލައެއް ގޮތުގައި ބަލަމުންދާ ކަމުގެ ޔަގީންކަން ދީފައިވެއެވެ.

ފުލުހުންގެ ބަޔާނުގައި ބުނެފައިވަނީ މައްސަލައާ ގުޅިގެން އަނިޔާ ލިބުނު މީހާ އާއި ރޭޕްގެ ތުހުމަތު އޮތް މީހާގެ ސާމްޕަލް ނަގާފައިވާ ކަމަށެވެ. އެ ސާމްޕަލްތަކުގެ ނަތީޖާ އަދި ނުލިބޭ ކަން ފާހަގަކޮށް މިވަގުތު މަޑުކޮށް ތިބީ ސާމްޕަލް ތަކުގެ ނަތީޖާއަށް ކަަމަށް ބުނެފައިވެއެވެ.

މައްސަލައާ ގުޅިގެން މީހަކު ހައްޔަރުކޮށްފައި ނުވިޔަސް ތަހުގީގު ފުރިހަމައަށް ގެންދާނެ ކަމުގެ ޔަގީންކަން ދީފައިވެއެވެ. އަދި ތަހުގީގުގެ މައުލޫމާތު ހާމަ ކުރަމުން ގެންދާނެ ކަމަށްވެސް ބުނެފައިވެއެވެ.

އަންހެން މީހާ ރޭޕްކުރި ކަމަށް ބުނާ މައްސަލައަކީ ރާއްޖޭގެ ޓޫރިޒަމަށް އޭގެން ވަރަށް ބޮޑު ނޭދެވޭ އަސަރެއް ކޮށްފާނެ ކަމެކެވެ.

ޗައިނާ މާކެޓަކީ ރާއްޖޭގެ ފަސްވަނަ އަށް މިވަގުތުގެ އެންމެ ބޮޑު މާކެޓެވެ. ޓޫރިޒަމް ނަމްބަރު ހިފެހެއްޓުމުގައި މި މާކެޓުގެ މުހިންމުކަން އިންތިހާ މި ދުވަސްވަރު ބޮޑެވެ. އަނެއްކާ މި މާކެޓަކީ ރާއްޖޭގެ ވާދަވެރިން ދިވެހިންގެ އަތުން "ހޯދަން" އެންމެ ބޭނުންވާ އެއް މާކެޓެވެ. ރާއްޖެއާ ގާތުން ބަލާނަމަ ސްރީލަންކާ އަބަދު ކަޅި އަޅަނީ މި މާކެޓަަށެވެ. ޓޫރިޒަމް ގިނަ ރިސޯޓުތަކުގެ އޮކިއުޕެންސީ ދަށްކޮށް އޮތް ދުވަސްވަރެއްގައި މި ފަދަ ވާހަކައެއް ފެތުރުމަކީ ރާއްޖެއާ މެދު ޓޫރިސްޓުންގެ އިތުބާރު ގެއްލިގެންދާ ކަމެކެވެ.