ފުރަތަމަ ފަހަރަށް ސިޓީ ޗެމްޕިއަންސް ލީގް ކާމިޔާބުކޮށްފި

އިނގިރޭސި ވިލާތުގެ މެންޗެސްޓާ ސިޓީން ފުރަތަމަ ފަހަރަށް ޔުއެފްއާ ޗެމްޕިއަންސް ލީގު ކާމިޔާބު ކޮށްފި އެވެ.    

ރޭ ޗެމްޕިއަންސް ލީގުގެ ފައިނަލް ސިޓީން އިޓަލީގެ އިންޓަ މިލާން ބަލިކޮށް ތާރީހީ ކާމިޔާބު ހޯދާފައި ވަނީ 0-1 ގެ ނަތީޖާއަކުންނެވެ. 

ތުރުކީގެ އިސްތަންބޫލުގައި ހޯދި މި ކާމިޔާބީއާއެކު އެއް ސީޒަނެއްގައި ސިޓީއަށް ތިން ތަށި ހޯދުނީ އެވެ. މިއީ 1999 ވަނަ އަހަރު ވާދަވެރި މެންޗެސްޓާ ޔުނައިޓެޑުން ހެދި ރެކޯޑަށް 24 އަހަރު ފަހުން އެ ރިކޯޑް ސިޓީން ހެދުމެވެ. 

އިންޓައާ ވާދަކުރި ފައިނަލުގައި ސިޓީން ވަނީ މެޗްގެ ކޮންޓްރޯލު އަތުލައިގެން ގިނަ އިރު ކުޅެފައެވެ. ނަމަވެސް ގޯލެއް ޖަހާނެ ފުރުސަތުތައް ތަނަވަސް ކުރަން އިންޓައިން ވަނީ ބުރަކޮށް މަސައްކަތްކޮށްފަ އެވެ. އެގޮތުން ފުރަތަމަ ހާފުގައި ދެ ޓީމަށްވެސް ލަނޑު ޖަހަން ލިބުނެވެ.

ސިޓީގެ ގޯލް އައީ ރޮޑްރީގެ ފަރާތުންނެވެ. ދެވަނަ ހާފު ފަށައިގެން މެޗުގެ 68 ވަނަ މިނެޓުގައި އޭނާ ގޯލު ޖެހީ ޕެނަލްޓީ އޭރިޔާ ރޮނގު މަތިން ގޯލަށް ބޯޅަ ވައްދާލައިގެނެވެ. އޭގެ ފަހުން އިންޓައިން ރަނގަޅަށް ކުޅެގަތެވެ. އަދި ގިނަ ހަމަލާތަކެއް ގޯލަށް އަމާޒުވެސް ކުރި އެވެ. އެންމެ ފަހި ފުރުސަތެއް ލައްވާލީ މެޗުގެ 88 ވަނަ މެނެޓުގައި އިންޓަގެ ލުކަކޫއަށެވެ. ނަމަވެސް މެޗުގައި ގިނަ ހަމަލާތައް ދިފާއު ކުރި ސިޓީ ކީޕަރު ވަނީ އެ ބޯޅަ ދިފާއުކޮށްފަ އެވެ.

ރޭގެ ފައިނަލްގެ ފުރަތަމަ ހާފުގައި ސިޓީގެ ޕްލޭމޭކަރު ކެވިން ޑިބުރޫނޭއަށް އަނިޔާވުމާއެކު ވަނީ ބަދަލު ކޮށްފައެވެ. މިއީ ޗެމްޕިއަންސްލީގް ފައިނަލްގައި ޑިބްރޫނޭ އަށް އަނިޔާ ވެގެން ބަދަލު ކުރަން ޖެހުނު ދެވަނަ ފައިނަލެވެ.