ސިޓީ ކުރިޔަށް، ޓޮޓެންހަމް ފަހަތަށް

އިނގިރޭސި ޕްރިމިއާ ލީގުގައި ރޭ ބްރެންޓްފޯޑް އަތުން 2-0 އިން މޮޅުވެ، މެންޗެސްޓާ ސިޓީން އެއް ވަނައިގައި ލީޑު ފުޅާ ކުރިއިރު، ސައުތެމްޓަނުން ގަދަ ހަތަރެއްގެ ރޭހުގައި މުހިންމު މެޗަކަށް ނުކުތް ޓޮޓެންހަމް ހޮޓްސްޕާސް 3-2 އިން ބަލިކޮށްފި އެވެ.

މި މޮޅާ އެކު ސިޓީން ވަނީ ލީގުގެ ކުރީގައި 12 ޕޮއިންޓަށް ލީޑުފުޅާކޮށްފަ އެވެ. އެއީ ދެ ވަނައިގައި އޮތް ލިވަޕޫލަށް ވުރެ ދެ މެޗު އިތުރަށް ކުޅެގެންނެވެ. ސިޓީ އަށް 60 ޕޮއިންޓް ލިބިފައިވަނީ 24 މެޗު ކުޅެގެންނެވެ. ލިވަޕޫލުން 22 މެޗުން 48 ޕޮއިންޓް ހޯދާފައިވާއިރު، މި ވަގުތު ކްލަބް ވޯލްޑް ކަޕް ކުޅެން ޔޫއޭއީގައި ތިބި ޗެލްސީ އަށް 24 މެޗުން ވަނީ 47 ޕޮއިންޓް ލިބިފަ އެވެ. ލިވަޕޫލް މިރޭ އަމިއްލަ ދަނޑުގައި ލެސްޓާ ސިޓީއާ ކުޅޭނެ އެވެ.

ބްރެންޓްފޯޑުން ސިޓީ އަށް އުނދަގޫތަކެއް ކުރިިމަތި ކުރުވި ރޭގެ މެޗުގައި ސިޓީން 40 ވަނަ މިނިޓްގައި ލީޑުނެގީ ރިޔާދު މާރޭޒް ޖެހި ޕެނަލްޓީންނެވެ. ސިޓީ އަށް މި ޕެނަލްޓީ ދޭން ނިންމީ ބްރެންޓްފޯޑް އޭރިއާތެރެއިން އެ ޓީމުގެ މެޑްސް ރޯސްލޭވް ސިޓީގެ ރަހީމް ސްޓާލިން އަށް ފައުލު ކުރުމުންނެވެ.

މެޗުގައި ސިޓީން ޖެހި ދެ ވަނަ ގޯލު ކާމިޔާބުކުރީ 69 ވަނަ މިނިޓްގަ އެވެ. މި ގޯލު ޖެހީ ކެވިން ޑިބްރޭނާ އެވެ. ސިޓީން އުފެއްދި އެޓޭކެއްގައި އޭރިއާތެރެއިން ބްރެންޓްފޯޑްގެ ކީޕަރު ޑޭވިޑް ރާޔާ އަތުގައި ޖެހިފައި ނުކުތް ވަގުތު ޑި ބްރޭނާ ވަނީ ތިރިތިރިން ގޯލުގެ ތެރެއަށް ބޯޅަ ފޮނުވާލައިފަ އެވެ.

ސިިޓީގެ ކޯޗު ޕެޕް ގާޑިއޯލާ ބުނީ ޕްރިމިއާ ލީގުގެ މި ފަހަރުގެ "ޗެމްޕިއަނުންނަކީ ސިޓީ ކަމަށް" ބުނެ، ދައްކާ ވާހަކަ އަށް އޭނާ ސަމާލުކަމެއް ނުދޭނެ ކަމަށެވެ. އަދި މި ވަގުތު ފޯކަސް އަކީ ކުރިމަތީގައި އޮތް މެޗުން މޮޅުވެވޭނެ ގޮތްތަކަށް ވިސްނުން ކަމަށް ގާޑިއޯލާ ބުނެފައިވެ އެވެ.

ޓޮޓެންހަމުން ރޭ ލީޑުނެގީ 18 ވަނަ މިނިޓްގައި ސައުތެމްޓަނަށް ކުޅޭ ޕޮލެންޑްގެ ޑިފެންޑަރު ޔެން ބެޑްނަރެކް ހެދި ގޯހެއްގައި، އޭނާ އަތުން ބައިކޮޅަށް ވަން ގޯލަކުންނެވެ. އޭގެ ފަސް މިނިޓް ފަހުން ސައުތެމްޓަންގެ ފޯވާޑް އަރްމާންޑޯ ބްރޯޖާ ވަނީ އެ ޓީމަށް އެއްވަރުކޮށްދީފަ އެވެ. ބްރޯޖާ މި ގޯލު ޖަހަން ފުރުސަތު ތަނަވަަސްކޮށްދިން ވާތު ބެކް ރޯމެއިން ޕެރޯ ވަނީ ސައުތެމްޓަނަށް ލީޑުނަގައިދިނުމާ ގާތަށް ޖެހިލައިފަ އެވެ. އޭރިއާބޭރުން ޕެރޯ ޖެހި ބޯޅަ އަމާޒުވީ ގޯލުގެ ދަނޑިއަށެވެ.

ދެ ވަނަ ހާފްގައި ފުލުފުލުގައި ގިނަ އެޓޭކްތަކެއް ފެނިގެންދިޔައިރު، ޓޮޓެންހަމް އިން މެޗުގެ 70 ވަނަ މިނިޓްގައިވަނީ އަލުން ލީޑުނަގައިފަ އެވެ. ލޫކަސް މޯރާ ހުސްކޮށްލާފައި ދިން ބޯޅަ އޭރިއާތެރެއިން ސޮން ހެއުން މިން ވަނީ ގޯލުގެ ތެރެއަށް ބޯޅަ ފޮނުވާލައިފަ އެވެ.

ސައުތެމްޓަން އިން ނަތީޖާ އެ ޓީމު ކޮޅަށް އަނބުރާލީ ތިން މިނިޓް ތެރޭ ދެ ގޯލު ޖަހައިގެންނެވެ. މެޗުގެ 79 ވަނަ މިނިޓްގައި ސައުތެމްޓަނަށް އެއްވަރުކޮށްދިނީ ޖޭމްސް ވޯޑް ޕްރައުސް ދިން ބޯޅަ އަކުން މުހައްމަދު އެލްޔޫނެސީ ބޮލުން ޖެހި ގޯލުންނެވެ. އޭގެ ތިން މިނިޓް ފަހުން 82 ވަނަ މިނިޓްގައި ވޯޑް ޕްރައުސް ނަގައިދިން ހުރަހަކުން ސައުތެމްޓަން މޮޅުކޮށްދިން ގޯލު ޖެހީ ޗޭ އެޑަމްސް އެވެ. މިއީ ވެސް ބޮލުން ކާމިޔާބުކުރި ގޯލެކެވެ.

ޓޮޓެންހަމް ރޭގެ މެޗުން ބަލިވުމުން ގަދަ ހަތަރެއްގެ ރޭހުގައި އެ ޓީމަށް ވަނީ އުނދަގޫތަކެއް ކުރިމަތިވެފަ އެވެ. ޓޮޓެންހަމް މި ވަގުތު ހަތް ވަނައިގައި އޮތީ ހަ ވަނައިގައި އޮތް އާސެނަލާ އެއްވަރަށް ޕޮއިންޓް ހޯދައިގެންނެވެ. ހަތް ވަނައިގައި އޮތް ޓޮޓެންހަމާއި ހަ ވަނައިގައި އޮތް އާސެނަލަށް 21 މެޗުން 36 ޕޮއިންޓް ލިބިފައިވާއިރު، ފަސް ވަނައިގައި މެންޗެސްޓާ ޔުނައިޓެޑް އޮތީ 23 މެޗުން 39 ޕޮއިންޓާ އެކު އެވެ. ހަތަރެއްގައި އޮތް ވެސްޓް ހޭމް ޔުނައިޓެޑަށް 24 މެޗުން ވަނީ 40 ޕޮއިންޓް ލިބިފަ އެވެ.

ފިލިއްޕޭ ކުޓީނިއޯ އެއް ގޯލު ޖެހުމަށް ފަހު ދެ ގޯލު ޖަހަން ފުރުސަތު ތަނަވަސްކޮށްދިން މެޗުގައި ރޭ އޭނާ ކުޅެމުން އަންނަ އެސްޓަން ވިލާ ވަނީ 3-3 އިން ލީޑްސް ޔުނައިޓެޑާ އެއްވަރުވެފަ އެވެ. ކުޓީނިއޯ ދިން ބޯޅަތަކުން އެސްޓަން ވިލާގެ ޖޭކަބް ރާމްސޭ ދެ ގޯލު ޖެހިއިިރު، މި މެޗުގައި ލީޑްސްގެ ލަނޑުތައް ޖެހީ ޑެނިއަލް ޖޭމްސް ދެ ގޯލާއި ޑިއޭގޯ ލޮރެންޓޭ އެވެ. މެޗުގެ ފަހު ކޮޅުގައި އެސްޓަން ވިލާގެ ޑިފެންޑަރު އެޒްރީ ކޮންސާ އަށް ދެ ރީނދޫ ކާޑާ އެކު ރަތް ކާޑެއް ދެއްކުމުން އެ ޓީމުން މެޗު ނިންމާލީ ކުޅުންތެރިއަކު މަދުކޮށެވެ.

ރޭ ކުޅުނު އަނެއް މެޗުން ރެލިގޭޝަނުގައި އޮތް ނޮރިޗް ސިޓީ ވަނީ އަމިއްލަ ދަނޑުގައި 1-1 އިން ކްރިސްޓަލް ޕެލަސްއާ އެއްވަރުކޮށްފަ އެވެ. ޓީމޫ ޕޫކީ ނޮރިޗަށް ލީޑުނަގައިދިންއިރު، ޕެލަސް އިން އެއްވަރުކުރީ ވިލްފްރިއެޑް ޒަހާ ޖެހި ހިތްގައިމު ގޯލުންނެވެ. ޕެލަސް މޮޅުކޮށްދޭން ޒަހާ ޖެހި ޕެނަލްޓީ ދިޔައީ އަރިމަތިން ބޭރުންނެވެ.