ޕެންޝަން ފައިސާއިން އަދި ހައްޖަށް ދިޔައީ 32 މީހަކު

ފަރުލު ހައްޖު އަދާ ކުރަން ޕެންޝަނުގެ ފައިސާ ހަރަދު ކުރެވޭ ގޮތަށް ޕެންޝަނާ ބެހޭ ގާނޫނަށް ބަދަލު ގެނެސް ގަވައިދު އެކުލަވައިލީ 2019 ވަނަ އަހަރު އެވެ. 

ޕެންޝަން ފަންޑުގައި ހުރި ފައިސާއިން މިހާތަނަށް ހައްޖުވާން ގޮސްފައި ވަނީ 32 މީކެވެ. އެއީ ހަތަރު އަހަރު ދުވަހުގެ ތެރެއިން ދެ އަހަރެއްގަ އެވެ. އަނެއް ދެ އަހަރު މީހުން ހައްޖަށް ގޮސްފައެއް ނުވެއެވެ. އެއީ ކޮވިޑާ ގުޅިގެން ހައްޖުގެ އަޅުކަމަށް މީހުން މައްކާ އަށް އަރުވުން ލިމިޓް ކުރުމުންނެވެ. 

ފެންޝަން ފަންޑުގެ ފައިސާއިން މީހުން ހައްޖަށް ގެންދަން ފުރުސަތު ޕެންޝަން އޮފީހުން ވަނީ ހުޅުވާލައިފަ އެވެ. ފަރުލު ހައްޖު / ފުރަތަމަ ހައްޖު ވާން ޕެންޝަން ސްކީމުން ފައިސާ ދޫކުރާ ގަވައިދުގެ ތެރެއިން މި އަހަރު މީހުން ހައްޖަށް ގެންދަން ޝައުގުވެރިވާ ފަރާތްތައް ކުރިމަތިލާން ހުޅުވާލާފައިވާއިރު އެ ގަވައިދުގެ ދަށުން ހައްޖަށް ގެންދިއުމުގެ ހިދުމަތް ފޯރު ކޮށްދެވޭނީ އެ އޮފީހާއެކު އެއްބަސްވުން ގާއިމްކޮށްފައިވާ، ހައްޖަށް ގެންދިއުމުގެ ހުއްދަ އޮތް ކުންފުނި ތަކަށެވެ. 

:: ކިޔާލަން: ހައްޖު ހުއްދަ ދިން ކުންފުނިތައް ކުރަނީ ވައްކަމެއް ނޫންތަ؟

މި އަހަރު ރާއްޖޭން ހައްޖަށް ގެންދަން ހުއްދަ ދީފައި ވަނީ 75،465ރ. އަށް މީހުން ހައްޖަށް ގެންގޮސްދޭ އަލް ހަރަމައިން ހައްޖު އެންޑް އުމްރާ ކޮމްޕެނީ އާއި 75،250ރ. އަށްް ހައްޖަށް ގެންގޮސްދޭ ސިސިލްފަރު ހައްޖު އެންޑް އުމްރާ ޕްރައިވެޓް ލިމިޓެޑާއި 75،000ރ. އަށް ހައްޖަށް ގެންގޮސްދޭ އަލް މަނާސިކް ޕްރައިވެޓް ލިމިޓެޑެވެ. ދެން ދައުލަތުގެ ހައްޖު ކޯޕަރޭޝަނެވެެ.

ރާއްޖެއަށް ސައުދީން މި އަހަރަށް ދީފައި ވަނީ 1000 ހައްޖު ކޯޓާ އެވެ. ހުއްދަ ދިން އަމިއްލަ ތިން ކުންފުނީގެ ތެރެއިން ކޮންމެ ކުންފުންޏަކަށް 90 ކޯޓާ އެވެ. އެހެން ކޯޓާތަށް ދާނީ ހައްޖު ކޯޕަރޭޝަނަށެވެ.

އަމިއްލަ ތިން ކުންފުނީގެ ކޯޓާތަކަށް ބޮޑު އަގުގައި މީހުން އަތުން ފައިސާ ނަގައި ނިންމާފައިވާ ކަމަށް އަޑުތައް ފެތުރި އެފަދަ ބައެއް ޝަކުވާ އިސްލާމިކް މިނިސްޓަރީއަށް ހުށަހަޅާފައި ވެއެވެ. ބައެއް ކުންފުނިތަކުން ބޮލަކަށް 150،000ރ. ނަގާ ކަމަށް އަޑުތައް ފެތުރިފައި ވެސް ވެއެވެ.