މަޑުއްވަރީއަށް ދިޔަ ނާލު ބޯޓެއް އަޑިއަށް، މީހުން ސަލާމަތްކޮށްފި

މާލޭން ފުރައިގެން ރ. އަތޮޅު މަޑުއްވަރި އަށް ދަތުރު ކުރަމުން ދިޔަ މުދާ އުފުލާ ނާލު ބޯޓެއް / ދޯންޏެއް ގަދައިގައި ޖެހި އަޑިއަށް ގޮސްފި އެވެ. އެ ދޯނީގައި ތިބި މީހުންގެ ތެރެއިން އެއްވެސް މީހަކަށް ގެއްލުމެއް ނުވެ އެވެ.

"އާލާ" ދޯނީ ދަތުރު ކުރީ 15 މީހުނާއެކު އެވެ. ދަތުރުމަތީ ގަދައިގައި ޖެހި ރާޅު އަރުވާން ފެށުމާއެކު ދޯންޏަށް ދިޔަވާން ފެށީ އެވެ.

ސިފައިން ބުނީ މޫސުން ގޯސްވުމާއެކު ކަނޑުތައް ގަދަވެ، "އާލާ" ބޯޓަށް ދިޔަވަމުންދާ ކަމަށް އެމްއެންޑީއެފް ކޯސްޓްގާޑަށް އެނގުނީ ރޭ ފަތިހު 5:22 ގައި ކަމަށާއި އެ މައުލޫމާތާއެކު ބ. އޭދަފުށީގެ ދެކުނުން 2.5 ނޯޓިކަލް މޭލު ބެރުގައި އޮތް އެ ބޯޓަށް އެހީތެރިކަން ދިން ކަމަށެވެ. 

މިހާރު "އާލާ" ވަނީ އަޑިއަށް ގޮސްފަ އެވެ. ސިފައިން ވަނީ ބޯޓުގައި ތިބި މީހުން ބ. އޭދަފުއްޓަށް ގެންގޮސްފަ އެވެ. އެމީހުންގެ ހާލު ރަނގަޅެވެ.