މިފްކޯގެ ރިޖެކްޝަން ސާފު ޖަވާބެއް ނުލިބުމުން ނަޝީދުގެ ނުރުހުން މިނިސްޓަރަށް
ރައީސް ނަޝީދު ވިދާޅުވީ ރިޖެކްޓު މަހުގެ ހިސާބު ބެލެއްޓުމަކ ކޮރަޕްޝަނަށް މަގުފަހިވާ ގޮތަށް އޮތް ކަމެއް ކަމަށް މީގެ ކުރިން ފާހަގަ ކުރެވިފައިވާ ކަމަށެވެ.
މިފްކޯގެ ރިޖެކްޝަން ރޭޓާ ބެހޭ ގޮތުން ކުރި ސުވާލަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަންގެ ސީދާ ޖަވާބެއް ނުލިބުން، މަޖިލީހުގެ ރައީސް މުހައްމަދު ނަޝީދު އެކަމާ ނުރުހުން ފާޅު ކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި، އެ ސުވާލު ހުށަހެޅުއްވީ މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑޭ) އެވެ. މިނިސްޓަރު ޖަވާބު ދެއްވީ ލިޔުމުންނެވެ.
ޑރ. ހުސައިންގެ ޖަވާބު މަޖިލީހުގައި އިއްވުމާއެކު، ރައީސް ނަޝީދު ވަނީ ވަރަށް ބޮޑަށް ނުރުހުންވެ، ވާހަކަދައްކަވާފައެވެ. އެމަނިކުފާނު ވިދާޅުވީ މިނިސްޓަރަށް "ބެހޭ ކަންކަމާ ނުބެހޭ ކަންކަން" ކަނޑައަޅާނީ ވަޒީރު އަމިއްލައަށް ނޫންކަމަށެވެ.
"ވަޒީރު ވިދާޅުވެފައި ވަނީ އެ ބޭފުޅާއާ ބެހޭ ކަމެއް ނޫންކަމަށް. ދެން އަޅުގަނޑުމެން މަޖިލީހުން މިހާރު ބަލަމުން މި ދަނީ އެ ބޭފުޅާއާ ހަވާލުކޮށްފައިވަނީ ކޮން މަސައްކަތެއްތޯ. އެ ބޭފުޅާއާ ބެހޭ ކަންތައްތަކާ ނުބެހޭ ކަންތައް ކަނޑައަޅާނީ އެބޭފުޅާއެއް ނޫން." ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ ރިޖެކްޓު މަހުގެ ހިސާބު ބެލެއްޓުމަކ ކޮރަޕްޝަނަށް މަގުފަހިވާ ގޮތަށް އޮތް ކަމެއް ކަމަށް މީގެ ކުރިން ފާހަގަކުރެވިފައިވާ ކަމަށެވެ. އެފްޕީއައިޑީއާ ހިސާބުން، މިއަދާ ހަމައަށް، މަސް ރިޖެކްޓު ކުރީ ކަމަށް ބުނެ، އޮޅުވާލުމުގެ އެތައް މައްސަލައެއް ފާހަގަ ކުރެވިފައިވާ ކަމަށް އޭނާ ވިދާޅުވިއެވެ.
އެމަނިކުފާނު ވިދާޅުވީ އެއީ ކޮންމެހެން ވެސް ބަލަހައްޓަންޖެހޭ މައުލޫމާތެއް ކަމަށެވެ. އަދި އެކަމަކީ ފިޝަރީޒް މިނިސްޓްރީއާ ބެހޭ ކަމެއްތޯ މަޖިލީހުން ބަލާނެ ކަމަށް ވެސް އޭނާ ވިދާޅުވިއެވެ.
ކޮމެންޓް
Republic of Maldives