ސައުދީން އެންމެ ގިނަ އެހީ ދިނީ ރައީސް ޔާމީންގެ ވެރިކަމުގަ އެވެ. ނަމަވެސް ސައުދީ ރަސްގެފާނު ރާއްޖޭގައި ހިންގަން އުޅުއްވި ބިޔަ މަޝްރޫއު ހުއްޓުވަން އޭރު އިދިކޮޅުން އުޅުމުން ގުޅުން ގޯސްވެފައި ވެއެވެ.
ކުދި އަދި މެދުފަންތީގެ ވިޔަފާރިތަކަށް ސަރުކާރުން އުފައްދާ ފަންޑަށް ސައޫދީ އަރަބިއްޔާއިން 40 މިލިއަން ޑޮލަރު (ގާތްގަނޑަކަށް 600 މިލިއަން ރުފިޔާ) ލައި ދޭނެ އެވެ.
ކުދިމެދު ވިޔަފާރިއަށް އެހީވާން ސަރުކާރުން އުފައްދާފައިވާ ފަންޑު މެނޭޖުމަންޓް ކޯޕަރޭޝަނާއި އެސްއެމްއީ ބޭންކުގެ އިސްވެރިން ހިމެނޭ ގޮތަށް ފިނޭންސް މިނިސްޓަރު އިބްރާހިމް އަމީރު ސައުދީއަށް ކުރައްވަމުން ގެންދަވާ ދަތުރުފުޅުގެ ތެރެއިން، ކުދިމެދު ވިޔަފާރީގެ ފަންޑަށް އެހީއެއް ދިނީ ސައުދީގެ އިސްލާމިކް ޑިވެލޮޕްމަންޓް ބޭންކް (އައިއެސްޑީބީ) އިންނެވެ.
ރާއްޖޭން އުފައްދާ އެސްއެމްއީ އިމްޕެކްޓް ފަންޑަށް ސައުދީ އިސްލާމިކް ބޭންކުން ކެޕިޓަލް އިންޖެކްޝަންގެ ގޮތުގައި ދީފައި ވަނީ 40 މިލިއަން ޑޮލަރެވެ. އެއީ ގާތްގަނޑަކަށް 600 މިލިއަން ރުފިޔާ އެވެ.
އައިއެސްޑީބީގެ އަހަރީ ބައްދަލު ވުމުގެ ހަވާސާގައި ދިވެހި ސަރުކާރާއެކު ހެދި އެމްއޯޔޫގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު އަމީރެވެ. އަދި އައިއެސްޑީބީގެ ފަރާތުން ސޮއި ކުރެއްވީ އެ ބޭންކުގެ ޗެއާމަން އަދި ރައީސް ޑރ. މުހައްމަދު އަލް ޖަސީރެވެ.
މީގެ އިތުރުން މި ފަންޑުގެ ފައިނޭންސިން މެދުވެރިކޮށް އެ ކެޓަގަރީގެ ހުރިހާ އިންވެސްޓްމަންޓްތަކަކަށް ވެސް އެހީވާނެ އެވެ. ހާއްސަކޮށް އެންވަޔަރަންމަންޓަލް، ސޯޝަލް އެންޑް ގަވަނަންސް (އީއެސްޖީ) މިންގަނޑުތަކަށް ފެތޭ ކަންކަމާއި އިސްލާމީ ފައިނޭންސިން ހިމެނެ އެވެ.
ސަރުކާރުން ދަނީ ގައުމީ ސްޓްރެޓެޖިކް އެކްޝަން ޕްލޭނެއް ހަދައި ކުދިމެދު ވިޔަފާރިތަކަށް ހުރި ގޮންޖެހުންތައް ދެނެކަނެ އެހީވަމުންނެނެވެ. މިގޮތުން އެސްއެމްއީ ބޭންކުން ބިލިއަނެއްހާ ރުފިޔާގެ ލޯނު ދިން އިރު ފަންޑު މެނޭޖުމަންޓް ކޯޕަރޭޝަން އިންވެސް ވަނީ ކޮވިޑުގެ ސަބަބުން ގެއްލުންވި ޓޫރިޒަމް ވިޔަފާރިތަކަށް އެހީވެފަ އެވެ.