މޫދަށް ކުނި އަޅާތީ ތުލުސްދޫއަށް ބޮޑު ޖޫރިމަނާއެއް

އެންވަޔަރަމެންޓަލް ޕްރޮޓެކްޝަން އޭޖެންސީ (އީޕީއޭ) އިން މާލެ އަތޮޅު ތުލުސްދޫ ކައުންސިލް ޖޫރިމަނާ ކޮށްފި އެވެ. އެ ރަށުގެ ކައުންސިލް 45،000 ރުފިޔާއިން ޖޫރިމަނާ ކުރީ މޫދަށް ކުނިއަޅާތީ އެވެ.

އީޕީއޭ އިން އާންމު ކުރި ބަޔާނެއްގައި ބުނީ، ތުލުސްދޫ ކައުންސިލުން ކާބޯތަކެތީގެ ކުނިއަޅާ ޑަސްބިންތަކުގައިވާ ކުނިތައް މޫދަށް އަޅަމުން ދަނީ ކުނިމެނޭޖު ކުރުމާބެހޭ ގަވާއިދާއި ހިލާފަށް ކަމަށެވެ.

ތުލުސްދޫގެ ކުނި ޑަސްބިންތައް މޫދަށް އޮއްސާލުން ހުއްޓާލަން އެންގުމާއެކު އިދާރީ ފިޔަވަޅެއްގެ ގޮތުގައި 30 ދުވަހުގެ ތެރޭގައި ރަށު ފެންވަރުގައި ކުނި މެނޭޖްކުރުމުގެ ޕްލޭނެއް ތައްޔާރު ކުރަން ވެސް އީޕީއޭން އަންގާފައި ވެއެވެ. އަދި ކުނި މެނޭޖުކުރުމުގެ ގަވާއިދާ ހިލާފުވެފައި ވާތީ ކުރި 45,000 ރ. ގެ ޖޫރިމަނާ މަސް ދުވަހުން ދައްކަން ވެސް އެންގި އެވެ.

ތުލުސްދޫއަކީ މާލެ އަތޮޅުގައި މީހުން ދިރިއުޅޭ ރަށްތަކުގެ ތެރެއިން ރަށެކެވެ. ރާއްޖޭގެ އެހެން ރަށްރަށެކޭ އެއްފަދައިން ތުލުސްދޫ އަކީ ވެސް މުރަކައިގެ ދޮންވެލިން އުފެދިފައިވާ ޖަޒީރާ ރަށެކެވެ. އިގްތިސޯދީ ގޮތުން ކުރާ މަސައްކަތްތަކަކީ މަސްވެރިކަމާއި ދަނޑުވެރިކަމުގެ އިތުރުން ފަތުރުވެރިކަމުގެ މަސައްކަތް ތަކުގައި ވަޒީފާ އަދާ ކުރުމެވެ. އެރަށުގައި 1400 އަށް ވުރެ ގިނަ މީހުން އުޅެ އެވެ.