ޗާގޮސްގެ ސިޔާދަތީ ބާރު ދޫނުކުރިނަމަ ހަމަހަމަކޮށް ބަހާކަށް ނުޖެހޭނެ: ނަޝީދު

ޗާގޮސްގެ ސިޔާދަތީ ބާރު ދޫނުކުރިނަމަ ކަނޑުގެ ސަރަހައްދު ހަމަހަމަކޮށް ބަހަން ނުޖެހޭނެ ކަމަަށް ކުރީގެ ރައީސް / އެމްޑީޕީގެ  ރައީސް މުހައްމަދު ނަޝީދު މިރޭ ވިދާޅުވެއްޖެ އެވެ.

ނަޝީދު މިހެން ވިދާޅުވީ ޗާގޯސްގެ މައްސަލާގައި ސިޔާސީ ޕާޓީތަކާއި ކުރީގެ ބައެއް ބަންޑާރަ ނާއިބުން ގުޅިގެން މިއަދު ބޭއްވި ނޫސްވެރީންގެ ބައްދަލްވުމުގައި މުޅި މައްސަލަ ވަރަށް ބޮޑަށް ސާފުކޮށްދެއްވާފައިވާކަން ފާހަގަކުރަައްވާ ކުރެއްވި ޓްވީޓެއްގައެވެ.

އެމަނިކުފާނުގެ ޓްވީޓް ފެއްޓެވީ ނޫސްވެރީންގެ ބައްދަލްވުން ލީޑު ކުރެއްވި ކުރީގެ ބަންޑާރަނާއިބު ޑރ. މުހައްމަދު މުނައްވަރަށް ޝުކުރު ދަންނަވަމުންނެވެ. އަދި ވިދާޅުވީ ޗާގޮސްގެ ސިޔާދަތީ ބާރު ދޫނުކުރިނަމަ ކަނޑުގެ ސަރަހައްދު ހަމަހަމަކޮށް ބަހަން ނުޖެހޭނެ ކަމަަށެވެ.

"އަޅުގަނޑު ވިސްނީ ބައިލެޓްރަލް އެގްރީމަންޓަކުން ބޯޑާ ކަނޑައަޅަން އަދި ފުށުއަރާ ސަރަހައްދުގެ ވާހަކަ ނުގެނެސް މޮރިޝަސް އެއްބަސްވުމާ ސިޔާދަތީ ބާރުގެ ވާހަކަައިގައި ދޫދޭން،" ނަޝީދު ވިދާޅުވި އެވެ.

ޗާގޯސްގެ ސިޔާދަތީ ބާރުވެރިކަން އޮތީ މޮރިޝަސްއަށް ކަމަށް ގަބޫލުކޮށް ރައީސް އިބްރާހީމް މުހައްމަދު ސޯލިހް ވަނީ ސިޓީއެއް ފޮނުއްވާފައެވެ. އެ ސިޓީ ހާމަކުރަން ސަރުކާރުން ދެކޮޅު ހަދައެވެެ.

ރާއްޖެއާއި މޮރިޝަސް އާއި ދެމެދު، އިގްދިސާދީ ސަރަހައްދު ފުށުއަރާގޮތަށް އޮތް ހިސާބާމެދު އިންޓަނޭޝަނަލް ޓްރައިބިއުނަލް ފޯ ދަ ލޯސް އޮފް ދަ ސީ (އިޓްލޮސް) ގައި ދިވެހި ސަރުކާރުން ނަގާފައިވާ ސްޓޭންޑާ ދެކޮޅަށް ސިޔާސީ ޕާޓީތަކުންނާއި ގާނޫނީ ބޭފުޅުން ނުކުންނެވިއިރު ރައީސް ނަޝީދުގެ މަންދޫބުންވެސް ވަނީ ބައިވެރިވެފައެވެ.

އިޓްލޮސްގެ ނިންމުމާއެކު ފުށުއަރާ ސަރަހައްދުން ރާއްޖެ އަށް 47،232 އަކަ ކިލޯމީޓަރު ލިބެ އެވެ. މޮރިޝަސް އަށް ލިބެނީ 45،331 އަކަކިލޯ މީޓަރެވެ.

އިޓްލޮސް އިން ނިންމުން ނިންމާފައި ވަނީ ރާއްޖޭން އެދުނު ގޮތަށެވެ. ދެ ގައުމުގެ ސަރަހައްދުން 200 މޭލު ބޭރަށް އިން ނަގާއިރު، ފުށުއަރާ ހިސާބު ބެހުމަށް އޮންނަނީ ދެ ގައުމަށް އެއްވަރުވާ ގޮތަށެވެ. މޮރިޝަސް އިން ދައުވާކުރަމުން ދިޔައީ އެ ގައުމުގެ އިން ކަނޑައަޅާއިރު، 200 މޭލު ފަށާ ހިސާބެއްގެ ގޮތުގައި ޗާގޯސްގެ ބޭރުން އޮންނަ ބްލެއިމަން ފަރު ބެލުމަށެވެ.

އެކަމަކު ރާއްޖެއިން ބުނަމުން ދިޔައީ ބްލެއިމަން ފަރަކީ ހަމައެކަނި ހިކި ދިޔައިގައި ފެންނަން އޮންނަ ތަނަކަށް ވެފައި، މީހުންނަށް ދިރިއުޅެވޭ ވަރުގެ ތަނަކަށް ނުވާތީ، އެއީ އިން ކަނޑައެޅުމުގައި ބެލޭނެ ހިސާބެއް ނޫންކަމަށެވެ. އިއްޔެ އިޓްލޮސް މައްސަލަ ނިންމީ ރާއްޖެއާ އެއްކޮޅަށެވެ. އެހެންވެ، އެއީ ރާއްޖެއަށް ލިބުނު ބޮޑު ކާމިޔާބީއެއް ކަމަށް ސަރުކާރުން ބުނެ އެވެ.