ދުބާއީގެ ކުންފުންޏަކުން އަގު ބޮޑު ރިސޯޓެއް ހަދަން އިއުލާނުކުރީ ސިނާއީ ރަށެއް

ދުބާއީގެ އެފްއޭއެމް ހޯލްޑިންސް އިން ރާއްޖޭގައި 3.3 ބިލިއަން ރުފިޔާ (217 މިލިއަން ޑޮލަރު) ގެ ރިސޯޓެއް ތަރައްގީ ކުރަން އިއުލާނު ކޮށްފައިވާ ރަށަކީ ސިނާއީ މަސައްކަތަށް ދޫކޮށްފައިވާ ރަށެއްކަން ހާމަވެއްޖެ އެވެ.

މި މަހުގެ ފުރަތަމަ ދުވަހުން ފެށިގެން، އިއްޔެގެ ނިޔަލަށް ދުބާއީގެ ވޯލްޑް ޓްރޭޑް ސެންޓަރުގައި ބޭއްވި އަރަބިއަން ޓްރެވަލް މާކެޓް ފެއާގައި އިއުލާނުކުރި އެ މަޝްރޫއު ހިންގަން ހަމަޖައްސާފައިވާ ރަށެއް ކަމަށް އެ ކުންފުނިން ބުނެފައި ވަނީ ލ. އަތޮޅު / ހައްދުމަތީ، ފޮނަގާދޫ ކަމަށެވެ. އެ އަތޮޅު އިސްދޫ އާއި އިސްދޫ އެއްފަހަށް އޮންނަ އިދާރީ ވަކި ރަށަކަށް ބަލާ ކަލައިދޫއާ އެއް ފަޅެއްގެ ތެރޭ ރަށާ 700 އެއްހާ މީޓަރު ކައިރީގައި އޮންނަ އެ ރަށަކީ މޫދުވިނަ ފާމެއް ހިންގަން ހަސަން މޫސާ ކިޔާ މީހަކަށް 2012 ވަނަ އަހަރުން ފެށިގެން 21 އަހަރުގެ މުއްދަތަކަށް ދޫކޮށްފައި އޮތް ރަށެކެވެ.

ޓޫރިޒަމް މިނިސްޓްރީގެ އޮފިޝަލަކު "މި" ނޫހަށް ވިދާޅުވީ އެ ރަށަކީ އެއްވެސް އިރަކު ފަތުރުވެރިކަމުގެ ބޭނުމަށް ކަނޑައަޅާފައި އޮތް ރަށެއް ނޫން ކަމަށެވެ. އަދި، އެ ރަށް ކައުންސިލުގެ އިހްތިސޯސަށް ވެސް ނުވަންނާތީ، އެ ރަށުގައި ޓޫރިޒަމް މަޝްރޫއެއް ހިންގޭނެ އެއްވެސް ގޮތެއް ނެތް ކަމަށެވެ.

އެފްއޭއެމް ހޯލްޑިންސްގެ ވެބްސައިޓުގައި ބުނެފައިވާ ގޮތުން، އަލްމަހްރާ ރިސޯޓުގެ ނަން ދީފައިވާ އެ މަޝްރޫއުގެ އަމަލީ މަސައްކަތް ދެ މަހެއްހާ ދުވަހުގެ ތެރޭ ފަށާނެ އެވެ. އަދި 2025 އަށް މަސައްކަތް އެއްކޮށް ނިމޭނެ އެވެ. އެ ކުންފުނިން ބުނާ ގޮތުގައި އެ މަޝްރޫއުގެ 20 ޕަސެންޓް މިހާރު ވެސް ވަނީ ވިކިފަ އެވެ.