އެންމެ ގިނަ ހިދުމަތް ދިނީ ރައީސް ޔާމީނަށް: އިމްރާން

މުއްދަތު ދިގު، ޖަލު ހުކުމެއް ތަންފީޒު ކުރައްވަމުން ގެންދަވާ ކުރީގެ ރައީސް އަދި އިދިކޮޅު ލީޑަރު، ރައީސް ޔާމީން އަބްދުލްގައްޔޫމް ހުންނެވި ޖަލު ގޮޅި އާއި އެ މަނިކުފާނު ބޭނުންފުޅު ކުރައްވާ ފާހަނައި ބަގްކޮށް ކެމެރާ ހަރުކޮށްފައިވާ ކަމަށް ޕީޕީއެމާއި ޕީއެންސީން ތުހުމަތު ކޮށްފައި ވަނިކޮށް ރައީސް ޔާމީންގެ އިންސާނީ ހައްގުތަކާއި ކަރާމާތައް އުނިކަން ލިބޭނެ އެއްވެސް ކަމެއް ކުރުމަކީ ޒަމީރު ތަންދޭ ކަމެއް ނޫން ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ. 

ޕީޕީއެމާއި ޕީއެންސީ ހިމެނޭ ގޮތަށް އިދިކޮޅު ލީޑް ކުރައްވާ އިންޓެރިމް ލީޑަރު އަބްދުއްރަހީމްގެ ފަރާތްޕުޅުން ތުހުމަތުތައް އިމްރާނަށް އަމާޒު ކުރެއްވުމުން އިމްރާން މިއަދު ވަނީ ޓްވީޓެއް ކުރައްވާފަ އެވެ:

"ރައީސް ޔާމީންގެ އިންސާނީ ހައްގާއި ކަރާމާތަށް އުނިކަން ލިބޭނެ އެއްވެސް ކަމެއް ކުރުމަކީ އަޅުގަނޑުގެ ޒަމީރު ތަންދޭ ކަމެއް ނޫން. ޖަލުގައި މިހާތަނަށް އެންމެ ގިނަ ހިދުމަތް ދެވުނު ގައިދީއަކަށް ވާނީ ރައީސް ޔާމީން ކަން މޯލްޑިވްސް ކަރެކްޝަނަލް ސާވިސްގެ އޮފިސަރުންނަށް އެނގިވަޑައިގަންނަވާނެ." 

މިފަދައިން ޓްވީޓެއް ކުރެއްވި ނަމަވެސް ޖަލު ގޮޅި އާއި ފާހާނާ ބަގްކޮށް ކެމެރާ ހަރު ކޮށްފައިވާ ކަމަށް އޮތް ތުހުމަތަށް އެއްވެސް ޖާވާބެއް އިމްރާނެއް ނުދެެއްވަ އެވެ. އަދި އެކަން ދޮގުކޮށް އިންކާރު ކުރައްވާފައެއް ވެސް ނުވެއެވެ. 

އިދިކޮޅުން ނޫސްވެރިންނަށް މައުލޫމާތު ދެމުން ބުނެފައިވާ ގޮތުގައި މިހާރު އޮތްވަރުގެ އަނިޔާވެރި ސަރުކާރެއް އަދި މިހާރު ހުންނެވި ހޯމް މިނިސްޓަރު އިމްރާން ފަދަ އަނިޔާވެރި ހޯމް މިނިސްޓަރަކު ވެސް ދިވެހި ރައްޔިތުން ނުދެކޭނެ އެވެ. އިދިކޮޅުން ސިފަ ކުރާ އެ އަނިޔާވެރި ކަމާ ގުޅުވާލައި ބުނެފައި ވަނީ ރައީސް ޔާމީން ޖަލުގައި ބޭނުންފުޅު ކުރައްވާ ފާހަނާ އާއި ސިޓިން ރޫމާއި ކޮޓަރި އާއި އެމަނިކުފާނަށް ހާއްސަ ކޮށްފައިވާ ފެންޑާއެއްގައި ވެސް ކެމެރާތައް ހަރުކޮށްފައިވާ ކަމަށެވެ.

އަދި އިދިކޮޅު އިންޓެރިމް ލީޑަރު ވިދާޅުވި އެވެ: 

"ފާހަނާ އަށް ދަންދެން ކެމެރާ އަޅައިގެން ރައީސް ޔާމީންގެ ހުރިހާ ހަރަކާތެއް ބެލޭ ގޮތަށް އިމްރާން ރާވާފައި ހުރި ކަމަށް މިއީ އަޅުގަނޑަށް ލިބޭ މައުލޫމާތެއް،" އަބްދުއްރަހީމް ވިދާޅުވި އެވެ.

ސަރުކާރުގެ މައި ޖަލު، މާފުށީ ޖަލުގައި ރައީސް ޔާމީން ހުންނަވަނީ އެ ޖަލުގެ ސްޕެޝަޕް ޕްރޮޓެކްޝަން ޔުނިޓް ގައެވެ.