ކްރިޓިކްސް އިން ހޮވި އެންމެ މޮޅު ފިލްމުގެ ޝަރަފު ހޯދީ ފިލްމު "ބަދާއީ ދޯ" އެވެ.
މިއަހަރުގެ ފިލްމްފެއާ އެވޯޑު ހަފްލާގެ އެންމެ ޝަރަފުވެރި އެވޯޑު ކަމުގައިވާ އެންމެ މޮޅު ފިލްމުގެ އެވޯޑު، ޑައިރެކްޓަރު ސަންޖޭ ލީލާ ބަންސާލީގެ "ގަންގޫބާއި ކަތިއަވާޅީ" އަށް ލިބެއްޖެ އެވެ.
ރޭގެ އެވޯޑު ހަފްލާގައި އެންމެ ގިނަ އެވޯޑުތައް ހާސިލްކުރި އެއް ފިލްމަކީ ވެސް އެއީ އެވެ. އެ ފިލްމަށް 10 އެވޯޑު ލިބިފައިވެ އެވެ. އެ ފިލްމުގެ ލީޑު ރޯލުން މޮޅު އެކްޓިންއެއް ދެއްކި އާލިއާ ބަޓް ވަނީ އެންމެ މޮޅު އެކްޓްރެސްގެ އެވޯޑު ހޯދާފަ އެވެ. އެންމެ މޮޅު ޑައިރެކްޓަރުގެ އެވޯޑު ވެސް ގެންދިޔައީ އެ ފިލްމުންނެވެ.
ފިލްމުފެއާގެ އެންމެ މޮޅު އެކްޓަރުގެ އެވޯޑު ލިބުނީ ފިލްމު "ބަދާއީ ދޯ" ގެ ލީޑު ރޯލު ކުޅުނު ރާޖްކުމާރު ރާއޯ އަށެވެ.
ކްރިޓިކްސް އިން ހޮވި އެންމެ މޮޅު ފިލްމުގެ ޝަރަފު ހޯދީ ފިލްމު "ބަދާއީ ދޯ" އެވެ. ކްރިޓިކްސް އިން ހޮވި އެންމެ މޮޅު އެކްޓަރުގެ އެވޯޑު "ވާދް" ގެ ރޯލުން ސަންޖޭ މިޝްރާ އަށް ލިބުނިއިރު، ކްރިޓިކްސް އިން ހޮވި އެންމެ މޮޅު އެކްޓްރެސް އެވޯޑު ދެ ފަންނާނަކަށް ލިބުނެ އެވެ. އެއީ "ބަދާއީ ދޯ" އިން ބުމީ ޕެޑްނެކަރް އަދި "ބޫލް ބުލައްޔާ 2" ގައި މޮޅު އެކްޓިން އެއް ދެއްކި ތަބޫ އެވެ.
ބެސްޓް ސަޕޯޓިން އެކްޓަރުގެ އެވޯޑު އަނިލް ކަޕޫރަށް "ޖުގް ޖުގް ޖިޔޯ" އިން ލިބުނުއިރު، ބެސްޓް ސަޕޯޓިން އެކްޓްރެސްގެ އެވޯޑު ވެސް ލިބުނީ "ބަދާއީ ދޯ"ގައި މުހިންމު ރޯލެއް ކުޅުނު ޝީބާ ޗައްދާ އަށެވެ.