ލަންކާއަށް ބިންހެލުމެއްގެ އަސަރު، ގެއްލުމެއް ނެތް

އަވަށްޓެރި ސްރީލަންކާއަށް މިއަދު ބިންހެލުމެއް އަތުވެއްޖެ އެވެ. ބިން ހެލުމެއް އައި ނަމަވެސް އޭގެ ސަބަބުން އެއްވެސް ގެއްލުމެއް ލިބުނު ކަމުގެ ރިޕޯޓެއް އަދި މިހާތަނަކަށް ނެތެވެ.

ލަންކާގެ ޖިއޮލޮކޮޖަލް ސާވޭ އެންޑް މައިސް ބިއުރޯއާ ހަވާލާދީ އެ ގައުމުގެ ގިނަ ނޫސްތަކުގައި ރިޕޯޓް ކޮށްފައިވާ ގޮތުގައި މިއަދު ހެނދުނުގެ ވަގުތެއްގައި ހަމްބަންޓޯޓާ ކަނޑުގެ ސަރަހައްދުން 4.4 މެގްނިޓިއުޑްގެ ބިންހެލުމެއް އައިސްފައިވެ އެވެ.  އަދި މި ބިންހެލުން ރެކޯޑް ކުރެވިފައިވަނީ ހަމްބަންޓޯޓާ އާއި 25.8 ކިލޯމީޓަރު ދުރުން ކަނޑުގެ ސަރަހައްދެއްގައެވެ.

މި ބިންހެލުމުގެ ސަބަބުން އެއްވެސް ގެއްލުމެއް އަދި ސުނާމީއެއް އައުމުގެ ބިރުވެސް ލިބިފައެއް ނެތެވެ.

ގާތްގަނޑަކަށް 16،000 ދިވެހިން ވެސް އުޅޭ ލަންކާއަށް ބިންހެލުމެއް އައި ހަބަރާއެކު މިއަދު ވަރަށް ހެނދުނުގެ ވަގުތެއްގައި ހަމްބަންޓޯޓާގެ ސަރަހައްދުގެ ބައެއް މީހުން ސިހި ވަރަށް ބޮޑު ހާސްކަމުގެ ތެރެއަށް ދިޔަ އެވެ. ގިނަ ދިވެހިން އުޅެނީ ކޮލަމްބޯގެ ސަރަހައްދުތަކުގަ އެވެ.