ބޭރުމަގު މަރާމާތު ކުރަން 1.4 މިލިއަން ރުފިޔާ
ސިޓީ ކައުންސިލުން ހާމަކުރި ޗާޓުން ދައްކާ ގޮތުގައި ބޮޑުތަކުރުފާނު މަގުގައި މަރާމާތު ކުރަން ޖެހިފައިވާ 32 ވަޅުގަނޑު އެބަހުއްޓެވެ.
މާލޭގެ ބޮޑުތަކުރުފާނު މަގުގައި އަޅާފައިވާ ތާރުގަނޑުގައި ހެދިފައި ހުރި ބާގަނޑުތައް މަރާމާތުކުރަން ޗައިނާ ކުންފުންޏަކާ ހަވާލު ކޮށްފައި ވަނީ 1.4 މިލިއަން ރުފިޔާއަށް ކަމަށް މާލެ ސިޓީ ކައުންސިލުން ބުނެފި އެވެ.
ބޮޑުތަކުރުފާނު މަގު މަރާމާތުކުރުގެ މަސައްކަތް ހަވާލު ކޮށްފައި ވަނީ ސިނަމާލެ ބްރިޖްގެ މަސައްކަތް ކުރި ޗައިނާގެ ހުނާން އިންޖިނިއަރިން ކޯޕަރޭޝަން ލިމިޓެޑާ އެވެ.
މާލޭ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު މިއަދު ވިދާޅުވީ ބޮޑުތަކުރުފާނަށް ބަލާލުމުން ބޮޑެތި މަރާމާތުތައް ކުރަން ޖެހިފައިވާކަން ފެންނަ ކަމަށެވެ. އެތައް އަހަރަކު އަޅާ ނުލާ ދޫކޮށްލާފައި ހުރުމުގެ ސަބަބުން ބޮޑެތި ގެއްލުންތަކެއް ލިބިފައިވާ ކަމަށް އޭނާ ވިދާޅުވި އެވެ.
"ބޮޑެތި ސަރަހައްދުތައް އެއްކޮށް ނަގާ ހަދަން ޖެހިފަ ހުރީ، ގިނަ އަހަރުތަކެއް ވަންދެން އަޅާ ނުލާ ދޫކޮށްލާފަ އޮތުމުން ލިބިފަ ހުރި ބޮޑެތި ގެއްލުންތައް،" މުއިއްޒު ވިދާޅުވި އެވެ.
މި މަސައްކަތް 10 ދުވަހުގެ ތެރޭ ނިންމާލެވޭނެ ކަމަށް މުއިއްޒު ވިދާޅުވެފައި ވެއެވެ.
ސިޓީ ކައުންސިލުން ހާމަކުރި ޗާޓުން ދައްކާ ގޮތުގައި ބޮޑުތަކުރުފާނު މަގުގައި މަރާމާތުކުރަން ޖެހިފައިވާ 32 ވަޅުގަނޑު އެބަހުއްޓެވެ. އެތަން މަރާމާތުކުރަން ޗައިނާ ކުންފުންޏާ ހަވާލުކޮށްފައި ވަނީ އަގު ބޮޑުކޮށް ކަމަށް ބުނެ ބައެއް މީހުން ދަނީ ފާޑުކިޔަމުންނެވެ.
ކޮމެންޓް
Republic of Maldives