ގދ. ތިނަދޫން 150 ގޯއްޗަށް ހުޅުވާލައިފި

ބޮޑު އާބާދީއެއް އޮތް ގދ. ތިނަދޫން މީހުން ދިރިއުޅެން 150 ގޯތި ދޫކުރަން އިއުލާނު ކޮށްފި އެވެ. 

އެ ރަށުން ގޯތި ބޭނުންވާ ފަރާތްތަކުން ގޯއްޗަށް އެދި ހުށަހެޅުމުގެ ފުރުސަތު ހުޅުވާލާފައި ވާއިރު އެ ރަށުން ދޫކުރަން ނިންމާފައި ވަނީ 1500 އަކަފޫޓާ، 2000 އަކަފޫޓާ ދެމެދުގެ ގޯއްޗެވެ. 

ގޯތިތައް ދޫކުރަނީ ތިނަދޫ ލޭންޑް ޔޫސް ޕްލޭންގައި ގޯތި ދޫކުރަން ކަނޑައަޅާފައިވާ ސަރަޙައްދުތަކުގެ ތެރެއިން ނުވަ ބްލޮކަކުންނެވެ. އެއީ I,J,K,L,O,P,R,V,W މި އަކުރުތަކުގެ ބްލޮކްތަކެވެ. 

ތިނަދޫން ގޯތި ދެނީ ތިން ކެޓަގަރީއަކަށް ބަހާލައިގެނެވެ. އެއީ ކެޓަގަރީ އޭ އާއީ ބީ އަދި ސީ އެވެ. އޭގެ ކެޓަގަރީގައި ހިމެނޭ މީހުނަށް ދެނީ 70 ގޯއްޗެވެ. ބީ ކެޓަގަރީގައި ހިމެނޭ މީހުނަށް 66 ގޯއްޗެވެ. ސީ ކެޓަގަރީއަށް ފަސް ގޯއްޗެވެ. 

މީގެ އިތުރުން ބީ ކެޓަގަރީގެ ތެރެއަށް ތިން ގޯތި ލާފައި ވެއެވެ. އެއީ ތިނަދޫގައި ވިޔަފާރި ކުރަމުންދާ ރަށުން ބޭރު ފަރާތްތަކަށެވެ. އަދި ޕްރޮފެޝަނަލް ދާއިރާއިން ހިދުމަތްދޭ ފަރާތްތަކަށް ހަ ގޯތި އޭ އާއި ބީ ކެޓަގަރީއަށް ލާފައި ވެއެވެ. 

ތިނަދޫ ކައުންސިލުން ބުނީ ގޯއްޗަށް ޝަރުތުތައް ހަމަވާ ފަރާތްތަކުން "ދިރިއުޅުމަށްޓަކައި ދޫކުރާ ކޮންޑިޝަނަލް ގޯތި، ބިމަށް އެދޭ ފޯމު" ފުރިހަމަކޮށް، ފޯމާއެކު ހުށަހަޅަންޖެހޭ ލިޔެކިޔުންތަކާއެކު، ޖޫން 1، 2023 ގައި ހުށަހަޅަން އެދޭ ކަމަށެވެ.     

އެ ރަށުން ގޯތި ދޭން އިއުލާން ޖެހި އިރު އެރަށުގައި ހައުސިން ޔުނިޓް އެޅުމުގެ މަޝްރޫއެއް ވެސް ހިނގަ އެވެ.