ގުރައިދޫ ދާއިރާގެ ވޯޓުލުން ކުރިޔަށް ދަނީ

ރައްޔިތުންގެ މަޖިލީހުގެ ކ. ގުރައިދޫ ދާއިރާގެ ގޮނޑިއަށް މެންބަރަކު އިންތިހާބު ކުރުމުގެ ބައި އިލެކްޝަންސްގެ ވޯޓް ނެގުން ކުރިޔަށް އެބަދެ އެވެ.

ދާއިރާގެ ތިން ރަށް ކަމަށްވާ ގުރައިދޫ އާއި މާފުއްޓާއި ގުޅީގެ އިތުރުން ވެރިރަށް މާލޭގައި އެ ދާއިރާއަށް މެންބަރު އިންތިހާބު ކުރުމަށް މިއަދު ވޯޓްލާން ފެށީ ހެނދުނު 8:00 ޖެހި އިރު އެވެ. ގުރައިދޫ ދާއިރާގެ ވޯޓުލުން މިއަދު ހަވީރު 4:00 ޖެހުމާ ހަމަށް ކުރިޔަށް ގެންދާނެ އެވެ. 

ގުރައިދޫ ދާއިރާގެ ބައި އިލެކްޝަނުގައި ވާދަ ކުރަނީ އެމްޑީޕީ އާއި ޕީޕީއެމާއި އެމްއެންޕީގެ ކެންޑިޑޭޓުންނެވެ. ތިން ޕާޓީން ވެސް ކެމްޕޭންކޮށްފައި ވެއެވެ.

މިއަދު ވޯޓް ލާއިރު ގުޅީގައި ވޯޓް ފޮށި ހުންނާނީ އެ ރަށު ސްކޫލްގަ އެވެ. މާފުށީގައި ދެ ފޮށި ހުންނާނެ އެވެ. އެ ދެ ފޮށި ވެސް ބަހައްޓާފައި ވަނީ މާފުށީ ސްކޫލްގަ އެވެ. ގުރައިދޫގައި ވެސް ދެ ފޮށި ބަހައްފައި ވެއެވެ. އެއީ ކައުންސިލް އިދާރާގަ އާއި ޔޫތު ސެންޓަރުގަ އެވެ. ދެން ފޮށި ބަހައްޓާފައި ވަނީ މާލޭގަ އެވެ. މާލޭ ފޮށި ބަހައްޓާފައި ވަނީ އިއްޒުއްދީނު ސްކޫލްގަ އެެވެ. 

ގުރައިދޫ ދާއިރާގައި ވޯޓްލުމުގެ ހައްގު ލިބޭ އާބާދީއަކީ 3،423 މީހުނެވެ. އެ ނަމްބަރުތައް އަންނަނީ ގުރައިދޫގެ 1394 މީހުންނާއި މާފުށީގެ 1366 މީހުންނާއި ގުޅީގެ 663 މީހުނެވެ. އެއިން 451 މީހަކު ވޯޓްލާނީ މާލޭގަ އެވެ. 

ގުރައިދޫ ދާއިރާ، ބައި އިލެކްޝަނަކަށް ދިޔައީ އެ ދާއިރާގެ މެންބަރު އިބްރާހިމް ރިޒާ މިދިޔަ ފެބުރުއަރީ މަހުގެ 23 ވަނަ ދުވަހު އަވަހާރަ ވުމުންނެވެ.