ދޮޅުމަހުގެ ޗުއްޓީ ނިމުނީ ؛ 92،300 ދަރިވަރުން ސްކޫލަށް

ދޮޅު މަސް ދުވަހުގެ ދިގު ބަންދަކަށް ފަހު ދިރާސީ އާ އަހަރުގެ ކިޔެވުން މިއަދު ރާއްޖޭގެ ސްކޫލްތަކުގައި ރަނގަޅަށް ފަށައިފި އެވެ. މިއަދު ދިރާސީ އަހަރު ފެށީ ސަރުކާރާއި އަމިއްލަ ސްކޫލްތައް ހިމަނައިގެން 92،300 ދަރިވަރުންނާއެކު އެވެ. އަދި އެޑިއުކޭޝަން މިނިސްޓްރީން ބުނާ ގޮތުގައި މިއަދު ދިރާސީ އަހަރު ފެށީ ދަރިވަރުންގެ ފޮތްތަކާއި ޓީޗަރުން ވެސް ހަމަކޮށެވެ. ސްކޫލަށް އަލަށް މިއަހަރު 7700 ދަރިވަރުން ދާން ފެށި އެވެ.

މިދިޔަ ބުރާސްފަތި ދުވަހު އެޑިއުކޭޝަނުން ބުނީ ބޮޑު ޗުއްޓީ ފެށުމުގެ ކުރިން ވެސް ސްކޫލްތަކަށް ޓީޗަރުން ހަމަކުރަން ފަށާފައިވާ ކަމަށާއި
ހުރިހާ ތަނަކަށް ޓީޗަރުން ހަމަކޮށްފައިވާ ކަމަށެވެ. ސްކޫލްތަކަށް 122 ޓީޗަރުން ބޭނުން ވެގެން މިނިސްޓްރީގައި އެދިފައިވެ އެވެ.

އެ ދުވަހު އެޑިއުކޭޝަން މިނިސްޓަރު ޑރ. އައިޝަތު އަލީ ވިދާޅުވި ގޮތުގައި އޭޕްރިލް މަހުން ފެށިގެން ސްކޫލްތަކަށް ޓެކްސްޓު ފޮތްތައް ބެހުމުގެ މަސައްކަތް ފަށާފައިވެ އެވެ. ނަމަވެސް ބައެއް ފޮތްތަކަކީ އަލަށް ޗާޕުކުރާ ފޮތަށް ވުމުން އެ ފޮތްތައް ފޮނުވުމަށް ގިނަ ދުވަސްތަކެއް ހޭދަވެ އެވެ. އަދި ބައެއް ފޮތްތައް އިންޑިއާގައި ޗާޕުކުރާއިރު، ކަނޑުގަދަވުމުގެ ސަބަބުން އެ ފޮތްތައް ރާއްޖެ ގެނައުމުގައި ވެސް ލަސްވި އެވެ.

މިއަދު އަލުން ދަރިވަރުން ސްކޫލަށް ދިއައިރު އަލަށް އަޅަމުން އަންނަ ސްކޫލުތަކެއް ވެސް ހިމެނެ އެވެ. އޭގެ ތެރެއިން އަރަބިއްޔާ ސްކޫލުގެ އާ އިމާރާތް އަޅަން ބާ ޖަމާލުއްދީން ބިމުގައި ހުރި އިމާރާތް ތަޅާލުމުގެ މަސައްކަތް އަންނަ މަހުގެ 10 އަށް ނިންމާނެ އެވެ. އަދި އެ ތަނުގައި އާ އިމާރާތް އެޅުމުގެ މަސައްކަތް ބަޔަކާ ހަވާލުކުރާނެ އެވެ.

އަދި ދަރުމަވަންތަ ސްކޫލުގެ އާ އިމާރާތް ޑިސެމްބަރުގެ ކުރިން ނިމޭނެ އިރު ސީއެޗްއެސްސީގެ އާ އިމާރާތް އަންނަ މާޗުގެ ނިޔަލަށް ނިމޭނެ އެވެ.

ރައީސް އިބްރާހިމް މުހައްމަދު ސޯލިހުގެ ސަރުކާރުން ފެށި ސްކޫލް ކުދިންގެ ނާސްތާ ޕްރޮގްރާމް ދެން ހިންގާނީ އެކަމަށް އެންމެ ބޮޑަށް ބޭނުން ޖެހިފައިވާ ކުދިންނަށެވެ، އެ ޕްރޮގްރާމް އަކީ ސަރުކާރުގެ ވައުދެެކެވެ. ތިން އަހަރު ކުރީން ހުރިހާ ސްކޫލެއްގައި ނާސްތާ ޕްރޮގްރާމް ފެށި ނަމަވެސް އެ ޕްރޮގްރާމް ވެފައި ވަނީ ފާޑުކިޔުން އަމާޒުވި އަދި ގޮންޖެހުން ވެސް ބޮޑު ޕްރޮގްރާމަކަށެވެ. އަދި ކޮވިޑާއެކު އެ ޕްރޮގްރާމް ވަނީ ފޭލިވެފަ އެވެ.

މިނިސްޓަރު އައިޝަތު އަލީ ވިދާޅުވި ގޮތުގައި ނާސްތާ ޕްރޮގްރާމަށް ބަދަލެއް ގެންނަން ނިންމީ ނާސްތާ ދިނުމުގެ މަރުހަލާގައި ހިނގާ އިސްރާފުކުރުމުގެ ކަންކަން ނިމުމަކަށް ގެންނާށެވެ. އަދި އެ ޕްރޮގްރާމަކީ ނީޑްބޭސް ޕްރޮގްރާމަކަށް ހަދާށެވެ.

"އިސްރާފައި ހަރަދާއި ހުރިހާ ކަމަކަށް ބެލުމަށް ފަހު އާ އަހަރު ފަށާ އިރު ބަދަލެއް އެބަ ގެންނަން. ކުރިއަށް އޮތްތަނުގައި މި ޕްރޮގްރާމް ވެގެންދާނީ ނީޑް ބޭސްޑް ޕްރޮގްރާމަކަށް" އެކަމަނާ ވިދާޅުވި އެވެ.

ނާސްތާ ޕްރޮގްރާމް މެދުކަނޑާލާފައި ވަނީޗ މިދިޔަ އަހަރުގެ އޮގަސްޓް މަހުގެ ތެރޭގައެވެ.