ނުރައްކާތެރި ބަލިތައް ފެތުރޭ ސަބަބު ހޯދަން އިލްމީ ދިރާސާއެއް ކުރަންޖެހޭ: ރައީސް

ރާއްޖޭގައި ގައިން ގަޔަށް ނާރާ ނުރައްކާތެރި ބަލިތައް ފެތުރެން ދިމާވާ ސަބަބުތައް ދެނެގަތުމަށް ފުޅާ ދާއިރާއެއްގައި އިލްމީ ދިރާސާތަކެއް ކުރަންޖެހޭ ކަމަށް ރައީސުލްޖުމް ހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ. 

ރައީސްގެ މި ގޮވާލުން ދުނިޔޭގެ ސިއްހަރު ދުވަހާ ގުޅުވައި ފޮނުއްވި ހިތޯބެއްގަ އެވެ. 

އެމަނިކުފާނު ވިދާޅުވީ އާންމު ސިއްހަަތު ރައްކާތެރިކުރަން ކެމިކަލްތަކާއި ސިއްހަތަށް ނުރައްކާތެރި ވިހަ މާއްދާތައް ބޭނުން ކުރުމުގެ ބަދަލުގައި، ރައްކާތެރި ގޮތުގައި ދަނޑުވެރިކަމުގެ އުފެއްދުންތައް ތައްޔާރު ކުރުމަށް މަސައްކަތްކުރުމަށާއި، ގުދުރަތީ ވެށި އޭގެ ތަބީއީ ދަމަހައްޓަން ގޮތުގައި ދެމެހެއްޓުމަށް، ގަދައަޅައި މަސައްކަތް ކުރަން ސަމާލުކަން ދޭންޖެހޭ ކަމަށެވެ. 

ރައީސް އެ ހިތޯބު މެދުވެރި ކުރައްވާ ވިދާޅުވިގޮތުގައި ރާއްޖޭގެ ކަނޑުފަޅުގެ ދިރުންތަކަށް އެއްވެސް ނުރައްކަލެއް ކުރިމަތިވިޔަ ނުދީ ރައްކާތެރި ގޮތުގައި ދަމަހައްޓަން މަސައްކަތް ކުރުމަކީ ދިވެހިންގެ ކާނާގެ ރައްކާތެރިކަން ކަށަވަރު ކުރުމަށް ކޮންމެހެން ކުރަންޖެހޭ ކަމެކެވެ. 

މިއަހަރުގެ ސިއްހަތު ދުވަހުގެ ޝިއާރު، "ސިއްހަތު އެންމެނަށް" ޝިއާރަކީ ރާއްޖޭގައި އަލުން ފުޅާ ކުރަން ޖެހޭ ޕަބްލިކް ހެލްތު ދާއިރާއާ ވަރަށް ގުޅުން ހުރި ޝިއާރެއް ކަމަށް ފާހަގަ ކުރައްވާ ރައީސް ވިދާޅުވީ ދައުލަތުގެ ފަރާތުން އިންތިޒާމީ ގޮތެއްގައި ރައްޔިތުންނަށް ސިއްހީ ހިދުމަތް ދިނުމުގައި ހޭދަވި މުއްދަތުގެ ތެރޭގައި އެންމެ ކާމިޔާބު ސިއްހީ ހިދުމަތުގެ ނިޒާމެއްގެ ގޮތުގައި އޮތީ ޕަބްލިކް ހެލްތުގެ ދާއިރާ ފުޅާކޮށްގެން ރައްޔިތުންގެ ދުޅަހެޔޮކަން ދެމެހެއްޓުމުގެ ނިޒާމު ކަމަށެވެ. 

ރާއްޖޭގެ މިހާރުގެ ހާލަތާއި ދިވެހިންގެ ދިރިއުޅުމުގެ ވައްޓަފާޅިއަށް އައިސްފައިވާ ބަދަލުތަކާއި، ދުނިޔޭގެ ސިއްހީ ހިދުމަތުގެ ދާއިރާއަށް އައިސްފައިވާ ކުރިއެރުންތަކަށް ބަލާއިރު، އާންމު ސިއްހަތުގެ ދާއިރާއަށް ވަރަށް ބޮޑު ސަމާލުކަމެއް ދޭންޖެހޭ ކަމަށް ވެސް ރައީސްގެ ހިތޯބުގައި ވިދާޅުވެފައިވާއިރު  ރާއްޖޭގެ ސިއްހީ ހިދުމަތުގެ ނިޒާމުން ފެންނަ މަންޒަރުތަކަށް ބަލާއިރު ދިވެހިންގެ ހަށިހެޔޮކަމާއި ދުޅަހެޔޮކަމަށް މިހާރު ކުރިމަތިވެފައިވާ އެންމެ ބޮޑު ނުރައްކަލަކީ، ގައިން ގަޔަށް ނާރާ ނުރައްކާތެރި ބަލިތައް ދިވެހިންގެ މެދުގައި ފެތުރެމުން ދިއުންކަމަށް ރައީސް ވިދާޅުވެފައި ވެއެވެ.

އަދި ވިދާޅުވީ މިފަދަ ބަލިތަކުގައި ފަރުވާ ހޯދަންޖެހޭ މީހުންގެ އަދަދު މަތިވަމުން ދިއުމަކީ، ސިއްހީ ހިދުމަތުގެ ނިޒާމަށް ކުރިމަތިވާ ވަރަށް ބޮޑު ގޮންޖެހުމެއް ކަމަށާއި އެފަދަ ބަލިތައް ދިވެހިންގެ މެދުގައި ފެތުރުމަށް މެދުވެރިވާ ސަބަބުތައް ދެނެގަތުމަށް، ފުޅާ ދާއިރާއެއްގައި ޢިލްމީ ދިރާސާތަކެއް ކުރުމުގެ މުހިންމުކަން ބޮޑު ކަމަށެވެ.