މަޑަވެލީ މާރާމާރީ ގުޅެނީ ޑުރަގާ ؛ އަނިޔާވި އަންހެން މީހާ ތިނަދުއަށް

މަޑަވެލީގައި މިއަދު ގަޔަށް އަތްލައި އަނިޔާކުރި މާރާމާރީގައި ގެއްލުންތައް ލިބުނު އަންހެން މީހާ މިރޭ ގދ. ތިނަދޫއަށް ގެންގޮސްފި އެވެ.

އަންހެން މީހާ ތިނަދޫއަށް ގެންގޮސްފައި ވަނީ މަޑެވެލީ ސިއްހީ މަރުކަޒުގައި ފަރުވާ ދިނުމަށް ފަހު ސޮމަދު ހޮސްޕިޓަލަށެވެ. އެ މީހާ ތިނަދޫއަށް ގެންގޮސް ދީފައި ވަނީ ފުލުހުންނެވެ.

އަންހެން މީހާ އޮބައިގަނެގެން، ފިރިހެން މީހާ އަނިޔާކުރާ މަންޒަރު ފެންނަ ވީޑިއޯތަކެއް ވެސް އާންމުވެ ދައުރުވަމުން ދެއެވެ. އެ ފިރިހެން މީހާ ވަނީ އަންހެން މީހާ މަގުމަތީގައި ދަމާ ކޫއްތައި އެތަށް ހިސާބަކަށް ގެންގޮސްފަ އެވެ. ފަޔާއި އަތުން އަންހެން މީހާގެ ގައިގައި ވަރަށް ބާރަށް ޖަހައި ހަދާފަ އެވެ. 

އެ އަނިޔާތައް ކުރީ އެ ރަށުގެ ވަރަށް ގިނަ ބަޔަކު އެ ސަރަހައްދަށް ވަނީ ޖަމާވެ މަންޒަރު ބަލާން ތިއްބަ އެވެ. އަންހެން މީހާއަށް އަނިޔާ ނުކުރުމަށް އެތާނގައި ތިބި ބައެއް މީހުން ގޮވަމުން ދިޔަ ނަމަވެސް އެކަމަކަށް އެ މީހާ ސަމާލު ކަމެއް ނުދެއެވެ.

އޭނާ ހުއްޓުވީ އަންހެން މީހާ މަގުމަތީގައި ދަމަމުން ގެންދަނިކޮށް އެތަނަށް ދިޔަ ޒުވާން ފިރިހެނެކެވެ. އޭނާ ވަނީ އެ ފިރިހެން މީހާގެ ގައިގައި އޮޅުލައިގަނެ ހުއްޓުވާފައެވެ. އޭނާ ހިފެހެއްޓުމުން ވެސް ގަދަ ކަން ދައްކަން މަސައްކަތްކޮށް އަންހެން މީހާއަށް އަލުން އަނިޔާ ކުރަން މަސައްކަތް ކުރެއެވެ.

ފުލުހުން މިރޭ ބުނީ މަޑަވެލީފައި ފިރިހެނަކު އަންހެނަކަށް އަނިޔާކުރި މައްސަލައެއްގައި 33 އަހަރުގެ ދިވެހި ފިރިހެނަކު ހައްޔަރު ކޮށްފައިވާ ކަމަށެވެ.

މަޑަވެލީ މީހުން ބުނާ ގޮތުން އަނިޔާ ކުރި ފިރިހެންް މީހާ އާއި އަނިޔާ ލިބުނު އަންހެން މީހާ އުޅެނީ ލޯބީގެ ގޮތުން ގުޅިގެނެވެ.
ފިރިހެން މީހާއަކީ މަޑަވެލީ މީހެކެވެ. އަންހެން މީހާ ނިސްބަތް ވަނީ ރ. އިނގުރައިދޫ އަށެވެ. އުމުރަކީ 30 އަހަރެވެ.

އެ ދެ މީހުން މަޑަވެއްޔަށް ދިޔައީ މީގެ ހަފްތާއެއްގެ ކުރީންނެވެ. ދެ މީހުންނަކީ ވެސް މަސްތުވާތަކެތި ބޭނުން ކުރާ ދެ މީހުން ކަމަށް އެ ރަަށު މީހުން ބުނެއެވެ. އެގޮތުން މިދިޔަ ދެ ތިން ދުވަހުވެސް އެ މީހުން މަސްތުގެހާލަތުގައި އެ ރަށުތެރޭ އުޅުނެވެ. އޭގެ ފަހުން މިއަދުގެ މާރާމާރީ ހިނގި ސަބަބެއް ނޭނގެ އެވެ.

"ރޭ ވެސް ދެ މީހުން މަސްތުގެ ހާލުގައި އުޅުނު. ދެން ފެނުނީ މިއަދުގެ ވީޑިއޯ. ވީގޮތެއް ނޭނގެ،" އެ ރަށުގެ ކައުންސިލް މެންބަރަކު ވިދާޅުވި އެވެ.

ފިރިހެން މީހާ އަންހެން މީހާއަށް އަނިޔާ ކުރިއިރު ކައިރިވާން ނުކުރި ތިބީވެސް އެ މީހާ ހުރި ހާލަތުން ކަމަށް އެ ތަނުގައި ތިބި ބައެއް މީހުން ބުނެ އެވެ.