މުދަލާއި ހިދުމަތުގެ އަގު ކޮންޓްރޯލް ކުރަން ގަރާރެއް

ސަރުކާރުން ޖީއެސްޓީ ބޮޑު ކުރުމާއި ގުޅިގެން މުދަލާއި ހިދުމަތުގެ އަގު ބޮޑުވެ، ރައްޔިތުންނަށް ބޮޑެތި ގޮންޖެހުންތަކާއި ކުރިމަތިވަމުންދާތީ، ތަކެތީގެ އަގުތައް ކޮންޓްރޯލް ކުރަން ސަރުކާރަށް ގޮވާލައި ރައްޔިތުންގެ މަޖިލީހަށް ގަރާރެއް ހުށަހަޅައިފި އެވެ.

މި ގަރާރު ރައްޔިތުންގެ މަޖިލީހަށް ހުށަހެޅުއްވީ މަޑުއްވަރީ ދާއިރާގެ މެމްބަރު އާދަމް ޝަރީފެވެ. އޭނާގެ ގަރާރުގައި ބަޔާން ކޮށްފައި ވަނީ، ނޭޝަނަލް ބިއުރޯ އޮފް ސްޓެޓިސްޓިކް އިން އާންމު ކޮށްފައިވާ ތަފާސްހިސާބުން ދައްކާ ގޮތުގައި މިދިޔަ އަހަރު ކާބޯތަކެއްޗާއި މުދަލާއި ހިދުމަތުގެ އަގު 7.83 ޕަސެންޓް އިތުރުވެފައިވާ ކަމަށާއި މިއަހަރުގެ ޖެނުއަރީ މަހުން ފެށިގެން އިތުރު އަށް ޕަސެންޓް ބޮޑުވެފައިވާ ކަމަށެވެ.

ނިސްބަތުން މިދިޔަ އަހަރު 75 ޕަސެންޓަށްވުރެ އިންފްލޭޝަން އުފުލިފައިވާ ކަމަށާއި ކާބޯތަކެތީގެ ހިދުމަތްދޭ ތަންތަނުގެ އަގުތައް 4.3 ޕަސެންޓް ބޮޑުވެފައިވާކަން ތަފާސް ހިސާބުން އެނގޭ ކަމަށެވެ. 

އަދި އެ ގަރާރުގައި ބުނެފައި ވަނީ، މި ހިސާބުތަކަށް ބަލާއިރު ކަންބޮޑުވާ މިންވަރަށް އިންފްލޭޝަން މަތިވަމުންދާ ކަމަށާއި، ރާއްޖޭގައި އުފައްދާ ތަކެތީގެ އަގުތަކާއި ހިދުމަތުގެ އަގުތައް އުފުލެމުންދާ ކަމަށެވެ. 

ހާއްސަ ގޮތެއްގައި ރޯދަ މަހު އާންމުކޮށް ރައްޔިތުން ބޭނުންކުރާ ކާބޯތަކެތީގެ އެކި ބާވަތްތަކުގެ އަގުތައް އުފުލެމުންދާ ކަމަށާއި، އަނެއްކޮޅުން ޖޫރިމަނާ އާއި އެކި ނަންނަމުގައި ރައްޔިތުން ސަރުކާރަށް ފައިސާ ދައްކަން ޖެހޭ މިންވަރު ވެސް ދުވަހެއް ދުވަހަކަށް އިތުރުވަމުންދާ ކަމަށެވެ.

ސަރުކާރުން ބޮޑުކުރި ޖީއެސްޓީ އަލުން މުރާޖާކޮށް، ސަރުކާރު ހިއްސާވާ ކުންފުނިތަކުގެ އަގު ހެޔޮކުރަން އެ ގަރާރުގައި ގޮވާލާފައިވެ އެވެ. އަދި މުދަލުގެ އަގު ކޮންޓްރޯލް ކުރެވޭނެ ގޮތްތަކެއް ސަރުކާރުން ރާވައި، ހާއްސަކޮށް ރޯދަމަހު ބާޒާރުގައި ވިއްކާ ތެކެތީގެ އަގު އަތްފޯރާ ފަށުގައި ހިފެހެއްޓޭނެ އިންތިޒާމްތައް ހަމަޖައްސައިދިނުމަށް ގޮވާލާފައިވެ އެވެ.

ޓެކްސް ގާނޫނަށް ގެނައި އިސްލާހާއެކު މިއަހަރުގެ ފުރަތަމަ ދުވަހުން ފެށިގެން ޖީއެސްޓީ ހަ ޕަސެންޓުން އަށް ޕަސެންޓަށް އަދި ޓީޖީއެސްޓީ 12 ޕަސެންޓުން 16 ޕަސެންޓަށް ވަނީ ބޮޑުކޮށްފަ އެވެ.