އަނގޮޅިތީމު ކުރިއަރުވަން އެރަށު އާއިލާއަކުން ޖަމިއްޔާއެއް އުފައްދައިފި
ކަޒިންސް ޔުނިޓީ ޓޫވާޑްސް އެމްޕަވާމެންޓް (ކިއުޓް) ގެ ނަމުގައި އުފެއްދި ޖަމިއްޔާ ހުކުރު ދުވަހުގެ ރޭ ވަނީ އިފްތިތާހު ކޮށްފައެެވެ.
ރ. އަނގޮޅިތީމުގެ ތަަރައްގީއަށް އެހީތެރިވެ ދިނުމުގެ ގޮތުން އެ ރަށުގެ އާއިލާއަކުން ޖަމިއްޔާއެއް އުފައްދާ މަސައްކަތް ފަށައިފި އެވެ.
ކަޒިންސް ޔުނިޓީ ޓޫވާޑްސް އެމްޕަވާމެންޓް (ކިއުޓް) ގެ ނަމުގައި އުފެއްދި ޖަމިއްޔާ ހުކުރު ދުވަހުގެ ރޭ ވަނީ އިފްތިތާހު ކޮށްފަ އެެވެ. އެ ޖަމިއްޔާ އިފްތިތާހު ކޮށްދެއްވީ "މި" ނޫހުގެ ޑެޕިއުޓީ އެޑިޓަރު އަހްމަދު ހަމީދު އާދަމެވެ.
އަނގޮޅިތީމު ރައްވިލާގޭ އާމިނަތު ނުވަތަ އާސަ އައިމިނެގެ ދަރިންގެ ދަރިން އިސްވެ އުފެއްދި މި ޖަމިއްޔާއަކީ އެ ރަށުގައި އަދި އެ އަތޮޅުގައި ވެސް އާއިލާއަަކުން އިސްވެ އުފެއްދި ފުރަަތަމަ ޖަމިއްޔާ އެވެ. ޖަމިއްޔާގެ މެންބަރުންގެ ގޮތުގައި މުޅީންވެސް ތިބޭނީ އެ އާއިލާގެ މެންބަރުންނެވެ.
"ފުރަތަމަ ވައިބާ ގައި އާއިލާ ގުރޫޕެއް އުފެއްދީ. ދެން އެގުރޫޕް ގައި އަބަދުވެސް ވާހަކަ ދެކެވި ކަޒިންސްގެ މެދުގައި އެކުވެރިކަން އާލާވެ އެންމެ ފަހުން ޖަމިއްޔާ އެއް އުފެއްދުމުގެ ހިޔާލު މިދިޔަ އަހަރު ގައި އުފެދުނީ. މި ގޮތަށް ޖަމިއްޔާ އެއް އުފެއްދީމަ އިތުރަށް ގުޅުން ބަދަހިވެގެންދާނެ ކަމަށް އަޅުގަނޑުމެން ގަބޫލުކުރަނީ. އަސްލު މި އާއިލާގެ ގުޅުން ރަނގަޅު ކުރުމާއި އެ ގުޅުމުގެ ތެރެއިން މުޖުތަމައަށް ހިދުމަތްކޮށް ދިނުން ބޭނުމަކީ،" ކިޔުޓުގެ ފުރަތަމަ ދައުރުގެ ރައީސް އިބްރާހިމް ފިކުރީ ވިދާޅުވި އެވެ.
ޖަމިއްޔާ އިފްތިތާހު ކުރުމަށް ބޭއްވި ޖަލްސާގައި މަގާމުތަކަށް މެންބަރުން އައްޔަން ކޮށް ލިޔުން ހަވާލުކޮށްފައި ވެއެވެ. އަދި ޖަމިއްޔާ ރަސްމީކޮށް އުފެދުމުގެ ކުރީން ކުރެވިފައިވާ ބައެއް މަސައްކަތްތަކާއި މި އަހަރަށް ރާވާފައިވާ މަސައްކަތްތައް ވަނީ ހިއްސާ ކޮށްފައެވެ.
އެގޮތުން މިދިޔަ އަހަރު އެ ރަށުގައި ހިންގުނު ދީނީ އެކި ހަރަކާތްތައް ޖަމިއްޔާ އިން އިންތިޒާމު ކުރި އެވެ. އަދި ރ އަތޮޅުގައި ކުރިއަށް ދިޔަ "ރިހުލާ" ގައިވެސް ބައިވެރިވި އެވެ. މި އަހަރަށްވެސް ރަށުގެ އަންހެނުންނާއި ފިރިހެނުންނަށް ހާއްސަ މުބާރާތްތަކާއި ދީނީ އަދި އިޖްތިމާއީ ހަރަކާތްތައް ހިންގަން ވަނީ ރާވާފައެވެ.
މި ޖަލްސާގައި ކިޔުޓު ޖަމިއްޔާ އިން ވަނީ ކުރިއަށް އޮތް ރޯދަ މަހަށް އަނގޮޅިތީމު ގެ "މަސްޖިދުއްނޫރޫ" ގައި ހަރުކުރުމަށް ނުވަ އޭސީ ވެސް ކައުންސިލާއި ހަވާލުކޮށްފައެވެ. އެ މަސައްކަތް މިއަދު ފަށާނެ ކަމަށް ކައުންސިލުން ވަނީ ބުނެފައެވެ.
މިސްކިތް އޭސީ ކުރުމަކީ ކައުންސިލާއި ރައްޔިތުން ވަރަށް ބޮޑަށް ބޭނުންވެފައިވާ ކަމެކެވެ.
އަނގޮޅިތީމަކީވެސް އެހެން ރަށްރަށެކޭ އެއްގޮތަށް ގިނަ ޖަމިއްޔާތަކެއް އުފައްދާފައިވާ ރަށެކެވެ. ބައެއް ޖަމިއްޔާތަކުން ކުރީން ވަރަށް ހަރަކާތްތެރިވި އެވެ. "ކިއުޓު" އުފެދުނީ ޖަމިއްޔާތަކުގެ ހަރަކާތްތައް ފަނޑުވެފައިވާ ދަނޑިވަޅެއްގައެވެ.
ކޮމެންޓް
Republic of Maldives