ރައީސް ގަތަރާއި ޖަރުމަނު ދަތުރުފުޅު ނިންމަވާލައްވައިފި

ރައީސް އިބްރާހިމް މުހައްމަދު ސޯލިހު ގަތަރާއި ޖަރުމަނަށް ކުރެއްވި ރަސްމީ ދަތުރުފުޅު ނިންމަވައިލެއްވުމަށް ފަހު މާލެ ވަޑައިގެންފި އެވެ.

ރައީސްގެ މި ދަތުރުފުޅުގައި އެންމެ ފުރަތަމަ ވަޑައިގެންނެވީ ގަތަރަށެވެ. އެމަނިކުފާނު ވަނީ ދޯހާގައި ކުރިޔަށްދިޔަ އދ ގެ އެންމެ ކުޑަކޮށް ތަރައްގީވެފައިވާ ގައުމުތަކުގެ ފަސްވަނަ ކޮންފަރެންސްގެ ޖެނެރަލް ޑިބޭޓްގައި ވާހަކަފުޅު ދައްކަވާފަ އެވެ. 

ރައީސް ދެން ވަޑައިގަތީ ޖަރުމަނަށެވެ. ޖަރުމަނަށް ވަޑައިގެންނެވި ދަތުރުފުޅުގައި އަނބިކަނބަލުން ފަޒްނާ އަހުމަދު ވެސް ވަނީ ބައިވެރިވެވަޑައިގެންފަ އެވެ. ބާލިންގައި މިހާރު ކުރިޔަށްދާ ދުނިޔޭގެ ފަތުރުވެރިކަމުގެ އެންމެ ބޮޑުފެއާ ކަމުގައިވާ، އިންޓަނޭޝަނަލް ޓޫރިޒަމް ބޯސޭ (އައިޓިބީ) ބާލިން ފެއާއަށް ޒިޔާރަތް ކުރައްވާފައިވެ އެވެ.

މީގެ އިތުރުން، ޖަރުމަނުގައި ހުންނަވާ ރާއްޖޭގެ އޮނަރަރީ ކޮންސުލް ޖެނެރަލް، ކްރިސްޓިއަން ފޮން ސްޓެޓެން އަދި އޮނަރަރީ ކޮންސުލް، އެންޑްރިއާސް ޕީޓާ ވިއްޓެ ވަނީ ރައީސް އާއި ބައްދަލުކުރައްވައިފަ އެވެ. މި ދަތުރުފުޅުގެ އެންމެ ފަހުގެ ރަސްމީ ބައްދަލުވުމެއްގެ ގޮތުން ރައީސް ވަނީ ޖަރުމަނުގެ ރައީސް ފްރޭން-ވޯލްޓާ ސްޓެއިންމިއާ އާ ވެސް ބައްދަލުކުރައްވައިފަ އެވެ.