އިސްރާއީލު އެއާލައިނަށް ރާއްޖެއިން ޖާގައެއް ނެތް: ސަރުކާރު
ރާއްޖޭއާއި އިސްރާއީލާ ދެމެދު ވިޔަފާރީގެ ގުޅުމެއް މިހާރު ނޯންނަ ކަމަށާއި، އެއާ ސާވިސް އެގްރީމެންޓެއް ވެސް ނޯންނާނެ ކަމަށް ސަރުކާރުން ބުންޏެވެ.
އިސްރާއީލުގެ އެއާލައިނަކުން ރާއްޖެއަށް ދަތުރުތައް ފެށުމަށް ސަރުކާރަށް ހުށަހަޅާފައި ނުވާ ކަމަށާއި އެފަދަ ކަމެއް ނުވެސް ކުރެވޭނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެ އެވެ.
ރައީސް އޮފީހުން މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބުދެއްވަމުން މިއުވާން ވިދާޅުވީ އިސްރާއީލުގެ އެއާލައިނަކުން ރާއްޖެއަށް ދަތުރުކުރުމަށް ޝައުގުވެރިވާ ވާހަކަ ބޭރުގެ ބައެއް ނޫސްތަކުން ރިޕޯޓުކުރި ނަމަވެސް، އެފަދަ އެއްވެސް ހުށަހެޅުމެއް ލިބިފައި ނުވާކަމަށެވެ.
ރާއްޖޭއާއި އިސްރާއީލާ ދެމެދު ވިޔަފާރީގެ ގުޅުމެއް މިހާރު ނޯންނަ ކަމަށާއި، އެއާ ސާވިސް އެގްރީމެންޓެއް ވެސް ނޯންނާނެ ކަމަށެވެ. އެހެން ކަމުން، ދެ ގައުމުގެ ދެމެދުގައި ސީދާ ދަތުރުތައް ބޭއްވުމަކީ ވާނެ ކަމެއް ނޫން ކަމަށް އޭނާ ވިދާޅުވިއެވެ.
"އެފަދަ އެއްބަސްވުމެއް، ނުވަތަ އެފަދަ ދަތުރުތަކެއް ކުރެވޭނެ އިންތިޒާމެއް ހަމައެއް ނުޖެހޭނެ،" މިއުވާން ވިދާޅުވިއެވެ.
ރާއްޖެއަށް ދަތުރުތައް ފެށުމަށް ޝައުގުވެރިކަން ފާޅުކުރި އިސްރާއީލުގެ އެއާލައިނަކީ އެގައުމުގެ ގައުމީ އެއާލައިން އެލް އާލްއެވެ. އެ އެއާލައިނުގެ ސީއީއޯއާ ހަވާލާދީ އެ ވާހަކަ ރޮއިޓާސް ގައި ރިޕޯޓުކޮށްފައިވެއެވެ.
މީގެ ކުރިން 2011 ވަނަ އަހަރުވެސް އެ އެއާލައިނުން ރާއްޖެއަށް ސީދާ ދަތުރުތައް ފަށަން މަސައްކަތް ކުރިއެވެ. އެ ފަހަރު އެ މައްސަލަ ހޫނުވެ، އެކަމާ ދެކޮޅަށް މުޒާހަރާ ވެސް ކޮށްފައިވެއެވެ.
ކޮމެންޓް
Republic of Maldives