ފުލުހުން ޓޭޒާ ބަޑި ބޭނުން ކުރަން ފަށައިފި

ކަރަންޓު ޝޮކެއް ދީގެން މީހުން ހުއްޓުވާ، ޓޭޒާ ބަޑި ފުލުހުން ބޭނުން ކުރަން ފަށައިފި އެވެ.

ކޮމިޝަނާ އޮފް ޕޮލިސް މުހައްމަދު ހަމީދު މިއަދު ކުރެއްވި ޓްވީޓެއްގައި ވިދާޅުވީ ފުލުހުން މިއަދު ޓޭޒާ ބަޑި ބޭނުން ކުރަން ފަށާފައިވާ ކަމަށެވެ. ބަޑި ބޭނުން ކުރަން ފަށާނީ ސާޖެންޓު އަދި އެއަށްވުރެ މަތީ ރޭންކުތަކުގެ ފުލުހުންގެ ތެރެއިން އެކަމަށް ހާއްސަ ތަމްރީނު ލިބިފައިވާ ފުލުހުންނެވެ.

ފުލުހުން ވަނީ މީގެ ކުރިން އެ ބަޑި ބޭނުން ކުރާނެ ޑެމޯއެއް ދައްކާލައިފަ އެވެ. އެގޮތުން ކޮޅުގައި ކައްޓެއް އިންނަ ކުޑަ ނަރުކޮޅެއް ފަދަ އެއްޗެއް ޓޭޒާ ބަޑިން ދޫކޮށްލުމުން މީހާގެ ގަޔަށް ހެރި، ފަސް ސިކުންތުގެ ޝޮކެއް ޖެހެ އެވެ. ގަޔަށް ހެރޭ ވަގުތު ބައެއް މީހުން ބިން މައްޗަށް ވެއްޓި ވެސް ދާނެ އެވެ.

އެފަދަ މީހަކަށް ފަރުވާ ދޭން ޖެހޭ ހާލަތެއް އަދުވެދާނެ ކަމަށް ބަލައި، ފުލުހުން ތިބޭނީ އެކަމަށް ވެސް ތަމްރީނު ކޮށްފަ އެވެ. ބަޑި ބޭނުން ކުރުމަށް ފަސް ދުވަހުގެ ތަމްރީނު ޕްރޮގްރާމެއް ފުރިހަމަ ކުރަން ޖެހެ އެވެ.

ފުލުހުން މި ބަޑި ނަގާ ހިސާބުން ފެށިގެން ބޮޑީކެމް އިން ލައިވް ފީޑް ދޫކުރަން ފަށާނެ އެވެ. އެ އޮފިސަރުގެ ނަމާއި ސާވިސް ނަންބަރު މި ލައިވް ފީޑުން އެނގޭނެ އެވެ.