އަނެއްކާވެސް ފުލުހުގެ ސަމާލު ކަމަށް ސަފާރީ ރޭޕެއް

މާލޭ ސިޓީގެ ހުޅުމާލޭ ފަޅުގައި އޮތް ސަފާރީއެއްގައި ޓޫރިސްޓަކު ރޭޕްކުރި ކަމަށް ބުނާ މައްސަލައެއް ފުލުހުންގެ ސަމާލު ކަމަށް އައިސްފައިވާ ކަމަށް އެ އިދާރާއިން ބުނެފި އެވެ. އެކަމާ ގުޅޭ ތަހުގީގެއް ވެސް ފަށާފައި ވެއެވެ.

މި މައްސަލަ ފެންމަތިވެފައި ވަނީ ރާއްޖޭގައި މަސައްކަތްކުރާ ބޭރު މީހުން ތިބޭ ފޭސްބުކް ގުރޫޕެއްގައި މީގެ ދުވަހެއް ކުރިން، ބޮލީނާސް ރޮޝޭލް ކިޔާ މީހަކު ކުރި ޕޯސްޓަކާ ހަމައިންނެވެ. އޭނާގެ އެ ޕޯސްޓުގައި ބުނެފައިވާ ގޮތުގައި ރޭގަނޑެއްގެ 1:00 އާއި 1:30 އާ ދެމެދު ހުޅުމާލޭގެ ސަރަހައްދަކުން ދުވެފައި ދިޔަ އަންހެނަކު ފެނުނެވެ. 

ދުވަމުން ދިޔަ އެ އަންހެން މީހާ ހުރީ ކަސްރަތަށް ދުވާމީހުން ލާކަހަލަ ހެދުމެއްގައި ނޫން ކަމަށާއި، ވަކި ހިސާބަކަށް ދުވެފައި  ހުއްޓުމުން، އެކުވެރިންނާއެކު ގޮސް އެ އަންހެން މީހާގެ ހާލު ބެލި ކަމަށެވެ. އަދި އެއީ ދޮން ނަސްލުގެ ޓޫރިސްޓެއް ކަމަށާއި، އިނގިރޭސި ބަހަށް އޭނާ ކޮށި ކަމަށެވެ. 

"އޭނާ ހުރީ ބިރުން ގޮސް ހަލާކުވާވަރު ވެފައި، އަދި ދިޔައީ ތުރުތުރު އަޅަމުން" އެ ޕޯސްޓުގައި ލިޔެފައި ވެއެވެ.

އެ ޕޯސްޓުގައި ވާ ގޮތުން، ސަފާރީއެއްގައި ފަސް ފިރިހެނަކު ވެގެން ފަތުރުވެރި އަންހެން މިހާ ރޭޕްކުރި ކަމަށް އޭނާ ކިޔައިދިނެވެ. ބެލެވޭ ގޮތުގައި އޭނާއަށް ހުރީ ކޮންމެވެސް ކަހަލަ މަސްތުވާއެއްޗެއް ވެސް ދީފަ އެވެ. އަންހެން މީހާއާ ހަވާލާދީ ބުނި ގޮތުގައި އެ މީހާއަށް ހޭލެވުނު އިރު ގައިގައި އަނިޔާގެ ނިޝާންތަކެއް ހުއްޓެވެ.

ރޮޝޭލް ބުނީ އެ އަންހެންމީހާ ގާތުގައި ފުލުހަށް ދާން އެދުމުން ވެސް އެކަމާ ދެކޮޅުހެދި ކަމަށާއި އޭނާ އަކީ ފަތުރުވެރިއަކަށްވުމުން ކަމުން ފުލުހުން އޭނާއަށް އެހީވާންވީ ކީއްވެތޯ ވެސް އޭނާ ސުވާލުކުރި ކަމަށެވެ.

މީގެ ކުރީ 2020 ވަނަ އަހަރުގެ ތެރޭގައި ވެސް ހުޅުމާލޭގެ ފަޅުގެ ސަފާރީއެއްގައި ކެންޔާގެ އަންހެނަކު ރޭޕް ކުރި މައްސަލައެއް ފެންމަތިވެ އެކަމާ ގުޅިގެން އެތައް ހާދިސާއެއް ހިނގާފައި ވެއެވެ.