ފުލުގައި އޮތް ސައުތެމްޓަން ޗެލްސީ ބަލިކޮށްފި

އިނގިރޭސި ޕްރިމިއާ ލީގުގައި ރޭ ލީގުގެ އެންމެ ފުލުގައި އޮތް ސައުތެމްޓަން އަރާ 1-0 އިން ވަރުގަދަ ޗެލްސީ ބަލި ވެއްޖެ އެވެ. 

އަނެއްކޮޅުން މެންޗެސްޓާ ސިޓީ އާއި ނޮޓިންހަމް ފޮރެސްޓް 1-1 އިން އެއްވަރުވި އިރު އާސެނަލް އިއްޔެ ހަވީރު އެސްޓަންވިލާ 4-2 އިން ބަލިކޮށް އެއްވަނާގައި މަގާމު ދިފާއު ކޮށްފަ އެވެ.

މިހާރު ސިޓީ ލީގުގެ ދެވަނައިގައި އޮތީ 52 ޕޮއިންޓާ އެކު އެވެ. އާސެނަލް 54 ޕޮއިންޓާ އެކު އެއްވަނައިގަ އެވެ. އެ މީހުން އަތުގައި އެއް މެޗު އެބައޮތެވެ. އެހެން ކަމުން ރޭ ސިޓީއަށް ޕޮއިންޓަކުން ފުއްދާލެވޭ ގޮތް ވުމަކީ އާސެނަލަށް ލިބުނު ވަރަށް ބޮޑު ހިތްހަމަ ޖެހުމަކަށް ވާނެ އެވެ.

ޗެލްސީ ރޭ އަމިއްލަ ދަނޑު ސްޓޭމްފޯޑް ބްރިޖްގައި 1-0 އިން ބަލި ވެގެން ދިޔައީ ލީގުގެ ފުލުގައި އޮތް އަދި ރަސްމީ ކޯޗަކު ވެސް ނެތް ސައުތެމްޓަން އަތުންނެވެ. ހިލޭ ޖެހުމެއްްގައި ސައުތެމްޓަން އަށް ލަނޑު ކާމިޔާބު ކޮށްދިނީ ފުރަތަމަ ހާފްގެ ފަހުގައި ކެޕްޓަން ޖޭމްސް ވޯޑް ޕްރޯސް އެވެ. މި ނަތީޖާއާއެކު ޗެލްސީ އޮތީ ލީގުގެ 10 ވަނައިގަ އެވެ. ޗެލްސީއަށް އެންމެ ފަހުން ޕްރިމިއާ ލީގުގައި މޮޅެއް ވެފައި ވަނީ ކްރިސްޓަލް ޕެލެސް އަތުންނެވެ.

ޗެލްސީން މޮޅު އެތައް ކުޅުންތެރިންނަކާއެކު މޮޅަށް ކުޅެފައި ވި ނަމަވެސް އެ ޓީމަށް ވަނީ ގޯލު ޖެހުމުގެ މައްސަލަ ދިމާވެފަ އެވެ. އަދި ކޯޗް ގްރެހަމް ޕޮޓާއާއެކު ޗެލްސީއަށް ކާމިޔާބީ ނުހޯދި ދާ ދިއުމަށް ނިމުމެއ ނާތީ ވަނީ ފާޑުކިއުމާއެކު ޕްރެޝަރު ކުރިމަތިވެފަ އެވެ.

ރޭ އެވަޓަން އިން ވަނީ ލީޑްސް ޔުނައިޓެޑް 1-0 އިން ބަލިކޮށްފަ އެވެ. އަދި ކްރިސްޓަލް ޕެލެސް އާއި ބްރެންޓްފޯޑް 1-1 އިން އެއްވަރުވި އިރު ބޯންމަތް އިން ވަނީ 1-0 އިން ވުލްވްސް ބަލިކޮށްފަ އެވެ. ފުލަމް އިން ވަނީ 1-0 އިން ބްރައިޓަން ބަލިކޮށްފަ އެވެ.