މާރާމާރީގައި ޒަހަމްވި މީހާ މާލެ ގެންނަނީ

އައްޑު އަތޮޅު ހިތަދޫގައި ރޭ ހިންގި މާރާމާރީގައި އަނިޔާވި މީހާ އިތުރު ފަރުވާއަށް މާލެ ގެންނަން ނިންމައިފި އެވެ.

ވެރިރަށް ހިތަދޫގައި ވަޅި ބޭނުންކޮށްގެން މާރާމާރީއެއް އައީ 18 އަހަރުގެ ކުއްޖަކާއި 54 އަހަރުގެ މީހަކާ ދެމެދު އެވެ. މި ހަމަލާގައި އަނިޔާވި މެދު އުމުރުގެ މީހާއަށް އިކްއެޓޯރިއަލް ހޮސްޕިޓަލްގެ އައިސީޔޫގައި ދަނީ ފަރުވާ ދެމުންނެވެ.

އައްޑޫ އިކުއަޓޯރިއަލް ހޮސްޕިޓަލުން ބުނި ގޮތުގައި އިތުރު ފަރުވާއަށް އެ މީހާ މާލެ ފޮނުވާލަން ވަނީ ނިންމާފައެވެ.

މޭމައްޗަށް ދިން ހަމަލާއާ ގުޅިގެން ފުއްޕާމެއަށް ލޭ އެޅިފަވާ ކަމަށްވެސް ބުންޏެވެ.

މާރާމާރީގައި 18 އަހަރުގެ ކުއްޖާއަށް ވެސް އަނިޔާވެފައި ވެއެވެ. ނަމަވެސް ފުލުހުން ވަނީ އޭނާ ހައްޔަރުކޮށް މާރާމާރީއާ ގުޅޭ ތަހުގީގެއް ފަށާފަ އެވެ.

އައްޑޫގައި ރޭ މާރާމާރީ ހިންގި އިރު މިދިއަ ހަފުތާއެއްހާ ދުވަހުގެ ތެރޭގައި މާލޭގައި މާރާމާރީ ހިންގުން އިތުރުވެފައި ވެއެވެ.