ސްޓޫޑެންޓް ލޯނުގެ 720 ފުރުސަތު، ޕީއެޗްޑީގެ 15 ޖާގައެއް

ސަރުކާރުގެ ސްޓޫޑަންޓު ލޯން ސްކީމުގެ ދަށުން، ރާއްޖެއާއި، ރާއްޖެއިން ބޭރުގައި ކިޔަވާ ދަރިވަރުންނަށް 720 ފުރުސަތަކަށް މިއަދު ހުޅުވާލައިފި އެވެ.

މި ފުރުސަތުތައް އިއުލާން ކުރައްވަމުން ހަޔަ އެޑިއުކޭޝަން މިނިސްޓަރު ޑރ. އިބްރާހިމް ހަސަން މިއަދު ވިދާޅުވީ ކުރީގެ އަހަރު ފަދައިން މިއަހަރު ވެސް އިދާރީ ފީގެ ގޮތުގައި ލޯނުގެ އެއް ޕަސެންޓް ނަގަން ނިންމާފައިވާ ކަމަށެވެ. 

"ދަރިވަރުން ލޯނު ނަގާއިރު ލޯނަށް އަރާ ޖުމްލަ އަދަދު އެނގޭނެ. އަދި އެ އަދަދު ފަހުން ބަދަލެއް ނުވާނެ،" މިނިސްޓަރު ވިދާޅުވި އެވެ.

މިފަހަރުގެ ލޯނު ފުރުސަތުތައް ހުޅުވާލާފައި އޮތީ ޑިޕްލޮމާއިން ފެށިގެން، ޕީއެޗްޑީ ފެންވަރާ ހަމައަށް ކިޔަވަން ބޭނުންވާ ދަރިވަރުންނަށެވެ. އެގޮތުން ނުކުޅެދުންތެރިކަން ހުންނަ ފަރާތްތަކަށް ހާއްސަކޮށް، ޑިޕްލޮމާ ފެންވަރަށް ކިޔެވުމަށް ހާއްސަ ފުރުސަތުތަކެއް ހުޅުވާލާފައި ވެސް ވެއެވެ. 

މީގެ އިތުރުން ސަރުކާރުގެ ހިލޭ ޑިގްރީ ޕްރޮގުރާމުގައި ކިޔަވަމުންދާ ދަރިވަރުންނަށް އިތުރު ހަރަދުތައް ހަމަޖެއްސުމަށްޓަކައި ލޯނަށް ކުރިމަތިލެވޭނެ އެވެ. ކުރިޔާ ހިލާފަށް، މި އަހަރު އެ ލޯނަށް ހުރިހާ ދާއިރާއެއްގެ ކޯސްތައް ހަދަމުންދާ ދަރިވަރުންނަށް ވެސް ކުރިމަތިލެވޭނެ އެވެ. 

މިނިސްޓަރު ވިދާޅުވި ގޮތުގައި މި އަހަރުގެ ލޯނަށް ހުޅުވާލިއިރު، އާންމުކޮށް ޑިމާންޑު ބޮޑު ތިން ދާއިރާއެއްގެ ކޯސްތަކަށް ވަނީ ފުރުސަތު އިތުރުކޮށްދީފައިވާނެ ކަމަށެވެ.

ޕީއެޗްޑީ ފެންވަރަށް ކިޔެވުމަށް 15 ފުރުސަތެއް ވެސް މި ފަހަރު ވަނީ ހުޅުވާލާފައެވެ. 

މިނިސްޓަރު ވިދާޅުވީ އެ ފުރުސަތުތަކަކީ ޕްރައިވެޓް ކޮލެޖުތައް ބާރުވެރި ކުރުވުމުގެ މަގުސަދުގައި ކުރިއަށް ގެންދާ ޕްރޮޖެކްޓެއް ކަމަށާއި އެހެންކަމުން، އެ ފުރުސަތުތަކަށް ކުރިމަތިލެވޭނީ ޕްރައިވެޓް ކޮލެޖެއްގެ އެންޑޯސްމަންޓާއެކު ކަމަށެވެ.

ކުރިން ސްޓޫޑެންޓް  ލޯނު ނަގާފައިވާ ދަރިވަރުންގެ ތެރެއިން، އަމިއްލަ އިހުތިޔާރުގެ ބޭރުން ހިނގާ ކަމަކާ ގުޅިގެން، ކޯސް ފުރިހަމަ ނުވާ ދަރިވަރުންނަށް ލޯނު މުއްދަތު އިތުރު ކުެަން އެދުމުގެ ފުރުސަތު ވެސް ހުޅުވާލާފައި ވެއެވެ.

އެ ލޯނުގެ އެޕްލިކޭޝަން ހުށަހަޅަން ޖެހޭނީ ހަޔަ އެޑިއުކޭޝަން މިނިސްޓްރީގެ އޮންލައިން ޕޯޓަލް މެދުވެރިކޮށެވެ. 

މިއަދުން ފެށިގެން އަންނަ މަހުގެ އެއްވަނަ ދުވަހާ ހަމައަށް ހުށަހަޅާ އެޕްލިކޭޝަން މިނިސްޓްރީން ބެލުމަށް ފަހު ރަނގަޅު ކުރަންޖެހޭ ނަމަ އެ ފުރުސަތު ދޭނެ އެވެ. އެޕްލިކޭޝަން ހުށަހެޅުމުގެ ސުންގަޑިއަކީ މާޗް 15 އެވެ