އިދިކޮޅުން އޮޅުވާލަނީ، ބިމެއް ނުވިއްކަން، 99 އަަހަރަށް ކުއްޔަށް ދެނީ: ސަރުކާރު

ތިލަފުށިން ބޭރު ބަޔަކަށް ބިން ވިއްކަން އުޅޭ ކަމަށް ބުނެ ދައްކާ ވާހަކަ އަކީ ބޮޑު އޮޅުވާލުމެއް ކަމަށް ސަރުކާރުން މިއަދު ބުނެފި އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ އޮފީހުގެ ތަރުޖަމާނު މިއުވާން މުހައްމަދު ވިދާޅުވީ ބޭރު ބަޔަކަށް ރާއްޖޭގެ ބިން މިލްކުވާ ގޮތަށް ކުއްޔަށް ދިނުމަކީ ރާއްޖޭގެ ގާނޫނު އަސާސީއާ ވެސް ހިލާފު ކަމެއް ކަމަށެވެ.

"އެ ބޭފުޅުން [އިދިކޮޅު ފަރާތްތަކުން] ހަމަ ރައްޔިތުންނަށް އޮޅުވާލައިގެން އެ ގޮތަށް އެ ވިދާޅުވަނީ. އެޗްޑީސީގެ އިއުލާނުގައި ވެސް އޮންނާނެ ވަރަށް ސާފުކޮށް އޮންނާނެ ކުއްޔަށް ދޫކުރާ ވާހަކަ،" މިއުވާން ވިދާޅުވިއެވެ.

މީގެ އިތުރުން ތިލަފުށިން ވިއްކަން ހަމަޖެހިފައިވާ ބިންތަކުގެ 90 އިންސައްތަ ދިވެހިންނަށް ހާއްސަ ކުރުމަށް ނިންމާފައިވާ ކަމަށް މިއުވާން ވިދާޅުވިއެވެ.

ތިލަފުށިން ސިނާއީ ބޭނުންތަކަށް ބިން ދޫކުރުމަށް އެޗްޑީސީން ހުޅުވާލީ މިމަހުގެ ދެވަނަ ދުވަހުއެވެ. އެ އިއުލާނުގައި ވާގޮތުން ބީލަން ހުށަހެޅުމުގެ ފުރުސަތު ދިވެހިންނާއި، ބޭރު މީހުންނަށް ވެސް ވަނީ ހުޅުވާލެވިފައެވެ. ދިވެހި ފަރާތަކުން ބީލަން ކާމިޔާބުކޮށްފިނަމަ، ބިން އެއްކޮށް މިލްކުވާނެއެވެ. ނަމަވެސް، ބޭރު ފަރާތަކުން ބީލަން ކާމިޔާބުކޮށްފި ނަމަ އެ ބިން ލިބޭނީ 99 އަހަރަށެވެ. ބީލަން ހުށަހެޅޭ އެންމެ ދަށް އަގަކީ އަކަފޫޓަކަށް 1،700 ރުފިޔާ އެވެ.

މި މައްސަލައިގައި ސަރުކާރާ އިދިކޮޅު ފަރާތްތަކުން އަންނަނީ ވަރަށް ބޮޑަށް ނުރުހުން ފާޅުކޮށް ވާހަކަދައްކަމުންނެވެ. އެގޮތުން، ރައްޔިތުންގެ މަޖިލީހުގެ މާވަށު ދާއިރާގެ މެންބަރު މުހައްމަދު ސައީދު ވަނީ ތިލަފުށީގެ ބިން ވިއްކުމަކީ ބޮޑު ވައްކަމެއްގެ ގޮތުގައި ސިފަ ކުރައްވާފައެވެ.

އޭނާ ވިދާޅުވީ ތިލަފުށީގެ ބިން ދިގު މުއްދަތަކަށް ދޫކުރުމަކީ މާލޭގެ ބިން ވިއްކުން ފަދަ ކަމެއް ކަމަށެވެ. ސަބަބަކީ، އެ ރަށަކީ މިހާރު ހަދަމުންދާ ތިލަމާލެ ބުރިޖުން މާލެއާ ގުޅާލާނެ ރަށަކަށް ވާނެތީ ކަމަށް ވިދާޅުވި އެވެ.

އެ މައްސަލައިގައި ޕީޕީއެމުން ވަނީ މަޖިލީހަށް ކުއްލި މައްސަލައެއް ވެސް ހުށަހަޅާފައެވެ. ނަމަވެސް އެމްޑީޕީގެ މެޖޯރިޓީ އޮންނަ މަޖިލީހުން އެ މައްސަލަ ވަނީ ބަލައިނުގަނެ، ބޭރުކޮށްލާފައެވެ. މިހާރު އެ ކޯލިޝަނުން ވަނީ އެކަމާ ދެކޮޅަށް މުޒާހަރާއަށް ނުކުންނާނެ ކަން ވެސް އިއުލާނުކޮށްފައެވެ. އެމްއެންޕީން ވެސް ވަނީ ސަރުކާރުގެ ނިންމުން ބަދަލު ކުރުމަށް ގޮވާލާފައެވެ.