ކަމަދޫ ބަނދަރު މަސައްކަތުގެ އަޕްޑޭޓެއް ދީފި

ބ. ކަމަދޫ ބަނދަރު ތަރައްގީ ކުރުމުގެ މަސައްކަތުގެ އަޕްޑޭޓެއް އެމްޓީސީސީން ދީފި އެވެ. އެ ކުންފުނިން ބުނި ގޮތުގައި އެ ރަށުގެ އެއްގަމު ތޮށި ލާން ބޭނުންވާ ކޮންކްރީޓް ގާ އެތުރުމުގެ މަސައްކަތާއި އާ ހާބަރުގެ ބޭސިން ފުން ކުރުމުގެ މަސައްކަތް ވަނީ ނިމިފަ އެވެ.

މީގެ ކުރިން ވަނީ އެ ބަނދަރުގެ މަސައްކަތަށް ބޭނުންވާ ބޮޑު ހިލައިގެ ޝިޕްމަންޓެއް ގެންގޮސްފަ އެވެ. އަދި އެއްގަމުތޮށި ލުމުގެ މަސައްކަތުގެ 90 ޕަސެންޓް ފުރިހަމަ ކޮށްފައި ވެއެވެ. 

ކަމަދޫގެ މި ޕްރޮޖްޓްގެ އަގަކީ 53.6 މިލިއަން ރުފިޔާ އެވެ. 

މި މަސައްކަތުގައި 30،933 ކިއުބިކް މީޓަރުގެ ސަރަޙައްދެއްގެ ހާބަރު ބޭސިން ފުން ކުރުމާއި 5،085 ކިއުބިކް މީޓަރުގެ ސަރަޙައްދެއްގެ ހާބާ ޗެނަލް ފުން ކުރުމާއި، 181 މީޓަރުގެ ސަރަޙައްދެއްގައި ބޭރުތޮށި ލުމާއި 656 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި 392 މީޓަރުގެ ސަރަޙައްދެއްގައި އެއްގަމުތޮށި ލުމާއި ހާބާ ޕޭވްމަންޓް ހެދުމާއި ރޭމްޕެއް ހެދުމާއި ސްކޯރިން އޭޕްރަންއެއް ހެދުމާއި، ބަނދަރު އަދި ނެރު ބައްތި ހަރުކުރުމުގެ މަސައްކަތް ހިމެނެ އެވެ.