މާފަރު އެއާޕޯޓުގެ ތެޔޮ ފާމް ތައްޔާރުވަނީ؛ މިހާރު ޖެޓަށް ތެޔޮ އެޅޭނެ
ރައީސް އަބްދުﷲ ޔާމީންގެ ވެރިކަން ނިމުނުއިރު މި އެއާޕޯޓަށް ޝެޑިއުލް ފްލައިޓް ފެށޭވަރެއް ނުވެއެވެ. އޭގެ ފަހުން ކުދިކުދި ކަންކަން ފުރިހަމަކޮށް އެއާޕޯޓް ހުޅުވީ ޑިސެމްބަރު 1، 2019 ގަ އެވެ.
މާފަރު އެއާޕޯޓުގައި އެންމެ ޒަމާނީ ފިއުލްފާމެއް ތައްޔާރު ވަމުންދާއިރު، މިހާރު ވެސް ޖެޓުތަކަށް ތެޔޮ އަޅައި ދިނުމުގެ ހިދުމަތް ފަށައިފި އެވެ.
މާފަރު އިންޓަނޭޝަނަލް އެއާޕޯޓް (އެމްއައިއޭ) ގެ އިސް އޮފިޝަލަކު "މި" ނޫހަށް ވިދާޅުވި ގޮތުގައި މަތިންދާ ބޯޓަށް ތެޔޮ އަޅައި ދިނުމުގެ ހިދުމަތާއެކު ތައްޔާރު ކުރާ ފިއުލްފާމް އަންނަ މަހު އެއްކޮށް ނިންމާލެވޭނެ އެވެ. ފިއުލްފާމް ނިމުމަކަށް ދާއިރު މިހާރު ވެސް ޖެޓުތަކަށް ތެޔޮ އެޅުމުގެ ހިދުމަތް ފަށާފައިވާ ކަމަށެވެ.
"މި ވަގުތު ދެ ބައުޒަރު ބޭނުންކޮށްގެން ތެޔޮ އެޅުމުގެ ހިދުމަތް މިދެނީ. އަންނަ މަހު ފިއުލް ފެސިލިޓީއެއްކޮށް ނިމުމާއެކު ހިދުމަތް އެންމެ ފުރިހަމަ ގޮތުގައި ދެވެން ފަށާނެ،" އޮފިޝަލް ވިދާޅުވި އެވެ.
މިއީ އަބޫދާބީ ފަންޑުގެ 60 މިލިއަން ޑޮލަރު ހޭދަކޮށްގެން ހިލޭ އެހީގެ ގޮތުގައި ހަދާފައިވާ ތަނެކެވެ. މި އެއާޕޯޓު ތަރައްގީކޮށްފައިވަނީ ދުނިޔޭގެ އެންމެ ބޮޑެތި މަތިންދާ ބޯޓްތައް ކަމަށްވާ އެއާބަސް އޭ 320 އާއި ބޮއިން 737 މަރުކާގެ ބޯޓު ފަހަރު ޖެއްސޭ ފެންވަރަށް 2،200 މީޓަރު ދިގު އަދި 40 މީޓަރު ފުޅާ ރަންވޭއާ އެކުގަ އެވެ. އޭރު އޮތީ ދެވަނަ ފިޔަވައްސެއް ކުރިއަށް ގެންގޮސްގެން މި އެއާޕޯޓް އިތުރަށް ބޮޑު ކުރާ ގޮތަށެވެ.
މި ސަރުކާރުން ވަނީ މި އެއާޕޯޓުގެ އެކްސްޕެންޝަން މަސައްކަތް ސަރުކާރުގެ ކޮންސްޓްރަކްޝަން ކުންފުނި އެމްޓީސީސީއަށް ހަވާލުކޮށްފަ އެވެ. އެ ކުންފުންޏަށް 27.1 މިލިއަން ޑޮލަރަށް ހަވާލުކުރި މި މަޝްރޫއުގެ ދަށުން 2.2 ކިލޯމީޓަރަށް މިހާރު ހަދާފައިވާ ރަންވޭ 2.85 ކިލޯމީޓަރަށް ބޮޑު ކުރާނެ އެވެ.
ކޮމެންޓް
Republic of Maldives