ވަލުތެރޭގައި ކުއްޖަކު ރޭޕްކުރި މީހަކު 40 އަހަރަށް ޖަލަށް

ލ. އަތޮޅުގެ ރަށެއްގައި 18 އަހަރު ނުފުރޭ އަންހެން ކުއްޖަކު ގަދަ ކަމުން ރޭޕްކުރި މީހަކު 40 އަހަރަށް -- އުމުރަށް -- ޖަލަށްލާން ކްރިމިނަލް ކޯޓުން ހުކުމްކޮށްފި އެވެ.

މި މައްސަލައަކީ ޖެނުވަރީ 6، 2018 ގެ ދަންވަރުގެ ވަގުތެއްގައި ލ. އަތޮޅުގެ ރަށެއްގައި 17 އަހަރުގެ އަންހެން ކުއްޖަކު އެރަށުގެ ދަނޑުބިން ސަރަހައްދަށް ގަދަ ކަމުން ގެންދިއުމަށް ފަހު ރޭޕްކުރި މައްސަލައެކެވެ. 

އަންހެން ކުއްޖާ އެތަނަށް ގެންގޮސް ކުއްޖާއާއެކު ގަދަކަމުން ޖިންސީ ގުޅުން ހިންގުމަށްފަހު، ކުއްޖާގެ ބަރަހަނާ މަންޒަރު ފެންނަ ފޮޓޯ އާއި ވީޑިއޯ ވެސް އޭނާ ނަގާފައިވެ އެވެ. އެހެންވެ މި މައްސަލައިގައި އޭނާގެ މައްޗަށް ދައުލަތުން އުފުލާފައި ވަނީ ރޭޕްކުރުމުގެ ކުށުގެ ދައުވާ އާއި ކުޑަކުއްޖަކު މެދުވެރިކޮށް އޮރިޔާން ކާޑު އުފެއްދުމުގެ ކުށުގެ ދައުވާ އެވެ.

ރޭޕްކުރުމުގެ ކުށް ސާބިތުވެ އޭނާގެ މައްޗަށް ކޮށްފައި ވަނީ 20 އަހަރުގެ ޖަލު ހުކުމެކެވެ. އަދި އޮރިޔާން ކާޑު އުފެއްދުމުގެ ދައުވާ ދާބިތުވެ އިތުރު 20 އަހަރާއެކު ޖުމްލަ 40 އަހަރުގެ ޖަލު ހުކުމެއް އޭނާގެ މައްޗަށް ވަނީ އިއްވައިފަ އެވެ.

ކުޑަކުދިންގެ މަސްލަހަތު ހިމެނޭ މައްސަލަތަކުގައި އަނިޔާ ލިބޭ ކުދިންނާއި އަނިޔާ ދޭ މީހުންގެ ނަން އުނިކުރަނީ އެ ކުދިންގެ މައުލޫމާތު ސިއްރު ކުރުމުގެ ގޮތުންނެވެ.