އިންޑޮނޭޝިއާއަށް ބާރު ގަދަ ބިންހެލުމެއް، މީހުން ގެދޮރުދޫކޮށް ދުރަށް

ޖަކާޓާ (ޖެނުއަރީ 18) - އިންޑޮނޭޝިއާގެ ސުލަވޭސީ ޖަޒީރާއަށް 7 މެގްނިޓިއުޑްގެ ބާރު މިނުގެ ބިންހެލުމެއް އައިސް އެންމެ ކައިރީގައިވާ ބައެއް ރަށްރަށުގައި މީހުން ގެދޮރު ދޫކޮށް ދުރު ސަރަހައްދުތަކަށް ހިނގައްޖެ އެވެ. 

އިންޑޮނޭޝިއާގެ ޖިއޮފިޒިކްސް އެޖެންސީން ބުނީ ބިންހެލުމެއް އައި ނަމަވެސް ސުނާމީއެއްގެ ނުރައްކަލެއް ނެތް ކަމަށެވެ. އެމެރިކާގައި ހުންނަ ޕެސިފިކް ސުނާމީ އިންޒާރު ދޭ މަރުކަޒުގެ ބުލެޓިންއެއްގައި ސުނާމީގެ ނުރައްކަލެއް ކުރިމަތި ވެދާނެ ކަމަށް ކުރިން ބުންޏެވެ. ނަމަވެސް އެ އިންޒާރު ވަނީ ފަހުން ނަގާފަ އެވެ. 

ޖިއޮފިޒިކްސް އެޖެންސީން ބުނީ ބިންހެލުމުން އައީ މެލޮންގްވާނޭ ޓައުންގެ އިރުދެކުނު 64 ކިލޯމީޓަރު (39.77 މޭލު) އާއި 141 ކިލޯމީޓަރުގެ އަޑިއަށް ކަމަށާއި ބިންހެލުމުގެ 10 އަފްޓާޝޮކެއް ރިޕޯޓް ކޮށްފައިވާ ކަމަށެވެ. 

"އަހަރެމެން ދިރިއުޅޭ ގެ ތެޅެމުން ތެޅެމުން ދިޔައީ،" މެލޮންގްވާނޭގެ ރައްޔިތެއް ކަމަށްވާ އިކާ، 35، ބުންޏެވެ.

އުތުރު ސުލަވޭސީ ޕްރޮވިންސްގެ ވެރިރަށް މަނަޑޯގެ ރައްޔިތަކު ބުނީ ސިކުންތުކޮޅެއް ވަންދެން ބިންހެލުން ވަރަށް ވަރުގަދައަށް އިހުސާސް ކުރެވުނު ކަމަށާއި އެކަމާ ގުޅިގެމން އިމާރާތްތަކުން މީހުން  ނުކުމެ ދުވެފައި ދިޔަތަން ފެނުނު ކަމަށެވެ. 

އުތުރު ސުލަވޭސީގެ ފުލުހުން ބުނީ އެއް ވެސް ގެއްލުމެއް ނުވަތަ ގެއްލުމެއް ލިބިފައިވާ ކަމުގެ ވަގުތީ ރިޕޯޓެއް ވެސް އަދި ލިބިފައި ނުވާ ކަމަށެވެ.

މާލޫކު ޖަޒީރާތަކަށް ވެސް ބިންހެލުން އިހުސާސް ކުރެވުނެވެ. 

ފިލިޕީންސް ސެއިސްމޮލޮޖީ އެޖެންސީން ވެސް ބުނެފައި ވަނީ ބިންހެލުން އެ ގައުމުގެ ދެކުނު ސަރަހައްދުތަކަށް އިހުސާސް ކުރެވިފައިވާ ކަމަށާއި ގެއްލުންތަކާއި އޭގެ ފަހުން ލޮޅުން އައުމުގެ ނުރައްކާ އޮތް ކަމުގެ އިންޒާރު ވެސް ދިން ކަމަށެވެ.

އިންޑޮނޭޝިއާ އޮންނަނީ "ޕެސިފިކް ރިންގް އޮފް ފަޔާ" ގެ މަތީގަ އެވެ. މިއީ ދުނިޔޭގައި އެންމެ ގިނައިން ބިންހެލުން އަންނަ އެއް ސަރަހައްދެވެ.

މިދިޔަ ހަފްތާގައި އިންޑޮނޭޝިއާގެ ޓަނިމްބާ ޖަޒީރާތަކަށް 7.6 މެގްނިޓިއުޑްގެ ބިންހެލުމެއް އައިސްފައި ވެއެވެ.