ގައުމީ އިނާމަށް ކުރިމަތިލާން ހުޅުވާލައިފި
މިއަހަރު އިނާމުގެ ދާއިރާތަކުގެ ތެރެއަށް އިތުރު ދެ ދާއިރާއެއް އިތުރު ކޮށްފައި ވެއެވެ. އެއީ ކަލިނަރީ އާޓްސްގެ ދާއިރާ އާއި އިންޖިނިއަރިން އެވެ.
މިއަހަރު ގައުމީ އިނާމަށް ނަން ހުށަހެޅުމުގެ ފުރުސަތު ގައުމީ އިނާމާބެހޭ ކޮމިޓީން މިއަދު ހުޅުއްވައިލައިފި އެވެ. އަދި އިނާމާބެހޭ އުސޫލު ދިވެހި ސަރުގެ ގެޒެޓުގައި މިއަދު ވަނީ ޝާއިއު ވެސް ކޮށްފައެވެ.
ރައީސް އޮފީހުން ބުނީ މިއަދުން ފެށިގެން މި އަހަރުގެ މާރިޗު މަހުގެ 16 ވަނަ ދުވަހުގެ މެންދުރުފަހު 3:00 ގެ ނިޔަލަށް އިނާމަށް ނަން ހުށަހެޅޭނެ ކަމަށެވެ. ގައުމީ އިނާމު ދިނުމުގެ އުސޫލަށް ބައެއް ބަދަލުތައް މިއަހަރު ވަނީ ގެނެސްފަ އެވެ.
- އުމުރުން 60 އަހަރު ވުމުން ނަން ހުށަނޭޅޭ ގޮތަށް އޮތް އޮތުން ދޫކޮށްލުން
- 60 އަހަރުވިއަސް، ހިތްވަރު ދިނުމުގެ އިނާމަށް ނަން ހުށަހެޅޭ ގޮތަށް ބަދަލު ކުރުން
- ކުންފުނި، ޖަމުޢިއްޔާ، ޖަމާއަތްތަކަށް ޝަރަފުގެ ގައުމީ އިނާމަށް ހުށަހެޅުމުގެ ފުރުޞަތު
މީގެ އިތުރުން، މިހާރު އިނާމު ދެމުން ގެންދާ ދާއިރާތަކުގެ ތެރެއަށް އިތުރު ދެ ދާއިރާއެއް އިތުރު ކޮށްފައި ވެއެވެ. އެއީ، ކަލިނަރީ އާޓްސްގެ ދާއިރާ އާއި، އިންޖިނިއަރިން އެވެ.
ޝަރަފުވެރިކަމުގެ ގައުމީ އިނާމު ދޭނީ ހިތްވަރު ދިނުމުގެ އިނާމު ލިބިފައިވާ ވަކި ފަރުދަކު ނުވަތަ ކުންފުންޏެއް ނުވަތަ ޖަމާއަތެއް ނަމަ، އެ އިނާމު ލިބުނުތާ 10 އަހަރުވެފައި، ހިދުމަތްކުރި މުއްދަތުގެ ޖުމުލަ 35 އަހަރު ވުމުންނެވެ. ޝަރަފުވެރިކަމުގެ ގައުމީ އިނާމު ދިނުމުގައި، އެ ފަރާތަކުން ނުވަތަ ޖަމިއްޔާ ޖަމާއަތަކުން ދިވެހި ގައުމަށާއި މުޖުތަމައަށް ފައިދާހުރި ގޮތެއްގައި ވަރަށް ފުޅާ ދާއިރާއެއްގައި ގައުމީ ފެންވަރެއްގައި ފޯރުކޮށްދީފައިވާ ފެންވަރު ރަނގަޅު ހިދުމަތްތަކަށާއި އަދި ހޯދާފައިވާ ފާހަގަކޮށްލެވޭ ފަދަ ކާމިޔާބީތަކަށް ކޮމިޓީން ބަލާނެ އެވެ.
ހިތްވަރު ދިނުމުގެ އިނާމު ދޭނީ އެ ދާއިރާއެއްގައި މަދުވެގެން 7 އަހަރު ހިދުމަތް ކުރުމުންނެވެ. އަދި ކުންފުނި ޖަމުިއްޔާ ޖަމާއަތެއްނަމަ ހިދުމަތުގައި މަދުވެގެން 10 އަހަރު ވުމުންނެއެވެ.
މި އަހަރު ގައުމީ އިނާމު ދޭނީ، މިނިވަންދުވަހުގެ ޖަލްސާގައެވެ.
ކޮމެންޓް
Republic of Maldives