ދުވާފަރުގައި ކުނި މެނޭޖްކުރުމުގެ ކެމްޕޭނެއް

ފެން ކުންފުނި، އެމްޑަބްލިއުއެސްސީ އިން ރ. ދުވާފަރުގައި ދެމުންދާ ކުނި މެނޭޖްކުރުމުގެ ހިދުމަތް އިތުރަށް ހަރުދަނާކޮށް ރައްކާތެރި ގޮތެއްގައި ކުނި ނައްތާލުމަށް ރައްޔިތުން އަހުލުވެރި ކުރަން ކެމްޕޭނެއް ފަށައިފި އެވެ.

"ނަލަ ދުވާފަރު" ގެ ނަމުގައި އެމްޑަބްލިއުއެސްސީ އިން ފެށި މި ކެމްޕޭނުގެ މަގްސަދަކީ ދުވާފަރަކީ ސާރު ރަށެއްގެ ގޮތުގައި ބޭއްވުން ކަމަށް އެކުންފުނިން ބުނެ އެވެ.

މި ކެމްޕޭނާއި ގުޅިގެން ދުވާފަރުގެ ކުޑަކުދިންނަށް އަމާޒުކޮށްގެން މިއަދު ހަވީރު "ކުޑަކުދިންނާއިއެކު އެމްޑަބްލިއުއެސްސީ" ގެ ނަމުގައި ކުޑަކުދިންގެ ހަވީރެއް ބޭއްވުމަށް ވެސް ހަމަޖެހިފައިވެ އެވެ.

މި ކެމްޕޭނުގެ ތެރެއިން ކުނީގެ ބާވަތްތައް ވަކިކުރުމަށް ހާއްސަ ޑަސްބިންތަކެއް ދުވާފަރުގެ ކޮންމެ ގޭބިސީއަކަށް ހަވާލުކުރެވިގެން ދާނެ އެވެ. އަދި ދުވާފަރުގެ ރައްޔިތުންގެ މެދުގައި ކުނި މެނޭޖްކުރުމުގެ އުސޫލްތަކަށް އިތުރަށް އަހުލުވެރިކުރުމަށް ޑޯ-ޓު-ޑޯ ހަރަކާތެއް ވެސް ކުރިއަށް ގެންގޮސްފައިވެ އެވެ.

އެމްޑަބްލިއުއެސްސީ އިން ބުނީ ކެމްޕެއިން އިފްތިތާހު ކުރުމުގެ ރަސްމިއްޔާތު ނިންމާލައިފައި ވަނީ ދުވާފަރު ގޮނޑުދޮށް ސާފުކުރުމުގެ ޕްރޮގްރާމަކުން ކަމަށެވެ. މި ޕްރޮގްރާމްގައި ކުންފުނީގެ މެނޭޖިން ޑިރެކްޓަރު ހަސަން ޝާހާއި، ކުނުންފުނީގެ އިސްވެރިންނާއި މުވައްޒަފުންގެ އިތުރުން ދުވާފަރުގެ ކައުންސިލާއި މުއައްސަސާތަކާއި އަދި ދުވާފަރުގެ ރައްޔިތުންވެސް ބައިވެރިވެފައިވެ އެވެ.