ސުނާމީގެ ބިރުވެރި ވަގުތު ނިޒާރު ނެގި މޮޅު ފޮޓޯގެ ފަހަތް

ރާއްޖޭގެ ފޮޓޯގްރަފަރަކު ނަގައިފައިވާ ފޮޓޯއަކަށް އެވޯޑެއް ހައްގުވާނަމަ މި ފޮޓޯއަށް އެވޯޑު ހައްގެވެ. ތ. ވިލުފުށީ އަބްދުﷲ ނިޒާރު، 49 ނަަގައިފައިވާ މި ފޮޓޯއަކީި މުޅި ރާއްޖެއަށް ވެސް ހާއްސަ ފޮޓޯއެކެވެ. މީގެ 18 އަހަރު ކުރިން ރާއްޖެ ދުށް، ހިތާމަވެރި ސުނާމީގެ ކާރިސާގެ ބިރުވެރިކަން އެންމެ ބޮޑަށް ދައްކުވައިދޭ އެއް ފޮޓޯ އެވެ.

އެއީ އެ ދުވަހުގެ ހެނދުނުގެ ވަގުތެވެ. އޭނާގެ އަންހެނުންގެ ގޭގެ ހަތަރު އަނގޮޅި ކަންމަތީގައި ނިޒާރު ހުރީ އޭނާގެ ދެބެންގެ ދެ ދަރި މީހަކާއި ބުރުނީ ރައްޓެއްސަކާ ވާހަކަ ދައްކާށެވެ. އޭރު ނިޒާރު ހުރީ އިރުމަތީ ފަރާތަށް އެނބުރިގެނެވެ. އެހެން ހުންނައިރުގައި އިރުއިރުކޮޅާ އޭނާއަށް މޫދާ ދިމާއަށް ބަލައިލެވެ އެވެ. އެކަމަކު، ތަފާތެއް ފާހަގައެއް ނުކުރެވެ އެވެ. އޭރު އެއީ ހަމަ އާދައިގެ ދުވަހެކެވެ.

އެއްލި ކަޅިއަކުން ނިޒާރަށް ފެނުނީ ތަފާތު މަންޒަރެކެވެ. މޫދު ކިލަނބުވާން ފެށީ އެވެ. ތަފާތު ކުލަވަރެއް މޫދާ ދިމާލުން ފެންނަން ފެށި އެވެ. އެފަދަ ކޮންމެ މަންޒަރެއް ކެމެރާގައި ރައްކާކުރަން ޝައުގުވެރިކަން ހުންނަ ނިޒާރު ދުއްވައިގަތީ ކެމެރާ އަތުޖެހޭތޯ އެވެ. އޭރު އޭނާގެ އަތުގައި ރައްޓެއްސެއްގެ ސޮނީ ސައިބާ ކެމެރާއެއް އޮތެވެ. އެ ދުވަހު ބުރުނީ ރަހުމަތްތެރިޔާއާ އެ ކެމެރާ ހަވާލު ކުރަން ވެސް އޮތީ ތައްޔާރު ކޮށްފަ އެވެ.

ކެމެރާ ހިފައިގެން ނުކުމެ އޭނާގެ ކެމެރާގައި ރައްކާކުރަން އުޅޭ ފޮޓޯތަކަކީ ވިލުފުށީގެ އެތައް ރައްޔިތެއްގެ "މަރުގެ ރާޅު" ކަމެއް ނިޒާރަކަށް ނޭނގެ އެވެ.

"އަޅުގަނޑު ހީކުރީ އުދަ އަރަނީ ކަމަށް، ހިޔެއް ނުކުރަން ސުނާމީއެއްގެ ރާޅެއް ކަމަކަށް އެއްވެސް ގޮތަކަށް،" ނިޒާރު ކިޔައި ދިނެވެ.

ކުޑައިރުކޮޅެއްގެ ތެރޭގައި ކެމެރާ ހިފައިގެން އޭނާ ނުކުތެވެ. އޭރު ރަށު ތެރެއަށް ރާޅު އަރައިގެން އަންނަނީ އެވެ. ވަގުތުން ނިޒާރު ފޮޓޯއެއް ނެގި އެވެ. އެ ފޮޓޯއަކީ ސުނާމީ ކާރިސާގައި މުޅި ރާއްޖޭގެ ސަމާލުކަން ހޯދި ފޮޓޯ އެވެ. މަންމައަކު އޭނާގެ ދަރިފުޅުގެ އަތުގައި ހިފައިގެން ރާޅަށް އަތުނުވާން ދުވެފައި ރަށުތެރެއަށް އަރައިގެން އަންނަ މަންޒަރު ދައްކައިދޭ އަސަރުގަދަ ފޮޓޯ އެކެވެ.

"އެ ދެމައިން ގޮސް ރަށުތެރެއަށް ގާތްގަނޑަކަށް 500 އެއްހާ ފޫޓު ދުރުގައި ހުންނަ އިންޖީނުގެ ކުރިމަތީ އޮންނަ ހޮޅިދަނޑިތަކެއްގައި ހިފަހައްޓައިގެން ތިބީ. އެ ދެމައިންނަށް އެއްވެސް ގެއްލުމެއް ނުވޭ ނަސީބަކުން،" ނިޒާރު ކިޔައިދިނެވެ.

އެ ދެމައިން އޮޔާ ދިޔައީ އޭނާގެ ކުރިމަތީގަ އެވެ. އެކަމަކު، އެ ހާލަތުގައި އެ ދެމައިންނަށް އެހީވާނެ ގޮތެއް ވެސް އޭނާއަކަށް ނެތެވެ. ޖެހުނީ އަމިއްލަ ސަލާމަތް ހޯދަން އުޅޭށެވެ. ރާޅުގެ އަޑު އެހާމެ ގަދަ އެވެ.

އެ ފޮޓޯ ނަގައިފައި ހަމަޖެހިލަން ވާއިރަށް ރާޅު އައިސް ނިޒާރާ އަރާ ހަމަކޮށްފި އެވެ. އޭނާއަށް އެ ވަގުތު ނެގުނީ ދެ ފޮޓޯ އެވެ. ދެވަނަ ފޮޓޯގައި ނެގުމަށްފަހު ނިޒާރު އުޅުނީ އޭނާގެ އަމިއްލަ ސަލާމަތް ހޯދާށެވެ. ކެމެރާގެ ވާގަނޑު އަތުގެ އިނގިލިތަކުގައި އޮޅާލުމަށްފަހު އަތް މައްޗަށް ދަމާލި އެވެ. ރާޅުތަކުގެ ތެރޭގައި ނިޒާރު ގެންގޮސް ލަށްވީ ފަހަތުގައި ހުރި ރުކެއްގަ އެވެ.

"ކެމެރާ އެއްލާލަން ވެސް ހިތަށް އެރި. އެކަމަކު ހައްތަހާ ވެސް މީހެއްގެ ކެމެރާއެއް ވީމަ ހިފަހައްޓައިގެން ހުރީ. އަޅުގަނޑު އިނީ ރުކުގައި ބުރަކަށި ޖައްސައިގެން،" ނިޒާރު ކިޔައިދިނެވެ.

އެ ވަގުތު އޭނާގެ ބޯ މަތިން ދެ ރާޅު ބިންދާލި އެވެ. އެ ވަގުތު ވެސް އޭނާގެ އަތުގައި އޮތް ކެމެރާ އޮތީ އަތުކޮޅަށް ދަމައިލައިގެން ހިފަހައްޓައިފަ އެވެ. އެ ވަގުތު އޭނާއަށް އެތައް މަންޒަރެއް ފެނުނެވެ. އެއްވެސް މީހަކު ނުފެނެ އެވެ. ގެތައް ސުންނާފަތިވެ ވެއްޓެމުންދާ މަންޒަރު ވެސް ފެނުނެވެ. ހިފާ ގެންގުޅޭ ތަކެތި ލޯ ކުރިމަތީގައި އޮޔާދާ މަންޒަރު ފެނުނެވެ. އޭގެ ތެރެއިން ބައެއް ތަކެތި އައިސް އޭނާގެ ގައިގައި ޖެހި އަނިޔާ ވެސް ވި އެވެ.

"އޭގެ ކުރިން ދުވަހު އަޅުގަނޑު އަމިއްލަ އަތުން ރޭނި ބައެއް ތަންތަން ވެސް ލޯ ކުރިމަތީގައި ބިމާ ހަމަވިތަން ވެސް ފެނުން،" ނިޒާރު ކިޔައިދިނެވެ

އެ ތަނުގައި ހިފަހައްޓައިގެން ހުއްޓާ ދަގަނޑުގަނޑެއް އައިސް އޭނާގެ ކަކުލުގައި ޖެހި ވަރަށް ބޮޑަށް އަނިޔާވި އެވެ. އެ އަނިޔާގައި ކަކުލުހުޅުން ނެއްޓޭތީ ހަތަރު ވަރަކަށް އަހަރު އުޅެން ޖެހުނެވެ.

ސުނާމީގެ ދުވަހު މާ ގިނަ ފޮޓޯތަކެއް ނިޒާރުއަށް ނެގޭ ގޮތެއް ނުވި އެވެ. ސަލާމަތުގެ މަންޒިލެއް ހޯދަން އަންހެނުންނާއި ދެ ދަރިން ގޮވައިގެން ނިޒާރު ދިޔައީ އެ އަތޮޅު ގުރައިދޫ އަށެވެ. ގުރައިދޫގައި އުޅުމަށްފަހު، ވިލުފުއްޓަށް ދެން ދެވޭ ގޮތްވީ އޭގެ ދެތިން ދުވަސް ފަހުންނެވެ. ދިޔައިރު އޭނާ ދިޔައީ ކެމެރާ ފުލް ޗާޖު ކޮށްގެންނެވެ.

"އެ ދުވަހު ވަރަށް ގިނަ މީހުން މަރުވެފައި އޮއްވާ ފެނުނު. ތިން ހަތަރު މީހަކު ފެނުނު މަރުވެފައި އޮއްވާ. މުޅި ރަށް އޮތީ ސުންނާފަތި ވެފައި،" ނިޒާރު ކިޔައިދިނެވެ.

ރަށަށް އެރުމަށްފަހު އޭނާ ބެލީ ކެމެރާގައި އެ ހަނދާންތައް ރައްކާ ކުރެވޭތޯ އެވެ. އެއީ ހިތަށް ކިތަންމެ ދަތިކުރާ މަންޒަރުތަކަކަށްވީ ނަމަވެސް އެ ފޮޓޯތައް ނެގުމުގެ މަސައްކަތް އޭނާ ފެށި އެވެ. ރަށުގެ އެތަން މިތަން ފޮޓޯނަގަމުން ގޮސް ރަށުގެ ބޮޑުމަގުން އުތުރަށް ދިޔައިރު ފެނުނު މަންޒަރަކީ މިއަދު ވެސް އޭނާއަށް އުނދަގޫ ކުރާ މަންޒަރެކެވެ.

"އަންހެނަކު މަރުވެފައި އޮއްވާ ފެނުނީ. ވަޅެއްގެ މަތީގައި ފައި އެޅުވިފައި ތިރިއަށް ބޯ އެލިފައި އޮތީ. ގޮހޮރު ވެސް ނުކުމެފައި. އެ ވަގުތު ކުރެވުނު އިހުސާސް ވެސް ނޭނގޭ މިއަދު ކިޔައިދޭކަށް،" ނިޒާރު ކިޔައިދިނެވެ.

އެ ފޮޓޯ ނެގުމަށްފަހު ނިޒާރު ގޮސް އެރީ ދޯންޏަށެވެ. އަރައިގެން ގުރައިދޫއަށް ދާން ދަތުރު ފެށި އިރުގައި އޭނާ ބިރުން ތުރުތުރު އަޅަ އެވެ. ގުރައިދުއަށް ދޯނި ކައިރިކުރުމާއެކު އޭނާ ދިޔައީ ގެއާ ދިމާލަށެވެ.

"ގެއަށް ދެވުނުކަން އެނގެނީ. ދެން ހޭނެތުނީ. ހޭލެވުނީ މޫނުމައްޗަށް ފެން އަޅައިގެން އުޅެނިކޮށް،" ނިޒާރު ކިޔައިދިނެވެ.

ނިޒާރުގެ އަތުގައި ވިލުފުށީގެ ސުނާމީ ކާރިސާގެ ގިނަ ފޮޓޯތަކެއް އެބަހުއްޓެވެ. ޑޮކިއުމެންޓްރީތަކެއް ހަދަން އައި ބޭރުގެ ބަޔަކު އެ ފޮޓޯތައް ގަންނަން ވެސް ބޮޑު އަގެއް ހުށަހެޅި އެވެ. އެކަމަކު، އެ ފޮޓޯތައް ދުވަހަކު ވެސް ވިއްކާކަށް އޭނާ ބޭނުމެއް ނުވެ އެވެ.

"އެ ހާދިސާގައި އެހާ ބިރުވެރި ވަގުތެއްގައި ނެގިފައި އިން ފޮޓޯއެއް ވީމަ ވިއްކަން ބޭނުންނުވަނީ. އެއީ އަޅުގަނޑުގެ ދިރިއުޅުމުގައި އަޅުގަނޑަށް ނެގިފައި އިން އެންމެ އަގުބޮޑު ފޮޓޯ. އެހެންވީމަ އެ ފޮޓޯ ފައިސާއަކުން އަގެއް ނުކުރެވޭނެ،" ނިޒާރު ބުންޏެވެ.

އެއީ ނިޒާރުގެ ސޯޝަލްމީޑިއާގެ ހުރިހާ ޕްލެޓްފޯމެއްގައި ވެސް ޕްރޮފައިލް ފޮޓޯ އެވެ. އެ ފޮޓޯއަކީ އެތައް ހަނދާނެކެވެ. ކުރިމަތީގައި އަދިވެސް ސިފަވެސިފަވެ ހުރި މަންޒަރުތަކެކެވެ. މޮޅު ފޮޓޯގްރާފަރަކަށް ނުވިޔަސް، ނިޒާރުގެ އެ ފޮޓޯއިން އޭނާއަކީ ސުނާމީގެ ބަތަލެއްކަން ބުނެދެ އެވެ. ޒުވާން ޖީލުތަކަށް އެ ފޮޓޯ އަބަދުވެސް ފެންނާނީ އެތައް ވާހަކައެއް ބުނެދޭ ފޮޓޯއެއްގެ ގޮތުގަ އެވެ.

މޮޅު ފޮޓޯއެއް ކޮންމެ މީހަކަށް ވެސް ނެގިދާނެ އެވެ. އެކަމަކު، އެފަދަ ބިރުވެރި ހާލަތެއްގައި އެފަދަ މޮޅު ފޮޓޯއެއް ނެގޭނީ ހިތްވަރުގަދަ މީހަކަށެވެ.