"ވެރިކަމުގެ ކޮންމެ ދުވަހަކު އެއްބައިވަންތަކަން ދަމަހައްޓަން މަސައްކަތް ކުރަން"

ބަޔަކު ގަސްދުގައި ހަމަޖެހުން ނަގާލަން އުޅުނު ނަމަވެސް، ވެރިކަމުގެ ކޮންމެ ދުވަހަކު ރައްޔިތުންގެ މެދުގައި އެއްބައިވަންތަކަން ދަމަހައްޓަން މަސައްކަތް ކުރައްވަމުން އަންނަ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ރައީސް މިހެން ވިދާޅުވީ މީގެ 18 އަހަރު ކުރިން، 2004 ވަނަ އަހަރު ރާއްޖެ ދޮވެލި ސުނާމީ ކާރިސާއާއި ގުޅިގެން ދިވެހިން ދެއްކި އެއްބައިވަންތަކަން ފާހަގަކުރުމުގެ ގޮތުން މ. ކޮޅުފުއްޓަށް ވަޑައިގެން ވާހަކަދައްކަވަމުންނެވެ.

ގައުމީ އެއްބައިވަންތަކަމުގެ ދުވަހުގެ ރަސްމީ ޖަލްސާގައި ވާހަކަދައްކަވަމުން ރައީސް ވިދާޅުވީ ވެރިކަމުގައި މިހާތަނަށް ހޭދަކުރި 1501 ދުވަހު ރައްޔިތުންގެ ހިދުމަތަށް ނިކުންނައިރު ކުރިމަތީގައި އޮންނަ އެއް ކަމަކީ ރައްޔިތުންގެ މެދުގައި ހަމަޖެހުން ގެއްލި ބައިބައިވެފައި އޮތް އޮތުން ކަމަށެވެ.

"އަޅުގަނޑު ދިވެހި ރައްޔިތުންނަށް ހިދުމަތްކުރުމަށް މި މަގާމުގައި މިހާތަނަށް މި ހޭދަކުރި 1501 ދުވަހުގެ ތެރެއިން ކޮންމެ ދުވަހަކީ، ދިވެހި ރައްޔިތުންގެ އެއްބައިވަންތަކަން ދެމެހެއްޓުމަށް މަސައްކަތްކުރި ދުވަހެއް. ރައްޔިތުންނަށް ހިދުމަތް ކުރަން ނުކުތް އިރު އަޅުގަނޑުގެ ކުރިމަތީގައި އޮތް އެންމެ ބޮޑު އެއް ކަމަކީ، އަޅުގަނޑުމެންގެ ތެރެއިން ހަމަޖެހުމާއި ސުލްހަޔާއި އެއްބައިވަންތަކަން ގެއްލި ބައިބައިވެފައި އޮތުން. ސިޔާސީ ބޭނުންތަކެއްގައި ވަކި ބަޔަކު ގަސްދުގައި ދިޔައީ ހަމަޖެހުން ނަގައިލަމުން،" ރައީސް ވިދާޅުވި އެވެ.

ރައީސް ވިދާޅުވީ، ކަން މިހެން އޮތުމުން އެންމެ ފުރަތަމަ ކުރަން ޖެހުނު ކަމަކީ މުޖުތަމައުގެ ސުލްހަވެރިކަން ގާއިމްކުރުން ކަމަށެވެ. އެއްބައިވަންތަކުރެވޭނީ ހިދުމަތް ދިނުމުގައި ރައްޔިތުންގެ މެދުގައި ތަފާތުނުކޮށް، ހަމަހަމަކަން ގާއިމުކޮށްގެންނާއި އަސާސީ ހިދުމަތްތައް ފޯރުކޮށްދިނުމަށް ފެށި ކޮންމެ މަޝްރޫއެއްގެ އަމާޒަކީ ވަކި ރަށެއް ތަފާތުނުކޮށް ރާއްޖޭގެ ހުރިހާ ރައްޔިތުންނަށް އެ ހިދުމަތް ފޯރުކޮށްދިނުން ކަމަށެވެ.

ރައީސް ވަނީ، ސުނާމީ ކާރިސާގައި ރައްޔިތުންނަށް ލިބުނު ގެއްލުންތަކުގެ ވާހަކަ ދައްކަވަމުން، މީގެ ދެ އަހަރު ކުރިން ރާއްޖެއަށް ކުރިމަތިވި ކޮވިޑް-19 ގެ ވަބާގައި ލިބުނު ގެއްލުންތަކުގެ ހަނދާން ވެސް އާ ކުރައްވާފަ އެވެ.

"ސުނާމީގެ ކާރިސާއަށް ފަހު ދާދި ފަހަކުން ވެސް ހަމަ އެފަދަ ނުވަތަ އެއަށް ވުރެ ގެއްލުން ބޮޑު ސިއްހީ ކާރިސާއެއް އަޅުގަނޑުމެން ތަޖުރިބާކޮށްފިން. އެއީ 2019 ވަނަ އަހަރުގެ ފަހުކޮޅުން ފެށިގެން މުޅި ދުނިޔޭގައި ފެތުރެމުންދާ ކޯވިޑް-19ގެ ވަބާ. އެ ބަލިމަޑުގައި އަޅުގަނޑުމެންގެ ތެރެއިންވެސް ބައެއް މީހުން މި ދުނިޔެ ދޫކުރި.އިގްތިސޯދީ ގޮތުން އެތައް މިލިއަން ޑޮލަރެއްގެ ގެއްލުން ލިބިއްޖެ. އެ ދަތިތަކުން އަދިވެސް މުޅިން އަރައެއް ނުގަނެވޭ. ކޮވިޑްގެ ވަޅުގަނޑު ކިތަންމެ ފުނަސް، އަޅުގަނޑުމެންގެ އަޒުމަކަށް ބަދަލެއް ނާދެ. ގޮތް ހުސްވެ މަސައްކަތް ހުއްޓާލައިގެނެއް ނުތިބެން،" ރައީސް ވިދާޅުވި އެވެ.

ރައީސް އިތުރަށް ވިދާޅުވެފައި ވަނީ ދައުލަތުގެ އާމްދަނީގެ މިސްރާބު ވެސް ހުރީ ރަނގަޅު އަމާޒެއްގައި ކަމަށެވެ. އެގޮތުން މިއަހަރުގެ ފުރަތަމަ ދުވަހުން ފެށިގެން ޑިސެމްބަރު މަހުގެ 15 ވަނަ ދުވަހާ ހަމައަށް ދައުލަތަށް އާމްދަނީގެ ގޮތުގައި 24.2 ބިލިއަން ރުފިޔާ ލިބޭނެ ކަމަށް އަންދާޒާކުރި ނަމަވެސް 25.4 ބިލިއަން ރުފިޔާ ލިބިފައިވާ ކަަމަށެވެ.

"ދަތިކަމާއި އުނދަގުލުގެ މިފަދަ ކޮންމެ ދަނޑިވަޅެއްގައި ދިވެހިން ސާބިތުކޮށްދޭ އެކުވެރިކަމާއި އެއްބައިވަންތަކަމަށް އަޅުގަނޑު ނިހާޔަތަށް ޝުކުރު ދަންނަވަން. ދިވެހި ރައްޔިތުންނަށް ހިދުމަތް ކުރުމުގައި އަޅުގަނޑަށް ލިބޭ އެންމެ ބޮޑު ހިތްވަރަކީވެސް އެއީ. ކުރިއަށް އޮތް ދުވަސްތަކުގައިވެސް، ދިވެހިންގެ އެއްބައިވަންތަކަން ދެމެހެއްޓުމުގައި އަޅުގަނޑު ސާބިތުވެ ހުންނާނެ ކަމުގެ ޔަގީންކަން ރާއްޖޭގެ ލޮބުވެތި ރައްޔިތުންނަށް އަޅުގަނޑު އަރުވަން،" ރައީސް ވިދާޅުވި އެވެ.

އެއްބައިވަންތަކަމުގެ ދުވަސް ފާހަގަކުރަން ކޮޅުފުށީގައި ބޭއްވި ރަސްމީ ޖަލްސާގައި އެމަނިކުފާނުގެ އަނބިކަނބަލުން ފަޒްނާ އަހުމަދު، ހޯމް މިނިސްޓަރު އިމްރާން އަބްދުﷲ، ފޮރިން މިނިސްޓަރު އަބްދުﷲ ޝާހިދުގެ އިތުރުން ރައްޔިތުންގެ މަޖިލީހުގެ މެމްބަރުން ބައިވެރިވެވަޑައިގެންފައިވެ އެވެ.