ރަށަށް ވަޑައިގެން އިމްރާން އާ ކުރެއްވީ ސުނާމީގައި ރަށް އޮތް ހާލު

ގައުމީ އެއްބައިވަންތަކަމުގެ ދުވަހުގެ މުނާސަބަތުގައި އަމިއްލަ ރަށް، މ. ކޮޅުފުއްޓަށް ވަޑައިގެން ސުނާމީގައި އެ ރަށަށް ޖެހުނު ހާލު ބަޔާން ކޮށްދެއްވައި ހޯމް މިނިސްޓަރު އިމްރާން އަބްދުﷲ ކީރިތި ކުރައްވައިފި އެވެ.

މީގެ 18 އަހަރު ކުރިން، 2004 ވަނަ އަހަރު އެރި ސުނާމީގައި އެންމެ ބޮޑަށް ގެއްލުންވި ރަށްތަކުގެ ތެރޭގައި ކޮޅުފުށި ހިމެނެ އެވެ. މި ސަރުކާރުން މި ދުވަސް ކޮންމެ އަހަރަކު ވެސް ފާހަގަކުރަނީ ސުނާމީގައި ބޮޑަށް ގެއްލުންވި ކޮންމްވެސް އެއް ރަށެއްގަ އެވެ. އެކަމަކު ކޮޅުފުށީގެ ހާލަތު އަދިވެސް ވަރަށް ދެރަ ކަމުން، މުނާސަބަތެއް ބޭއްވުމުގެ މާހައުލެއް އެރަށުގައި ނެތް ކަމަށް ވިދާޅުވެ، އެ ރަށަށް ވަޑައިގަންނަވާނީ އެންމެ ފަހުން ކަމަށް ނިންމެވި ކަމަށް އިމްރާން ވިދާޅުވެފައި ވެއެވެ.

"މިއަހަރުގެ ކުރީކޮޅު އަޅުގަނޑުމެން ވާހަކަ ދައްކަމުން ދިޔައީ މިރަށުގަ މިފަދަ މުނާސަބަތެއް ފާހަގަ ކުރުމުގެ މާހައުލެއް ނެތޭ. ބޯހިޔާވަހިކަމެއް، މީހަކު ހިތްހަމަ ޖައްސާލެވޭނެ ގޮތެއް، ވަޑައިގަންނަވާ މެހެމާނުންނަށް މެހެމާންދާރީ އަދާކުރާނެ ގޮތެއް... ތަންކޮޅެއް އާދައިގެ ގޮތަކަށް ބުނާނަމަ، ގޯސްކޮށް ނުނަންގަވާތި! ވަދެލާނެ ފާހާނާއެއް ނެތޭ ބުނުމަކީ އެކަށީގެންވާ ކަމެއް. އެހެންނަމަވެސް އަޅުގަނޑު މިރަށުގަ މިކަން ކުރަން ނިންމީ ރައީސުލްޖުމްހޫރިއްޔާ ވަޑައިގެން، ދައުލަތުގެ އިއްޒަތްތެރިން ވަޑައިގެން މި ނިކަމެތި ހާލަތު ލޮލުން ދެކި، މިކަމުން އަރައިގަތުމަށް ސަރުކާރު ޒިންމާދާރުކަމާއެކު މަސައްކަތް ކުރުމުގެ ހާލަތު އުފެއްދުން،" އިމްރާން ވިދާޅުވި އެވެ.

މިއަހަރު އެއްބައިވަންތަކަމުގެ ދުވަސް ފާހަގަކުރަން ބޭއްވި ހާއްސަ ރަސްމިއްޔާތުގައި ވާހަކަދައްކަވަމުން އިމްރާން ވިދާޅުވެފައި ވަނީ އެދުވަހު ރައްޔިތުންނަށް ޖެހުނު ބިކަ ހާލަތުން އަރައިގަންނަން ވަރަށް ބޮޑެތި މަސައްކަތްތައް ކުރަން ޖެހުނު ކަމަށެވެ. ހުރިހާ ސަރުކާރަކުން ވެސް މަސައްކަތްތަކެއް ކޮށްދިން ނަމަވެސް، ކޮޅުފުށީގެ ކުރިއެރުމަށް އެންމެ ބޮޑު މަސައްކަތްތަކެއް ކޮށްދެއްވީ ރައީސް އިބްރާހިމް މުހައްމަދު ސޯލިހު ކަމަށެވެ.

ކީރިތި ކުރައްވަމުން އިމްރާން ވަނީ ރަށުގެ ދަރިއެއްގެ ހައިސިއްޔަތުން ރައީސަށް އިލްތިމާސެއް ކުރައްވައިފަ އެވެ. އެގޮތުން ސުނާމީގެ ކުރިން މި ރަށް އޮތް ހާލަތަށް ގެނެސްދެއްވުމަށް އަދިވެސް އިތުރަށް މަސައްކަތް ކޮށްދެއްވުމަށް އެދިވަޑައިގަތެވެ. ކޮޅުފުއްޓަށް އައުމާއެކު ރަށުގެ ރައްޔިތުންގެ މަސައްކަތުން ރަށަށް ގެނެސްފައިވާ ބަދަލުތައް ފާހަގަކުރައްވައި އެކަމަށް ޝުކުރު އަދާކުރައްވާފައިވެ އެވެ. ރަށުގައި ފައި ޖައްސާލެވޭ ވަރުކުރީ ރަށުގެ ކައުންސިލާއި ރައްޔިތުންގެ އެއްބައިވަންތަކަމުގެ ސަބަބުން ކަމަށް އިމްރާން ވިދާޅުވެފައިވެ އެވެ.

ރަށަށް ބޯހިޔާވަހިކަމާއި، ޒުވާނުންނަށް ރަށުންނާއި ރަށް ކައިރި ރިސޯޓުތަކުން ލިބޭ މަގު ފަހިވެގެން ދިއުމަކީ ރަށުގެ ރައްޔިތުންގެ ހުވަފެނެއް ކަމަށް އިމްރާން ވިދާޅުވި އެވެ. އިމްރާންގެ ވާހަކަފުޅަށް ރައްދުދެއްވަމުން ރައީސް ސޯލިހު ވިދާޅުވެފައި ވަނީ ކުރިން އޮތް ހާލަތަށްވުރެ ފުރިހަމައަށް މި ރަށް ތަރައްގީކޮށްދެއްވާނެ ކަމަށެވެ.

ސުވާމީގައި މ. އަތޮޅުން 34 މީހަކު މަރުވެފައިވެ އެވެ. އޭގެ ތެރެއިން ކޮޅުފުށިން 16 މީހުން މަރުވެފައިވެ އެވެ. މިއީ ސުނާމީގައި އެންމެ ދެވަނައަށް އެންމެ ގިނަ މީހުން މަރުވި ރަށެވެ. އެންމެ ގިނަ މީހުން މަރުވީ ތ. ވިލުފުށިންނެވެ.